بۇل تۋرالى پاۆلودار وبلىسى اكىمىنىڭ ءباسپاسوز قىزمەتى مالىمدەدى.
ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى يرينا نازارچۋكتىڭ ايتۋىنشا, 2020 جىلدىڭ بەس ايىنىڭ قورىتىندىسى بويىنشا وڭىردە ونەركاسىپ سالاسىنداعى ءوسىم وتكەن جىلعى كورسەتكىشپەن سالىستىرعاندا 4,2%-دى قۇرادى. اۋىل شارۋاشىلىعىندا ءوندىرىس شامامەن 2%-عا, ال قۇرىلىس سالاسىندا 2,7%-عا ارتتى.
"جىلدىڭ باسىنان بەرى نەگىزگى كاپيتالعا تارتىلعان ينۆەستيتسيا كولەمى 97,2 ميلليارد تەڭگەنى قۇرادى", - دەدى ەكونوميكا ۆەدومستۆوسىنىڭ باسشىسى. سەرپىننىڭ تومەندەۋى ەكى سەكتوردا - ىشكى ساۋدا مەن كولىكتە جانە قويمالاۋدا بايقالادى. جالپى, وبلىستا قىسقا مەرزىمدى ەكونوميكالىق ينديكاتور 99,4%-دى قۇراپ وتىر.
كەلەسى ءتورت ماكروەكونوميكالىق كورسەتكىش تاۋەكەل ايماعىنا تاپ بولىپ وتىر: قۇرىلىس جۇمىستارىنىڭ كولەمى, ينۆەستيتسيالار كولەمى, ىشكى ساۋدا, كولىك جانە قويمالاۋ سەكتورى. قۇرىلىستا ولقىلىقتىڭ ورىن الۋىنا جول بەرمەۋ ءۇشىن پاۆلودار وبلىسىنىڭ اكىمى جۇمىس كەستەسىن ءار اۋدان مەن جەكەلەگەن نىساندار تۇرعىسىنان انىقتاپ, قاداعالاپ وتىرۋدى تاپسىردى. جاعدايعا وڭ اسەر ەتەتىن تاعى ءبىر فاكتور - وڭىردەگى كاسىپورىندارعا بارىنشا جۇكتەمە بەرۋ.
"ارنايى كوميسسيا جەرگىلىكتى ءوندىرىس ورىندارىن جۇكتەۋدىڭ ناقتى ءتارتىبىن ازىرلەۋى كەرەك. سونىمەن قاتار, وبلىستاعى جانە رەسپۋبليكا ىشىندەگى كاسىپورىندارمەن بايلانىس ورناتۋ كەرەك", - دەدى ابىلقايىر سقاقوۆ.
سونداي-اق "سامۇرىق-قازىنا", "قازاقستان تەمىر جولى" جانە باسقا دا كۆازيمەملەكەتتىك سەكتوردىڭ كومپانيالارىمەن بايلانىس ورناتۋ قاجەت. ىشكى نارىق ءوزىنىڭ پايداسىن بارىنشا ارتتىرۋى كەرەك, ال باستى نازاردى قازاقستاندىق قامتۋعا اۋدارۋ كەرەك. قارجىلىق تارتىپكە كەلەر بولساق, 2020 جىلدىڭ بەس ايىندا جوسپار 17,1 ملرد تەڭگەنى قۇراسا, وبلىستىق بيۋدجەتتىڭ كىرىسى 17,2 ملرد تەڭگەنى قۇرادى. قارجى باسقارماسىنىڭ باسشىسى ماقسات تۇرلىباەۆتىڭ ايتۋىنشا, جوسپاردىڭ اسىرا ورىندالۋى جەكە جانە كورپوراتيۆتىك تابىس سالىعى, اكتسيزدەر جانە م ۇلىك سالىعى ەسەبىنەن قامتاماسىز ەتىلدى.
"نەگىزگى فاكتورلار – ەڭبەكاقىنى ارتتىرۋ, بەرەسىمەن, سالىق سالىناتىن بازانى ۇلعايتۋمەن جانە سالىقتاردى مەرزىمىنەن بۇرىن تولەۋمەن جۇمىس ىستەۋ", - دەپ مالىمدەدى ۆەدومستۆو باسشىسى.
جالپى العاندا, 57 كىرىس كوزىنەن 78,2 ميلليون تەڭگە سوماسىنا التاۋى عانا قامتاماسىز ەتىلمەگەن. وبلىستىق قازىنانىڭ شىعىس بولىگى تۋرالى ايتار بولساق, جوسپار بويىنشا 123,1 ملرد تەڭگەنىڭ 119,9 ملرد تەڭگەسى يگەرىلدى.
ابىلقايىر سقاقوۆ بيۋدجەت قاراجاتىن يگەرۋدەگى ەڭ باستىسى - ولاردى ۇتىمدى جانە ءتيىمدى پايدالانۋ ەكەنىن اتاپ ءوتتى.
ءوڭىر باسشىسىنىڭ ايتۋىنشا, پاۆلودار وبلىسىنىڭ تۇرعىندارى الەۋمەتتىك سالاداعى وزگەرىستەردى كورىپ, تىرشىلىكتى قامتاماسىز ەتۋ ينفراقۇرىلىمىنىڭ جاقسارعانىن سەزىنۋلەرى كەرەك.
