تەگىن كاسىپتىك-تەحنيكالىق ءبىلىم بەرۋ باعدارلاماسى جىل سايىن 100 مىڭ ستۋدەنتتى قامتىپ وتىر. ءدۋالدى وقىتۋعا بايلانىستى ستۋدەنت ءوز ۋاقىتىنىڭ 60%-دان كوبىن كاسىپورىنداردىڭ بازاسىندا وتكىزەدى, وقىتۋدىڭ بۇل ءتۇرى بويىنشا ءبىلىم العان تۇلەكتەردىڭ 72% جۇمىسقا ورنالاسادى. بۇل شارالاردىڭ كاسىپتىك-تەحنيكالىق ءبىلىم سالاسىنا وڭ وزگەرىستەر اكەلەرى ءسوزسىز.
بيىلعى جىل ءبىلىم جۇيەسى ءۇشىن وتە ماڭىزدى جىل بولدى. 2019-2020 وقۋ جىلىنىڭ ەرەكشەلىگى قاشىقتان وقىتۋ جۇيەسىنە كوشۋ عانا ەمەس, بىرىنشىدەن, ەلىمىزدىڭ تاۋەلسىزدىك تاريحىندا العاش رەت "پەداگوگ مارتەبەسى تۋرالى" زاڭ قابىلداندى. 2025 جىلعا دەيىنگى ءبىلىم جانە عىلىمدى دامىتۋدىڭ جاڭا مەملەكەتتىك باعدارلاماسى بەكىتىلىپ, ىسكە اسىرىلىپ جاتىر. بۇل قۇجاتتاردىڭ ءبىلىم سالاسى ءۇشىن تاريحي ماڭىزى زور.
"پەداگوگ مارتەبەسى تۋرالى" زاڭنىڭ قابىلداۋى ارقاسىندا كوللەدج وقىتۋشىلارىنىڭ جالاقىسى جىلىنا 25% جانە جاڭا اتتەستاتتاۋ جۇيەسى ارقىلى قوسىمشا 30%-دان 50%-عا دەيىن كوبەيتىلۋدە.
بۇگىندە پەداگوگ كاسىبىنىڭ تارتىمدىلىعىن ارتتىرۋ بويىنشا جۇيەلى شارالار قابىلدانىپ جاتىر. 2020 جىلدىڭ قىركۇيەك ايىنان باستاپ مۇعالىم بولۋعا نيەت بىلدىرگەن ستۋدەنتتەردىڭ شاكىرتاقىسىن 26186 تەڭگەدەن 42500 تەڭگەگە دەيىن كوتەرۋ جوسپارلانعان. پەداگوگيكالىق ماماندىقتارعا وقىتۋعا شەكتى باللدى 70 باللعا دەيىن كوتەرۋ قاراستىرىلدى. پەداگوگيكالىق باعىتتاعى تۇلەكتەر بيىلدىڭ وزىندە پەداگوگ-مودەراتور بىلىكتىلىگىن الۋعا ۇمىتكەر بولا الادى. بۇل ءۇشىن ۇلتتىق بىلىكتىلىك تەستىنەن ءوتىپ, ءوزىنىڭ يگەرگەن داعدىلارىن كورسەتۋى ءتيىس.
ەلىمىزدە كوروناۆيرۋستىق ينفەكتسيانىڭ تارالۋىنا جول بەرمەۋ ماقساتىندا جاريالانعان توتەنشە جاعداي كەزىندە قاشىقتان وقىتۋ تەحنولوگياسى بويىنشا وقۋ پروتسەسىن ساپالى ۇيىمداستىرۋ مەن ۇيلەستىرۋدەگى مينيسترلىكتىڭ شۇعىل شەشىمى مەن دەر ۋاقىتىنداعى ۇسىنىلعان ادىستەمەلىك نۇسقاۋلارى ارقاسىندا قيىن كەزەڭنەن وقۋ ءۇردىسىن تەجەمەي وتە الدىق. مينيسترلىكتىڭ الدىندا توتەنشە جاعداي كەزىندە وقىتۋ ءۇردىسىن جالعاستىرا وتىرىپ ءبىلىم الۋشىلار مەن ءبىلىم بەرۋ جۇيەسىنىڭ قىزمەتكەرلەرىنىڭ دەنساۋلىعىن قورعاۋ ماسەلەسى تۇردى. قىسقا ۋاقىت ىشىندە ستۋدەنتتەردىڭ دە, وقىتۋشىلاردىڭ دا, اتا-انالاردىڭ دا جاڭا جاعدايعا بەيىمدەلە العانىن اتاپ وتكىم كەلەدى. بىرقاتار پروبلەمالاردىڭ بولعانىنا قاراماستان, وقۋ پروتسەسى توقتاعان جوق.
