ايماقتار • 07 ماۋسىم، 2020

قۇلقىنىن كوبىرەك ويلاعان جان قاپى قالدى

110 رەت كورسەتىلدى

جالپى ەلدىڭ، ءتىپتى الەمنىڭ باسىنا قاۋىپ ءتونىپ، جۇرتتىڭ ءبارى پاندەميامەن كۇرەسكە جۇمىلىپ جاتقاندا سقو شال اقىن اۋدانى پوليتسياسى باستىعىنىڭ ورىنباسارى، مايور شەنىندەگى پاراقور وزىنە ءىسى تۇسكەن بيزنەسمەننەن 1،3 ملن تەڭگە پارا تالاپ ەتكەنى ءۇشىن تۇتقىندالعانىن بۇرىن جازعان بولاتىنبىز.

ول استىق ساتىپ الۋعا قازاقستانعا كەلگەن شەتەلدىك بيزنەسمەندەردىڭ كارانتين كەزىندە اۋدان اۋماعىندا ەركىن ءجۇرىپ-تۇرۋىنا مۇمكىندىك تۋدىراتىنى ءۇشىن وسىنشا قاراجات تالاپ ەتكەن. 

سقو پوليتسيا دەپارتامەنتىنىڭ قىزمەتكەرلەرى الدىندا سىبايلاس جەمقورلىققا قارسى كۇرەس اگەنتتىگىنىڭ ايماقتىق باسشىسى ەرنار بايانعازين پاراقوردىڭ بارلىق قىلمىستىق ارەكەتىن ايتىپ بەردى. استىق الۋعا كەلگەن شەتەلدىكتەر بلوكبەكەتتە ۇستالىپ، اكىمشىلىك حاتتاما تولتىرىلۋى ءۇشىن سوتقا جىبەرىلەدى. ال استىعىن وتكىزۋگە اسىققان جەرگىلىكتى فەرمەر ولاردىڭ تەز بوساتىلۋىنا كومەكتەسۋدى سۇراپ كۇدىكتىگە جۇگىنەدى. كۇدىكتى بۇل ىسكە قۇلشىنا كىرىسپەك بولادى، الايدا ول ءۇشىن 300 مىڭ تەڭگە بەرۋدى تالاپ ەتەدى. الۋشىدان ايرىلىپ قالماۋدى كوزدەگەن فەرمەر وعان كەلىسەدى. سونىمەن قاتار شەتەلدىكتەردىڭ اۋدان اۋماعىندا ەركىن ءجۇرىپ-تۇرۋىن قامتاماسىز ەتۋىن سۇرايدى. پاراقور بۇعان دا كەلىسىپ، الايدا ول ءۇشىن تاعى ءبىر ميلليون تەڭگەنى قوسىمشا بەرۋگە ماجبۇرلەيدى جانە بۇل اقشانىڭ جارتىسىن جوعارىعا بەرەتىنىن ايتادى. فەرمەر وسىنىڭ ءبارىن ايتىپ، سىبايلاس جەمقورلىققا قارسى كۇرەس اگەنتتىگىنە شاعىم تۇسىرەدى. پاراقور اقشانى الۋ كەزىندە ۇستالدى.

جۋىردا پەتروپاۆل قالالىق سوتى پاراقوردى 3،5 جىلعا باس ەركىنەن ايىرۋ تۋرالى ۇكىم شىعاردى. ول قىلمىستىق جازاسىن قاۋىپسىزدىگى ورتا دەڭگەيدەگى تۇزەتۋ ورنىندا اتقاراتىن بولدى. سونىمەن بىرگە ءومىر-باقي مەملەكەتتىك قىزمەتتە ىستەۋ قۇقىنان ايرىلدى. ارينە، پاراقوردىڭ ءالى وبلىستىق سوتقا شاعىمدانۋ قۇقى بار، بىراق مۇنداي ىستەر بۇزىلا قويمايدى.

 

سولتۇستىك قازاقستان وبلىسى

 

سوڭعى جاڭالىقتار

ۇقساس جاڭالىقتار