مەكتەپكە دەيىنگى تاربيە مەن وقىتۋ. مەكتەپكە دەيىنگى ءبىلىم بەرۋدىڭ قولجەتىمدىلىگى ارتادى. مەملەكەت-جەكەمەنشىك سەرىكتەستىگى ارقىلى 2019 جىلى 500 بالاباقشا سالىندى. بالالاردىڭ قاۋىپسىزدىگىن قامتاماسىز ەتۋ ءۇشىن 7 مىڭ 678 مەكتەپكە دەيىنگى ءبىلىم بەرۋ ۇيىمى (71,6%) ىشكى جانە سىرتقى باقىلاۋ كامەرالارىمەن جابدىقتالعان. ءبىلىم بەرۋ ورگاندارىنىڭ قاتىسۋىنسىز بالاباقشالارعا جولداما بەرۋ ءراسىمى اۆتوماتتاندىرىلدى. مەكتەپ پەداگوگتەرىنە ۇستەمەاقى قوسۋ ءتارتىبى ەندى مەكتەپكە دەيىنگى ۇيىم قىزمەتكەرلەرىنە دە ەنگىزىلدى.
ورتا ءبىلىم بەرۋ. بيىل 150 مىڭنان اسا پەداگوگ بىلىكتىلىك ساناتتارىن راستاپ, 30-50%-عا دەيىن قوسىمشا اقى الىپ جاتىر. مەكتەپ ديرەكتورلارىنىڭ جالاقىسى ۇستەمەاقى ەسەبىنەن ارتادى. ديرەكتورلاردى جانە ولاردىڭ ورىنباسارلارىن اتتەستاتتاۋدان وتكىزۋ ينستيتۋتى ەنگىزىلەدى, ودان وتكەن باسشىلار جالاقىسىنا 30-دان 100 پايىزعا دەيىن قوسىمشا ۇستەمەاقى الادى. سونىمەن قاتار مۇعالىمدەر قاعازباستىلىقتان ارىلادى, ويتكەنى مينيسترلىك ءبىلىم بەرۋ ۇيىمدارىنداعى قىزمەتكەرلەردىڭ جۇكتەمەسىنە ساي قانداي ەسەپ تولتىراتىنى كورسەتىلگەن بۇيرىقتى ەنگىزدى. ۇبت بيىل سانيتارلىق تالاپتار ساقتالىپ, ءداستۇرلى تۇردە وتەدى. تالاپكەر ءساتتى تاپسىرعاندا ەلەكتروندى سەرتيفيكات الادى. سونداي-اق وسى جىلعى وزگەرىستەرگە ساي تالاپكەرلەرگە كالكۋلياتور قولدانۋعا رۇقسات بەرىلىپ وتىر. دەگەنمەن قۇرىلعىنىڭ تەك تەست تاپسىرۋ ورنىندا بەرىلگەن قاراپايىم ءتۇرىن عانا الىپ كىرە الادى.
كاسىپتىك-تەحنيكالىق وقىتۋ. كوللەدجدەرگە اكادەميالىق ەركىندىك بەرىلەدى. تيپتىك وقۋ باعدارلاماسىنىڭ مازمۇنى كاسىبي ستاندارتقا ساي بولۋى اسا ماڭىزدى. بىزدە كوبىنە وسى سايكەستىك بولماعاندىقتان تۇلەكتەرىمىزدىڭ ءبىلىم-بىلىك داعدىلارى نارىقتاعى جۇمىس بەرۋشىنى قاناعاتتاندىرمايدى. سول سەبەپتى مينيسترلىك كاسىپتىك-تەحنيكالىق وقۋ ورىندارىنا اكادەميالىق ەركىندىك بەرۋدى قولعا الىپ وتىر. «بارشاعا ارنالعان تەگىن كاسىپتىك-تەحنيكالىق ءبىلىم بەرۋ» جوباسىمەن 300 مىڭ ادام, دۋالدى وقىتۋ باعدارلاماسىمەن 55 مىڭ ستۋدەنت قامتىلعان. بيىلدان باستاپ كوللەدج وقىتۋشىلارى دا بالاباقشا مەن مەكتەپ پەداگوگتەرى سەكىلدى اتتەستاتتاۋدان بىلىكتىلىك ساناتتارىن يەلەنىپ, سوعان ساي پايىزدىق ۇستەمەاقى الا الادى.
جوعارى ءبىلىم. مەملەكەت باسشىسى ق.توقاەۆتىڭ ۇلتتىق قوعامدىق سەنىم كەڭەسىنىڭ 3-وتىرىسىندا بەرگەن تاپسىرماسىنا سايكەس, جوو وقىتۋشىلارىنىڭ جالاقىسى كوبەيەدى. پرەزيدەنت تاپسىرماسىمەن بيىلدان باستاپ گرانت قۇنى كوتەرىلەدى. ونىڭ باعاسى 10 جىل بويى وزگەرمەگەن-ءدى. ەندى مينيسترلىك وقىتۋشىلاردىڭ جالاقىسىن كوتەرۋدى مەملەكەتتىك جوو-لارعا مىندەتتەمەك. سونىمەن قاتار ۆەدومستۆو ءبىلىم بەرۋ بويىنشا ساپالى قىزمەت كورسەتپەيتىن جوعارى وقۋ ورىندارىن وڭتايلاندىرۋ بويىنشا جۇمىستى جالعاستىرادى. وسىعان دەيىن بىرنەشە جوو-نىڭ جابىلعانى جانە بىرقاتار ۋنيۆەرسيتەت ءىشىنارا ماماندىقتاردىڭ ليتسەنزياسىنان ايىرىلعانى بەلگىلى.
عىلىم. «قازاقستان عىلىمى» بىرىڭعاي اقپاراتتىق جۇيەسى جاساقتالادى. وندا عىلىمي قىزمەتكەرلەردىڭ دەرەكتەر بازاسى مەن عىلىمي دايەكسوزدىڭ قازاقستاندىق يندەكسى ۇسىنىلادى. جۇيەدە ءاربىر وتاندىق عالىمنىڭ ءوز جاريالانىمدارىنىڭ ءتىزىمى, اياقتالعان جانە ىسكە اسىرىپ جاتقان زەرتتەۋلەرىنىڭ قىسقاشا سيپاتتاماسى بەرىلگەن وزەكتى پروفايلى بولادى. سونداي-اق گرانتتىڭ نەمەسە باعدارلامانىڭ ماقساتى, قارجىلاندىرۋ سوماسى, ناتيجەلەرى, باستاپقى ءوتىنىم مەن ەسەپتەرگە وزگەرىستەر ەنگىزۋ كەزەڭدەرى كورسەتىلگەن, مەملەكەتتەن قارجىلاندىرىلعان بارلىق جوبانىڭ اشىق بازاسى قۇرىلا باستادى. دوكتورانتۋراعا بولىنگەن گرانت سانى بيىل وسىعان دەيىنگى رەكوردتىق كورسەتكىشكە جەتىپ, 2355-ءتى قۇرادى.
