ايماقتار • 19 ماۋسىم، 2020

تۇركىستاندا بارىمتاشىلار قولعا ءتۇستى

166 رەت كورسەتىلدى

تۇركىستان وبلىسىنىڭ پوليتسەيلەرى قۇنى 150 ملن تەڭگەدەن اساتىن جىلقىلاردى ۇرلاعان بارىمتاشىلاردىڭ قىلمىستىق توبىن ۇستادى، دەپ حابارلايدى Egemen.kz

تەرگەۋ بارىسىندا ۇستالعانداردىڭ ءبىر جارىم جىل بويى جاسالعان 14 مال ۇرلىعىنا قاتىسى بارى انىقتالدى. جالپى ۇرىلار وبلىستىڭ قازىعۇرت، تولەبي جانە سارىاعاش اۋداندارىنىڭ جايىلىمدارىنان جىلقى ۇرلاپ وتىرعان. وسىلايشا، پوليتسياعا ونداعان اۋىل تۇرعىندارى وزدەرىنىڭ مالدارىن جايىلىمنان بەلگىسىز تۇلعالار ايداپ اكەتكەنى تۋرالى ارىز تۇسىرگەن. جابىرلەنۋشىلەردىڭ ءبىرى پوليتسەيلەرگە وتكەن جىلدان بەرى مال ۇرىلارى ونىڭ 25 جىلقىسىن جىمقىرىپ كەتىپ، وزىنە 12 ملن تەڭگەدەن استام شىعىن كەلتىرگەنىن حابارلاعان.

ۇرىلاردى ۇستاۋ ماقساتىندا قۇرىلعان وبلىستىق پد-ءنىڭ كريمينالدىق پوليتسيا، تەرگەۋ جانە جەرگىلىكتى پوليتسيا قىزمەتىنىڭ تاجىريبەلى قىزمەتكەرلەرىنەن ارنايى جەدەل-تەرگەۋ توبى جاقىن ماڭداعى بارلىق اۋماقتاردى ارالاپ، ءۇي مالدارىن ساتۋ جانە سويۋ ورىندارىن، سونداي-اق الىس شارۋا قوجالىقتارى مەن جايىلىمداردى تەكسەردى. ناتيجەسىندە، قازىعۇرت اۋدانىنىڭ ەكى تۇرعىنى ۇستالدى، ونىڭ ءبىرى بۇرىن سوتتى بولعان. تەرگەۋ بارىسىندا جەدەل ۋاكىلدەر ۇرلانعان جىلقىلاردى ساتىپ الۋشىلاردىڭ ىزىنە تۇسكەن. بەلگىلى بولعانداي، ۇرىلار جايىلىمنان جىلقىلاردى ايداپ اكەتىپ، قورالارىندا جاسىرىن باققان، سودان كەيىن ولاردىڭ سىرعالارىن اۋىستىرعان جانە بازارعا نەمەسە ەتكە وتكىزىپ وتىرعان. تەرگەۋ بارىسىندا قىلمىستىق توپتىڭ 14 مال ۇرلىعىنا قاتىستىلىعى انىقتالدى، ونىڭ جەتى دەرەگى قازىعۇرتتا، بەس دەرەگى سارىاعاشتا جانە ەكى دەرەگى تولەبي اۋداندارىندا. ايعاقتى زات رەتىندە پوليتسەيلەر 70-تەن استام جىلقىنى تاركىلەپ، زاڭدى يەلەرىنە قايتاردى.

پوليتسيا دەپارتامەنتى حابارلاعانداي، مال ۇرلىعىنا قاتىستى بۇگىندە تەرگەۋ امالدارى جۇرگىزىلۋدە جانە مال ۇرىلارىنىڭ باسقا دا وسىعان ۇقساس قىلمىستارعا قاتىستىلىعى انىقتالۋدا. قىلمىستىق ءىس تۇركىستان وبلىسى پد-ءنىڭ وندىرىسىندە جانە دەپارتامەنت باستىعىنىڭ قاتاڭ باقىلاۋىنا الىنعان.

سوڭعى جاڭالىقتار

75،7 ملن ادام ايتۆ جۇقتىردى

مەديتسينا • كەشە

2021 جىلعى ورازا كەستەسى

رۋحانيات • كەشە

ۇقساس جاڭالىقتار