1-16 ماۋسىم ارالىعىندا ءبىلىم سالاسىنداعى ساپانى قامتاماسىز ەتۋ دەپارتامەنتتەرى ءتيىستى مونيتورينگ جۇرگىزدى. ولاردىڭ مالىمەتتەرى بويىنشا, ەڭبەك دەمالىسىنا شىققان پەداگوگتەردىڭ 93%-ى دەمالىس اقىسىن ۋاقىتىلى الدى. قالعان 7%-ىنا ۋاقىتىلى تولەمەگەنى انىقتالدى.
جۇمىس بەرۋشىلەر مۇعالىمدەرگە ەڭبەك دەمالىسىنىڭ تولەمىن كەشىكتىرگەنى نەمەسە تولەمەگەنى ءۇشىن زاڭعا سايكەس جازالانادى.
«مينيسترلىك مۇعالىمدەردىڭ شاعىمدارىن قاراستىرىپ, دەمالىس اقىسىن تولەۋ بويىنشا جاعدايدى باقىلاۋدا ۇستاپ وتىر. بيۋدجەتتە جالاقىعا دا, ەڭبەك دەمالىسى اقىسىنا دا قاراجات قاراستىرىلعان. ياعني اقشا بار, بىراق كەيبىر ايماقتاردا تولەمنىڭ ۋاقتىلى جاسالماعانى انىقتالدى», دەيدى مينيسترلىكتىڭ ءباسپاسوز قىزمەتى.
ا.ايماعامبەتوۆ ءبىلىم جانە عىلىم سالاسىنداعى ساپانى قامتاماسىز ەتۋ كوميتەتىنە ەڭبەكاقىنى ۋاقىتىلى تولەمەۋ, ونىڭ ىشىندە مۇعالىمدەرگە تولەنەتىن دەمالىس اقىسى تۋرالى فاكتىلەردى ءتيىستى شارا قولدانۋ ءۇشىن وبلىستىق مەملەكەتتىك ەڭبەك ينسپەكتسيالارىنا جىبەرۋدى تاپسىردى.
زاڭعا سايكەس, مەكتەپتەر مەن بالاباقشالارداعى پەداگوگتەرگە جالاقى تولەۋ تىكەلەي اۋداننىڭ نەمەسە قالانىڭ بيۋدجەتىنەن جۇزەگە اسىرىلاتىنىن ايتا كەتكەن ءجون. بيۋدجەتتىك جوسپارلاۋ جانە تولەمدەردى ۇيىمداستىرۋ – قالالار مەن اۋداندار اكىمدىكتەرىنىڭ قۇزىرەتىندە.
قازاقستان رەسپۋبليكاسىنىڭ «پەداگوگ مارتەبەسى تۋرالى» زاڭىنىڭ 12-بابى 1-تارماعىنىڭ 3) جانە 4) تارماقشالارىندا ايقىندالعان الەۋمەتتىك كەپىلدىكتەرگە پەداگوگكە 56 كۇنتىزبەلىك كۇنگە تولەنەتىن جىل سايىنعى اقىلى ەڭبەك دەمالىسى, سونداي-اق كۇنتىزبەلىك جىلدا ەڭبەك دەمالىسى كەزىندە كەمىندە ءبىر لاۋازىمدىق جالاقى مولشەرىندە دەنساۋلىعىن جاقسارتۋعا بەرىلەتىن جاردەماقى كىرەدى.
