بۇكىل الەم دۇنيەنى دۇرلىكتىرگەن پاندەميادا دارىگەرلەردىڭ قادىرى ەسەلەپ ارتتى. تالايدىڭ ءومىرىن جالماعان قاۋىپتى دەرتپەن الدىڭعى شەپتە كۇرەسىپ جۇرگەن مەديتسينا قىزمەتكەرلەرىنىڭ ەڭبەگى ەرلىككە پارا-پار.
وسىناۋ ايتۋلى مەرەكە قارساڭىندا «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ فيليالى «نۇر-سۇلتان قالاسىنداعى حالىقارالىق مەكتەپتىڭ» وقۋشىلارى ءدارۋى دەرتكە داۋا دارىگەرلەرگە رياسىز العىستارىن ءبىلدىرىپ, ەرەكشە قۇتتىقتاۋدى ۇيعاردى. ءبىر توپ زياتكەر قولدارىنا قالام الىپ, بۇگىنگىنىڭ باتىرلارىنا ارناعان اقجارما تىلەكتەرى مەن جۇرەكجاردى لەبىزدەرىن قاعاز بەتىنە ءتۇسىردى.
ءسوز باسىن «Egemen Qazaqstan» گازەتىنىڭ ارداگەرى, ايتۋلى اقىن قورعانبەك امانجولدىڭ دارىگەرلەردىڭ ولشەۋسىز ەڭبەگىن باعالاۋعا شاقىرعان ولەڭىمەن باستاعان وقۋشىلار ودان ءارى تولعانىستى ويلارىمەن ءوربىتتى.
– ءبىز ەڭ ارداقتى ماماندىق يەلەرى دارىگەرلەردى كاسىبي مەرەكەلەرىمەن قۇتتىقتاپ, العىس ايتۋدان جالىقپايمىز. ادامزاتتىڭ اماندىعى جولىندا ۇيقى كورمەي, ۋاقىتپەن ساناسپاي ەڭبەك ەتىپ جۇرگەن بۇگىنگى كۇننىڭ باتىرلارى – مەديتسينا قىزمەتكەرلەرى بارلىق قۇرمەتكە لايىق دەپ بىلەمىز. ولار بىرنەشە ايدان بەرى وتباسىلارىنان جىراقتا ءجۇرىپ, قاۋىپتى دەرتتى اۋىزدىقتاۋعا بار كۇشتەرىن سالۋدا. ابزال جاندارعا دەمەۋ بولسىن, ءارى كوڭىل-كۇي سىيلاسىن دەگەن ماقساتتا ءبىر بۋما حاتتارىمىزدى جولداعالى وتىرمىز, – دەيدى وقۋشىلار.
