"كونە قالا" ەتنواۋىلىندا 12 كيىز ءۇي مەن كورمە قويىلاتىن جارتىلاي كيىز ءۇي, اق قاناتتى شاتىر ءۇي دە قۇرۋ جوسپارلانعان. سونىمەن قاتار اۋىلدا التىباقان شاعىن ساۋلەت نىساندارى دا قۇرىلادى. قۇرىلىستا بالالار ءۇشىن ارنايى الاڭ دا قاراستىرىلعان.
كيىز ۇيلەردە شىمكەنت قالاسىنىڭ 2200, عۇلاما, عالىم ءابۋ ناسىر ءال-ءفارابيدىڭ 1150, اقىن اباي قۇنانباي ۇلىنىڭ 175, كومپازيتور ءشامشى قالداياقوۆتىڭ 90 جىلدىعىنا ارنالعان تاقىرىپتىق كورمەلەر ۇيىمداستىرىلادى. ءتورت كيىز ءۇي قازاقتىڭ ۇلتتىق تاعامدارىنا ارنالسا, كورپە تىگۋ ءۇيى, سالت-ءداستۇر ءۇيى, اجەلەر ءۇيى جانە باس كيىز ءۇي تاقىرىپقا ساي بەزەندىرىلەدى. ال جارتىلاي كيىز ۇيلەردە قولونەر بۇىمدارىنىڭ كورمەلەرى قويىلادى.
قالاشىقتىڭ ءىشى قورعان-قالاشىق تۇرىندەگى جوبانىڭ ورتاسىندا اق شاتىرلى وردا تۇرىندەگى دوڭگەلەك ساحنا ورنالاسقان. ساحنانىڭ الدىندا 200 ورىندىق كورەرمەندەر الاڭى بولادى. ساحنالىق الاڭنىڭ ەكى شەتىندە اربا ۇستىنە تىگىلگەن كيىز ۇيلەر قويىلادى دەپ جوسپارلانعان.
قالاشىقتىڭ اۋىل-الاڭقايلارىندا قولونەرشىلەر اۋىلى, قۇسبەگى-ساياتشىلار اۋىلى, زەرگەرلەر اۋىلى, قىمىزشىلار اۋىلى, ۇلتتىق تاعامدار اۋىلى, مۋزىكالىق اسپاپتار كورمەسى, بالالارعا ارنالعان ويىن الاڭدارى ورنالاسادى.
كەلۋشىلەرگە ۇلتتىق كيىم كيگەن قىز-جىگىتتەر قوناقتاردى قازاقتىڭ ۇلتتىق سالت-داستۇرلەرىمەن تانىستىرادى. ەتنوقالاشىقتا كورەرمەندەر ۇلتتىق سپورت تۇرلەرىن تاماشالاپ, كيىز ءۇي تىگۋ, سىرماق باسۋ, شي توقۋ, مال سويىپ, ەت اسۋ پروتسەستەرىنە قاتىسا الادى. قازاقتىڭ ءان-كۇيىن تىڭداپ, ۇلتتىق قولونەر بۇيىمدارىن ەستەلىك رەتىندە ساتىپ الۋعا بولادى. سونداي-اق كەشكى ويىن-ساۋىق پەن ۇلتتىق سالت-داستۇردەن سىر شەرتەتىن قويىلىمدارى تاعى بار.
ايتا كەتەرلىگى, الەمدى جايلاعان قاۋىپتى ىندەتكە بايلانىستى قالاشىقتىڭ اشىلۋى كەيىنگە شەگىرىلدى.
