وسىعان وراي 1 ماۋسىمدا اتىراۋ قالاسىندا دا ارمياندىق ءنومىرى بار اۆتوكولىكتەردى تىركەۋ باستالدى.
وبلىستىق پوليتسيا دەپارتامەنتى اكىمشىلىك پوليتسيا باسقارماسىنىڭ باستىعى, پوليتسيا پولكوۆنيگى مىرزالى وتەعاليەۆتىڭ ايتۋىنشا, ارمەنيادان اكەلىنگەن كولىكتەردى تىركەۋ مامانداندىرىلعان حالىققا قىزمەت كورسەتۋ ورتالىعىندا جۇرگىزىلۋدە.
– پوليتسيا قىزمەتكەرلەرىنىڭ تۇرعىندار اراسىندا جۇرگىزگەن ءتۇسىندىرۋ جۇمىستارىنىڭ ناتيجەسىندە ارمەنيا كولىكتەرىن تىركەۋگە قويۋعا تىلەك بىلدىرۋشىلەر كوپتەپ كەلىپ جاتىر. سونىمەن قاتار, ازاماتتار ارمەنيا كولىكتەرىنە قاتىستى ساۋالدارىنا ءتيىستى جاۋاپ الۋدا, - دەدى ول.
ارمەنيادان كولىك اكەلگەندەردىڭ ءبىرى – اتىراۋ قالاسىنىڭ تۇرعىنى نۇربەك باشەنوۆ. ول وتكەن جىلى ارمەنيادان كولىك ساتىپ الىپ كەلگەن.
– بىلتىردان بەرى كولىگىمدى ءوز اتىما تىركەۋدى ويلاپ, الاڭداپ ءجۇر ەدىم. ەندى مىنە, كولىگىمدى قازاقستاندىق تىركەۋگە قويدىم. ارنايى ءنومىر العانىما دا قۋانىپ تۇرمىن. ەندى الاڭسىز جۇرەتىن بولدىم, - دەيدى نۇربەك باشەنوۆ.
