2019 جىلدىڭ جازىندا تۇزدى كولدىڭ ءتۇسى قىزعىلت رەڭگە بويالا باستاعان. بىرەۋدىڭ ادەيى جاساعان ءىسى ەمەس. تۇز قابىرشاقتارى قىزارىپ, كولدىڭ بەتى ەرەكشە قۇبىلىسقا ەنگەن. سوندىقتان بولار, كوبەيتۇز – قىزعىلت كول اتالىپ كەلەدى. كوكتەگى اقشا بۇلتتار دا كول ۇستىندە كولبەڭدەپ ادەمى ۇيلەسىم تاپقان. مۇنداعى اسەمدىككە تامسانىپ, تۇزدى سۋدان شيپا ىزدەپ كەلەتىن ادامدار كۇننەن كۇنگە كوبەيىپ كەلە جاتىر. ماسەلەن, جانەركە ەربوسىنقىزى وتكەن اپتادا عانا اتالعان جەرگە ارنايى بارىپ قايتىپتى.
- العاشقىدا كولگە بارعان ادامداردىڭ فوتو-ۆيدەولارىن كورىپ, قىزىقتىم. كوپ ۇزاماي جولعا شىقتىق. ەلوردادان اسا الىس تا ەمەس. كول نۇر-سۇلتان-پاۆلودار تاس جولىنىڭ بويىندا جاتىر ەكەن. ەرەيمەنتاۋدان وتكەن بەتتە «قورجىنكول ستانتسياسى» دەگەن بەلگىدەن وڭعا بۇرىلعان سوڭ, تۋننەل ارقىلى جولدىڭ ارعى بەتىندە ورنالاسقان «اقجول» كەشەنىنە جەتتىك. كول سول ماڭايدا. ول جەردەگى كورىنىستى سوزبەن ايتىپ جەتكىزە المايمىن. تەك كوزبەن كورۋ كەرەك. مەن بارعاندا ادامدار كوپ ءجۇردى. جالاڭ اياق سۋ كەشكەن اتا-اجەلەر دە بايقالادى. جاعاسىندا داستارحان جايىپ, كوڭىلدى وتىرىس قۇرىپ وتىرعان وتباسىلار دا بار. سونىڭ ءبارى ادامعا ەرەكشە اتموسفەرا سىيلايدى, - دەيدى بويجەتكەن.
وسى تەكتەس پىكىرلەردى الەۋمەتتىك جەلىدەگى وقىرمانداردىڭ جازباسىنان دا ءجيى بايقايمىز. سوندىقتان دا اقمولا وبلىسىنىڭ تۋريستىك الەۋەتىن ارتتىرۋعا ءتيىمدى ورىنداردىڭ ءبىرى بولۋعا لايىق دەگەن وي كەلەدى. الدىمەن الىستان ات تەرلەتىپ كەلەتىن ساياحاتشىلار ءۇشىن ءتيىستى جاعدايلار جاسالۋى شارت. بۇل – ىشكى ءتۋريزمدى جانداندىرۋداعى ەلەۋلى جۇمىس بولار ەدى دەپ ويلايمىز.
