ومىرزاق شوكەەۆتىڭ حابارلاۋىنشا, تۇركىستان وبلىسىندا اۋىل شارۋاشىلىعى ماقساتىندا پايدالانىلاتىن ەگىستىك جەرلەردىڭ كولەمى 857,2 مىڭ گا قۇرايدى. قازىرگى كەزدە كوكتەمگى دالا جۇمىستارىنىڭ 92%-ى اياقتالعان.
«ەگىستىكتى ءارتاراپتاندىرۋ باعىتىنا سايكەس, كارتوپ, كوكونىس, باقشا داقىلدارىنىڭ القابى وتكەن جىلمەن سالىستىرعاندا 3,2 مىڭ گا ارتىپ, 122 مىڭ گا قۇرادى. مال ازىعى داقىلدارى 11,6 مىڭ گا ارتىپ, 213 مىڭ گا قۇرادى», — دەدى ءو. شوكەەۆ.
وبلىستا ماساقتى داقىلدار ەگىستىگى وتكەن جىلمەن سالىستىرعاندا 4,8 مىڭ گا ازايىپ, 213 مىڭ گا قۇراعان. ماقتا داقىلىنىڭ ەگىستىگى 12,7 مىڭ گا ازايتىلدى, 118 مىڭ گا جەرگە ەگىلدى. ال مايلى داقىلدار وتكەن جىلعى دەڭگەيدە - 91,4 مىڭ گا القاپقا ەگىلگەن.
تۇركىستان وبلىسىندا اۋىل شارۋاشىلىعىنداعى ەڭبەك ونىمدىلىگىن ارتتىرۋ ءۇشىن 3 نەگىزگى باعىتتاعى جۇمىستار قولعا الىنعان. شارۋا قوجالىقتارى 3 كووپەراتيۆكە بىرىكتىرىلىپ, تەحنيكامەن قامتاماسىز ەتىلدى, ونىڭ ىشىندە 11 مىڭ گا جاڭبىرلاتىپ سۋارۋ تەحنولوگياسىن ەنگىزىلدى. يتالياندىق تەحنولوگيامەن 1 200 باسقا ارنالعان تاۋارلى-ءسۇت فەرماسى جانە اۆستراليالىق تەحنولوگيامەن 10 مىڭ باسقا ارنالعان ءىرى قارا مال بورداقىلاۋ الاڭى قۇرىلدى. سونىمەن قاتار كۇركەتاۋىق فابريكاسىن جەم-شوپپەن قامتاماسىز ەتۋ جوباسى بار.
«11 مىڭ گا جەرگە 10-15 كووپەراتيۆ قۇرۋ بويىنشا جوسپارىمىز بار, وسى جۇمىستار جۇرگىزىلۋدە», — دەدى ءوڭىر باسشىسى.
ال كووپەراتيۆتەرگە بىرىكپەيتىن 2-3 گا جەرى بار اگروقۇرىلىمدار ءۇشىن ءبىر القاپتان جىلىنا 2-3 رەت ءونىم الۋ جوباسىن ەنگىزىلۋدە.
«بۇل جوبانىڭ تيىمدىلىگى 1 گا القاپتان جىلىنا 6 ملن تەڭگەدەن استام تابىس تابۋعا مۇمكىندىك بەرىپ وتىر», — دەدى ءو. شوكەەۆ.
وبلىس باسشىسىنىڭ ايتۋىنشا, بۇدان وزگە جەكە قوسالقى شارۋاشىلىقتاردا ء(ۇي اۋلاسىندا) تامشىلاتىپ سۋارۋ تەحنولوگياسىن ەنگىزۋ ارقىلى ەرتە پىسەتىن كوكونىس, باقشا ونىمدەرىن ءوندىرۋ جولعا قويىلۋدا. ماسەلەن, 10 سوتىق جەرگە تامشىلاتىپ سۋارۋعا جۇمسالاتىن جانە اگروتەحنيكالىق شىعىندارىن قوسا ەسەپتەگەندە, 462 مىڭ تەڭگە قارجى جۇمساپ, 850 مىڭ تەڭگە تابىس تابۋعا بولادى.
