تاراز قالاسىندا 49 وقيعا انىقتالعان. ونىڭ 48-ءى ناۋقاستارمەن بايلانىستا بولعان. ءبىر جاعداي تاراز قالاسىنىڭ 69 جاسار تۇرعىنىنان انىقتالىپ, ول جەدەل رەسپيراتورلىق ۆيرۋستىق ينفەكتسيا بەلگىلەرىمەن جۇقپالى ستاتسيونارعا جاتقىزىلعان. سونداي-اق ناۋقاستاردىڭ قاتارىندا 1 جاستان 12 جاسقا دەيىنگى 6 كامەلەتكە تولماعان بالا بار. اتاپ ايتساق, زەرتحانالىق زەرتتەۋلەر ناتيجەلەرى بويىنشا كوروناۆيرۋس اۋرۋى ءبىر وتباسىنىڭ ءتورت مۇشەسىندە, ونىڭ ىشىندە 2005, 2008 جانە 2016 جىلى تۋعان بالالاردا راستالعان. ولار دا وسى ۋاقىتقا دەيىن دەرت جۇقتىرعان تۋىسىمەن بايلانىستا بولعان.
سونىمەن قاتار ت.رىسقۇلوۆ اۋدانىندا 2 جاعداي انىقتالدى. قاۋىپتى ىندەت 1991 جىلى تۋعان ەر ادامدا جانە 1993 جىلى تۋعان جۇكتى ايەلدەن تابىلعان. ەكەۋى دە بۇرىن اۋىرعان ناۋقاسپەن بايلانىستا بولعان تۇلعا رەتىندە وقشاۋلانعان.
جامبىل وبلىستىق اكىمدىگىنىڭ مالىمەتىنشە, بارلىق ناۋقاستار جۇقپالى اۋرۋلار اۋرۋحاناسىنا جەتكىزىلگەن. بۇگىندە ولارمەن بايلانىستا بولعان تۇلعالار انىقتالىپ, كارانتينگە الىنعان. وشاقتاردا دەزينفەكتسيالىق وڭدەۋ شارالارى جۇرگىزىلگەن. بۇگىندە جامبىل وبلىسىندا كوروناۆيرۋس ىندەتىن جۇقتىرۋدىڭ 343 جاعدايى تىركەلگەن بولسا, ولاردىڭ 173-ءى ساۋىعىپ, دارىگەرلەردىڭ باقىلاۋىنداعى ءۇي كارانتينىنە شىعارىلعان.
جامبىل وبلىسى
