بۇل جايىندا بىزگە "الاش پرايد" كلۋبىنىڭ پرەزيدەنتى دانيار قاسقاراۋوۆ حابارلادى. ونىڭ ايتۋىنشا, ازىرگە كوپشىلىك كۇتكەن باسەكەنىڭ قاي جەردە جانە قانداي ارەنادا وتەتىنى انىقتالعان جوق. "الداعى جەكپە-جەكتىڭ ماڭىزى جوعارى. سەبەبى, قازىرگى كەزدە رايسوۆتىڭ داڭقى دۇركىرەپ تۇر. ول اسا پروموۋشەنىندەگى ەڭ ۇزدىك سپورتشىلاردىڭ ءبىرى. دەسەك تە ءبىزدىڭ ارتەم دا وسال ەمەس. سوڭعى كەزدەرى رەزنيكوۆ تاماشا ونەر كورسەتىپ, قارسى كەلگەندەرىن قوعاداي جاپىرىپ كەلەدى. مىنە, ەندى قوس مىقتىنىڭ جولىعاتىن كۇنى جاقىنداپ كەلەدى", دەيدى د.قاسقاراۋوۆ.
جوعارىدا ەسىمدەرى اتالعان جەڭىل سالماقتاعى قوس سپورتشىنى جاقىنىراق تانىستىراتىن بولساق, يۋسۋف رايسوۆ 25 جاستا. چەشەنستاننىڭ گروزنىي قالاسىنىڭ تۋماسى ارالاس جەكپە-جەكتەن 17 كەزدەسۋ وتكىزىپ, تەك بىرەۋىندە عانا ۇتىلدى. 2016 جىلدىڭ 18 جەلتوقسانىندا سانكت-پەتەربۋرگتە مارات بالاەۆقا ەسە جىبەرگەن بولاتىن. 2018 جىلدىڭ 5 مامىرىندا ماسكەۋدە ءدال سول ساڭلاقققا سان سوقتىرعان يۋسۋف جارتىلاي جەڭىل سالماقتىڭ چەمپيوندىق بەلبەۋىن يەلەندى. قازىرگى رەيتينگتە رايسوۆ ەكىنشى ورىندا تۇر.
ارتەم رەزنيكوۆ 28 جاستا. قازاقستاننىڭ تۋماسى 22 مارتە وكتاگونعا شىعىپ, 16 رەت جەڭىسكە جەتتى. سوڭعى رەت ول وسىدان ءۇش جىل بۇرىن جەڭىلىستىڭ كەرمەك ءدامىن تاتقان بولاتىن. سودان بەرى قاتارىنان بەس رەت ءوز قارسىلاستارىن ايقىن باسىمدىقپەن ۇتتى. اسا رەيتينگىندە جەرلەسىمىز التىنشى ورىندى ەنشىلەۋدە.
