ىزدەۋ جۇمىستارى تاۋلىك بويى جۇرگىزىلگەن. پوليتسيا مەن قۇتقارۋشىلار ىزدەۋ بارىسىندا جولسىز جەرلەر, كۇردەلى جەر بەدەرى, باتپاق, توپىراق بولىپ, پروتسەسس قيىن بولعانىن اتاپ ءوتتى. وسىنداي جولدا تەحنيكا بىرنەشە رەت تۇرىپ قالسا دا, ىزدەۋ جۇمىستارى ءبىر ساتكە دە توقتاماعان. وپەراتسياعا شارۋاشىلىق يەسى دە قاتىسقان.
قولايسىز اۋا رايى مەن تابيعي جاعدايلارعا قاراماستان, پوليتسيا قىزمەتكەرلەرى مەن قۇتقارۋشىلار تاباندىلىق تانىتىپ, اۋماقتى مۇقيات تەكسەرىپ, بارلىق ىقتيمال باعىتتى قارادى.
ىزدەۋدىڭ 5-كۇنى تاڭسارىدە جوعالعان ەر ادام ءدىن امان تابىلدى. بەلگىلى بولعانداي, جانۋاردى تۇرعىزۋعا كومەكتەسپەك بولعان ساتتە ەر ادام اتتىڭ استىندا قالىپ, اياعىن سىندىرىپ العان. جاراقاتىنا بايلانىستى وزدىگىنەن قوزعالا الماي, وسى ۋاقىت بويى دالادا جاتقان.
تابىلعاننان كەيىن وعان سول جەردە العاشقى مەديتسينالىق كومەك كورسەتىلدى.
قۇتقارۋشىلار اداسقان ازاماتتى ىزدەپ تاپتى
«بەس كۇن بويى ءۇمىت پەن كۇماننىڭ اراسىندا بولدىم. اينالام تىم-تىرىس ەدى, قوزعالا المادىم, ءار مينۋت ساعاتتاي كورىندى. بىراق مەنى ىزدەپ جاتقانىن ءبىلدىم. تاڭ اتا الىستان ادامداردىڭ داۋسىن ەستىگەندە, ءۇمىتىم قايتا وياندى. سول ساتتە ءومىردىڭ قانشالىقتى قىمبات ەكەنىن ءتۇسىندىم. مەنى تاپقان پوليتسەيلەر مەن قۇتقارۋشىلارعا شەكسىز ريزامىن. ولاردىڭ تاباندىلىعى مەن ادامگەرشىلىگى مەنىڭ ءومىرىمدى ساقتاپ قالدى», دەدى قۇتقارىلعان ازامات.
