وتكەن جىلدىڭ جەلتوقسان ايىندا مەملەكەت باسشىسى قاسىم-جومارت توقاەۆتىڭ گەرمانياعا ساپارى اياسىندا «ەلەكتر ەنەرگەتيكاسىن دامىتۋ جانە ەنەرگيا ۇنەمدەۋ ينستيتۋتى» اق, «اتامەكەن» ۇكپ جانە «دەنا» ەنەرگەتيكالىق اگەنتتىگى اراسىندا قازاقستاننىڭ ەنەرگيا تيىمدىلىگىن ارتتىرۋ بويىنشا جوسپار ازىرلەۋ مەن ىنتىماقتاستى دامىتۋ تۋرالى ءۇش جاقتى مەموراندۋمعا قول قويىلعان ەدى.
مەملەكەت باسشىسى قاسىم-جومارت توقاەۆ توتەنشە جاعداي جونىندەگى مەملەكەتتىك كوميسسيانىڭ قورىتىندى وتىرىسىندا ەلىمىزدىڭ ەنەرگەتيكا سەكتورى رەفورمالاردى تالاپ ەتەتىنىن اتاپ ءوتتى. الداعى ۋاقىتتا «جاسىل ەنەرگەتيكاعا» قاراي قوزعالىس جاساۋعا ەرەكشە ماڭىز بەرىلەدى.
ەكى ەل اراسىنداعى ءوزارا ءىس-قيمىلدى ودان ءارى جانداندىرۋ ماقساتىندا گەرمانيانىڭ فەدەرالدىق ەكونوميكا جانە ەنەرگەتيكا مينيسترلىگىنىڭ تاپسىرماسىمەن «دەنا» ەنەرگەتيكالىق اگەنتتىگى ءوزارا كووپەراتسيانى دامىتۋ باعىتىندا جۇمىس توبىن قۇرۋدى قولعا الدى. ونداعى ماقسات - ەنەرگەتيكا سالاسىنداعى بىرلەسكەن ىنتىماقتاستىقتىڭ ستراتەگيالىق باعىتىن ايقىنداۋ.
قازىر ۇزاق مەرزىمدى جوسپاردى ازىرلەۋ بويىنشا بەلسەندى جۇمىس باستالدى. جوسپار ەل ەكونوميكاسىنىڭ ءار سەكتورى بويىنشا جەكە ەنەرگيا تيىمدىلىگىنىڭ الەۋەتىن ايقىنداپ, ەنەرگەتيكا, ونەركاسىپ, بيۋدجەت سەكتورى مەن عيماراتتار, كولىك سەكتورلارىنىڭ قازىرگى جاي-كۇيىن ەسكەرىپ, ناقتى قول جەتكىزىلەتىن كورسەتكىشتەرمەن ازىرلەنەدى.
جوسپاردى ازىرلەۋ بەس نەگىزگى كەزەڭگە بولىنگەن: 1) ۇيىمدىق قۇرىلىمدى قالىپتاستىرۋ 2) ەنەرگيا ۇنەمدەۋ سالاسىنداعى اعىمداعى جاعدايدى تالداۋ, 3) ءىس-شارالاردى ىرىكتەۋ, 4) ساندىق كورسەتكىشتەردى ايقىنداۋ 5) ناقتى جوسپاردى بەكىتۋ. اعىمداعى جىلى وسىلاردىڭ ءتورت كەزەڭىن ىسكە اسىرۋ كوزدەلگەن.
گەرمانيا جاعى جوبانى قارجىلاندىرۋعا دايىن. سونىمەن قاتار, دۇنيەجۇزىلىك بانك ەكونوميكا سەكتورلارىنىڭ ەنەرگيا تيىمدىلىگىن ارتتىرۋ جوسپارىن ازىرلەۋ جونىندەگى باستامانى قولداپ, تەحنيكالىق كومەك كورسەتۋگە ءازىر.
جىل سوڭىنا دەيىن ەلىمىزدەگى ەنەرگيا ۇنەمدەۋدىڭ قازىرگى جاعدايىنا تولىقتاي تالداۋ جۇرگىزۋ جوسپارلانىپ وتىر. سونداي-اق, ەكونوميكانىڭ ءتۇرلى سەكتورلارىندا ەنەرگيا ۇنەمدەۋ الەۋەتىن انىقتاۋ كوزدەلگەن. وسى جىلدىڭ تامىز ايىندا ەنەرگيا تيىمدىلىگىن ارتتىرۋ بويىنشا ءىس-شارالاردى الدىن الا ىرىكتەۋ باستالادى. سوڭعى جوبا 2021 جىلى ازىرلەنەدى.
جوسپاردىڭ تۇپكى ماقساتى - ەنەرگيا تيىمدىلىگىن ارتتىرۋ بويىنشا ەلدىڭ ءتيىمدى ستراتەگياسىن ازىرلەۋ. بۇل بيۋدجەت قاراجاتىن ۇنەمدەۋگە جانە قازاقستان ءجىو-ءنىڭ ەنەرگيا سىيىمدىلىعىن ازايتۋعا مۇمكىندىك بەرەدى.
