كوروناۆيرۋستىڭ نەگىزگى كولەمى, ياعني 89 پايىزى ورال قالاسىندا بولعانىمەن, 7 اۋداندا ىندەت وشاعى تىركەلدى. اقجايىق اۋدانىندا – 5, ءبورلى اۋدانىندا – 7, جانىبەكتە – 2, بايتەرەكتە – 8, سىرىم اۋدانىندا – 4, تاسقالادا – 16, تەرەكتىدە – 7 ادام اۋىرعان. ورال قالاسىندا - 408 جاعداي تىركەلدى.
- راس, سوڭعى ءۇش كۇندە ىندەت جۇقتىرعانداردىڭ سانى كۇرت ءوسىپ كەتتى. ويتكەنى ءبىز قارىم-قاتىناستا بولعان ادامداردىڭ ءبارىن بەلسەندى تەكسەرىپ جاتىرمىز. اۋرۋ جۇقتىرعانداردىڭ 57%-ى, ياعني 265 ادام – سىرتتان كەلگەن. 182 وقيعا رەسەي فەدەراتسياسىنىڭ سامارا مەن ساراتوۆ باعىتىنداعى شەكارادان وتۋشىلەردەن تىركەلدى. سونداي-اق سوڭعى كەزدە اتىراۋ وبلىسىنداعى تەڭىز كەشەنىندە قىزمەت ەتەتىن ءبىزدىڭ ءوڭىردىڭ تۇرعىندارى ەلگە قايتتى, ولاردىڭ ىشىندە 70 ادام اۋرۋ بولىپ شىقتى. اۋرۋى اشىق بايقالماعان كەي جۇمىسشىلار ءوز ۇيىنە جىبەرىلگەن كەزدە كارانتيندىك رەجيمدى ساقتاماي, وتباسى مۇشەلەرىنە جۇقتىرعانى انىقتالدى. مىنە, وسىنداي 4 ادامنان 17 ادامعا كوروناۆيرۋس جۇقتى, - دەيدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسى مۇحامعالي ارىسپاەۆ.
بۇدان بۇرىن حابارلاعانىمىزداي, 25 مامىر كۇنى وڭىردەگى كارانتين رەجىمى 15 ماۋسىمعا دەيىن ۇزارتىلدى.
- ءبىز ماۋسىمنىڭ 20-سىنان باستاپ كەيبىر نىسانداردىڭ جۇمىسىن جانداندىرۋ ءۇشىن كارانتين رەجىمىن جەڭىلدەتكەن بولاتىنبىز. مىسالى, ورال قالاسىنداعى ساياباقتار, اۆتوبۋس باعىتتارىن اشىلدى, كەيبىر جۇمىس نىساندارى, ادۆوكاتتىق كەڭسەلەر, ەكىنشى دەڭگەيدەگى بانكتەر كەيبىر شەكتەۋلەرمەن جۇمىسىنا كىرىستى. اۋماعى 2 مىڭ شارشى مەترگە دەيىنگى ساۋدا ورىندارى مەن بازارلار اشىلدى. اشىق الاڭداعى جازعى كافەلەر اشىلدى. بىراق قازىر قوعامدىق كولىكتەردە, بازارلاردا ەل-جۇرتتىڭ قاۋىپسىزدىك شاراسىن ۇمىتىپ, بەتپەردە تاقپاي, ارا قاشىقتىقتى ساقتاماي جۇرگەنىن بايقاپ وتىرمىز. ەگەر بۇلاي بولا بەرسە, كەيبىر اۆتوبۋس مارشرۋتتارىن, اۋدا ورىندارىن قايتا جاۋىپ تاستايتىنىمىزدى ولاردىڭ باسشىلارىنا ەسكەرتتىك, - دەيدى م.ارىسپاەۆ.
كوپ ادام جينالاتىن جيىننىڭ ءبىرى – اۋىلداعى جانازا بولىپ تۇر. باس سانيتار دارىگەردىڭ ايتۋىنشا, شىڭعىرلاۋ جانە سىرىم اۋدانىندا وسىنداي وقيعا تىركەلگەن.
- سىرىم اۋدانىندا ءبىر ادام سالاقتىعىنىڭ, جاۋاپسىزدىعىنىڭ كەسىرىنەن ءوز وتباسىنداعى ەكى ادامعا, ءبىر اۋرۋحانا قىزمەتكەرىنە ۆيرۋس جۇقتىردى. قازىر بۇكىل اۋدان اۋماعىندا كارانتين رەجىمى جاريالاندى. شىڭعىرلاۋ اۋدانىنداعى وقيعانى دا قازىر ءبىزدىڭ ماماندار تەكسەرىپ جاتىر. ول اۋداندا ىندەت جۇقتىرعان ءبىر ادام تىركەلگەن. سوندىقتان, ءبىردىڭ كەسىرى مىڭعا تيمەسىن دەسەك, ساقتىق شارالارىن ساقتايىق, كوپ ادام جينالاتىن جەرگە بارمايىق. جالپى, كارانتين كەزىندەگى ەڭ ءبىرىنشى شارت – اراقاشىقتىقتى ۇستاۋ. كوپشىلىك جەرگە بارماي كەرەك. اۋىزاشارعا كوپ جينالدى. مەنىڭ سۇرايتىنىم, ۇلكەن جيىندارعا بارماڭىز, ءوزىڭىز كوپ ادامدى جيناپ, شاقىرماڭىز. ءوزىمىزدى ءوزىمىز ساقتايىق. سوندا عانا قالىپتى ومىرگە تەزىرەك ورالامىز, - دەيدى مۇحامعالي ارىسپاەۆ.
باتىس قازاقستان