ءمينيسترىمىز ا.ايماعامبەتوۆ ءبىر سۇحباتىندا: "وكىنىشكە قاراي, جەمقورلىق - بۇگىنگى كۇنى ەڭ باستى پروبلەمالاردىڭ ءبىرى, بىرىنشىدەن, ءبىلىم سالاسىندا جەمقورلىق پروبلەماسى بار دەپ مويىنداۋىمىز كەرەك. ەكىنشىدەن, وعان قارسى جەكەلەگەن ۇساق-تۇيەك ەمەس, كەشەندى جۇمىس جۇرگىزۋىمىز كەرەك, وندايمەن اينالىسىپ تا جاتىرمىز. ۇشىنشىدەن, اشىقتىق كەرەك. اشىقتىق بولعان جەردە جەمقورلىق بولمايدى. تورتىنشىدەن, بۇعان ءارتۇرلى پروتسەدۋرالار ارقىلى قارسى تۇرۋىمىز كەرەك. ولار – ءبىلىم ساپاسىن كوتەرۋ, ۇستازداردىڭ, پەداگوگتاردىڭ مارتەبەسىن كوتەرۋ جانە جەمقورلىقتى, جالپى كەلەڭسىزدىكتەردى جويىپ, اشىقتىق ورنىقتىرۋ. مىنە وسىلاردى باستى ماسەلە سانايمىن. ويتكەنى ءبىلىم سالاسىندا تازا, ءادىل, اشىق ادامدار جۇمىس ىستەۋى كەرەك. بىزگە كوپ نارسە بايلانىستى, بۇگىنگى ءبىلىم سالاسى قانداي بولادى, قانداي ۇستازدار بولادى, وقۋشىلار قانداي ءبىلىم الادى – بولاشاعىمىز سوعان تىكەلەي بايلانىستى. بولاشاقتىڭ كىلتى ءبىزدىڭ مۇعالىمدەردىڭ, ۇستازداردىڭ, وقۋشىلارىمىزدىڭ قولىندا. سوندىقتان ءبىلىم جانە عىلىم مينيسترلىگى ءوز جۇمىسىن كەشەندى, تازا, جاقسى ىستەۋى كەرەك دەپ سانايمىن",- دەگەن ەدى.
مينيستر ا.ايماعامبەتوۆتىڭ بۇل پىكىرى بۇگىنگى كۇنى ءىس جۇزىنە اسىپ وتىر. ەلىمىزدەگى مەملەكەتتىك قىزمەتتىڭ باسىم بولىگى ءبىلىم بەرۋ سالاسىندا كورسەتىلەدى. ماسەلەن, كوللەدجدەرگە وقۋعا قابىلداۋ پروتسەسىن اۆتوماتتاندىرۋ - قاعازباستىلىق دەڭگەيىن كۇرت تومەندەتۋ, جالپى قابىلداۋ تالاپتارىنىڭ جەڭىلدەتىلۋى دەپ تۇسىنەمىز. كوللەدجدەرگە وقۋعا قابىلداۋ قىزمەتى –ۇلكەن سۇرانىسقا يە. ءبىلىم بەرۋ ۇيىمدارىنا قۇجات تاپسىرۋ ءۇشىن ءبىراز ۋاقىت جۇمساۋ قاجەت بولاتىن. ول ءۇشىن كوپتەگەن انىقتامالاردى جيناپ, باسقا مەملەكەتتىك ورگانداردان قۇجاتتاردى الىپ, ولاردى اپارىپ بەرۋ سىندى بىرقاتار كەزەڭدەردەن ءوتۋ قاجەت ەدى. مۇنداي پروتسەسس وتە ىڭعايسىز ەكەنى تۇسىنىكتى. بيىلدان باستاپ كوللەدجدەرگە وقۋعا قابىلداۋ اۆتوماتتاندىرىلعان رەجيمدە قولجەتىمدى. "ازاماتتارعا ارنالعان ۇكىمەت" بولىمدەرى نەمەسە "ەلەكتروندىق ۇكىمەت" ۆەب-پورتالى ارقىلى جۇزەگە اسىرا الادى. بۇل رەتتە كوپتەگەن قۇجاتتاردى جان-جاقتان جيناۋ قاجەت بولمايدى. ءاربىر بولاشاق ستۋدەنت ءوزى ءۇشىن تاڭداعان كوللەدجدىڭ سايتتارى ارقىلى تانىسىپ, ءبىر تەتىكتى باسۋ ارقىلى بارلىق قۇجاتتاردى جىبەرۋگە بولادى.
شاعانگۇل جاناەۆا,
م.اۋەزوۆ اتىنداعى پەداگوگيكالىق كوللەدجىنىڭ ديرەكتورى,
قازاقستان پعا كوررەسپوندەنت مۇشەسى,
"ى. التىنسارين", ء"بىلىم بەرۋ ءىسىنىڭ قۇرمەتتى قىزمەتكەرى" توسبەلگىلەرىنىڭ يەگەرى
