SAT, ACT جانە IB حالىقارالىق ستاندارتتالعان تەستىلەۋلەردىڭ سەرتيفيكاتى بار تۇلعالار ءبىلىم بەرۋ گرانتىن تاعايىنداۋ كونكۋرسىنا قاتىسا الادى نەمەسە جوو-نىڭ اقىلى بولىمىنە تۇسە الادى.
ءبىلىم جانە عىلىم مينيسترلىگى بۇل تۋرالى: «SAT, ACT جانە IB حالىقارالىق ستاندارتتالعان تەستىلەۋلەر شكالاسىنىڭ ۇبت بالىنا اۋىستىرىلۋى جوعارى ءبىلىمنىڭ اياسىن كەڭەيتۋ ءۇشىن ەنگىزىلدى», دەپ حابارلادى.
SAT تەستىلەۋىنىڭ بالىن ۇبت بالىنا اۋىستىرۋ تەك SAT reasoning (مەكتەپتەگى داعدىلار – وقۋ, حات جانە ماتەماتيكا بويىنشا تەست) جانە SAT Subject (جەكەلەگەن پاندەر بويىنشا تەست) سەرتيفيكاتى بولعان جاعدايدا عانا جۇزەگە اسىرىلادى. سونداي-اق SAT Subject ناتيجەلەرى ۇبت بالىنا تەك بەيىندى پاندەر سايكەس كەلگەن جاعدايدا عانا اۋىستىرىلادى. «اعىلشىن ءتىلى» ءپانى ءۇشىن IELTS ناتيجەلەرى ەسكەرىلەدى.
قوسا كەتەيىك, IB – تۇلەكتەردى اقش-تىڭ جانە ەۋروپا ەلدەرىنىڭ جوو-لارىنا دايىنداۋعا ارنالعان ءبىلىم بەرۋ باعدارلاماسى. ACT تەستىلەۋى اقش كوللەدجدەرىنە ءتۇسۋ ءۇشىن پايدالانىلادى. SAT – اقش-تىڭ جوعارعى وقۋلارىنا ءتۇسۋ ءۇشىن تاپسىرىلاتىن ستاندارتتى تەست.