«وسى ءۇش باعىتتا جۇمىس ىستەسەك, ەڭبەك ونىمدىلىگىن 2-3 ەسە ارتتىرۋعا مۇمكىندىگىمىز بار», - دەدى ول.
سولتۇستىك قازاقستان وبلىسىنىڭ اكىمى قۇمار اقساقالوۆتىڭ ايتۋىنشا, بيىل وڭىردە ەگىس القابىنىڭ كولەمى 4,2 ملن گەكتاردى قۇرادى. ءداندى داقىلدار 2,9 ملن گا ەگىلەتىن بولادى. ءارتاراپتاندىرۋ اياسىندا مايلى داقىلدار 955 مىڭ گەكتار جەرگە (بارلىق ەگىس القابىنىڭ 23%) ەگىلەدى.
«بۇگىندە كوكتەمگى ەگىس 2,5 ملن گا القاپتا نەمەسە 62,5% جۇرگىزىلدى. وبلىس مينەرالدىق تىڭايتقىشتاردى ەنگىزۋدە رەسپۋبليكا بويىنشا الدا كەلەدى. بيىل 130 مىڭ توننا تىڭايتقىش ساتىپ الۋدى جوسپارلاپ وتىرمىز (وتكەن جىلمەن سالىستىرعاندا 15% ارتىق), ول 2,3 ملن گا القاپقا پايدالانىلاتىن بولادى», - دەدى وبلىس باسشىسى.
ونىڭ ايتۋىنشا, سوڭعى ەكى جىلدا وڭىردە سۇيىق تىڭايتقىشتاردى قولدانۋ ءوز تيىمدىلىگىن كورسەتكەن. وبلىستاعى 6 شاعىن زاۋىتتا وندىرىلگەن سۇيىق تىڭايتقىش 500 مىڭ گا القاپتا قولدانىلىپ, ناتيجەسىندە استىقتىڭ شىعىمدىلىعى ورتا ەسەپپەن 3 تسەنتنەرگە ءوستى.
«بيىل ءتورت ايدا 20 ملرد تەڭگەگە جاڭا تەحنيكا ساتىپ الىندى, بۇل وتكەن جىلمەن سالىستىرعاندا 7 ملرد تەڭگەگە ارتىق. مەملەكەتتىك قولداۋدىڭ ارقاسىندا بيىل بارلىعى 40 ملرد تەڭگەگە 2 مىڭنان استام تەحنيكا الۋدى جوسپارلاپ وتىرمىز», - دەدى ق. اقساقالوۆ.
وبلىستا جىل سايىن بيداي وڭدەۋ كولەمى ارتىپ كەلەدى. وتكەن جىلى پايدالانۋعا بەرىلگەن قۇراما جەم زاۋىتىنىڭ ەسەبىنەن بيىل بۇل كورسەتكىش 47% جەتەدى دەپ كۇتىلۋدە. بۇدان بولەك, ۇستىمىزدەگى جىلى وسىنداي تاعى ءبىر زاۋىتتىڭ قۇرىلىسى باستالدى.
«وسىنداي جوبالاردىڭ ناتيجەسىندە كەلەسى جىلى بيداي وڭدەۋ كورسەتكىشى 65% دەيىن ارتادى», - دەپ تۇيىندەدى ءوڭىر باسشىسى.
قوستاناي وبلىسىنىڭ اكىمى ارحيمەد مۇحامبەتوۆتىڭ مالىمەتى بويىنشا, بۇگىنگى تاڭدا وبلىستا ءداندى داقىلدار ەگىلگەن ەگىس كولەمى 2,5 ملن گا (66%), مايلى داقىلدار ەگىلگەن القاپ 394 گا (56%) قۇرادى. ەگىس ناۋقانىنا بارلىق تەحنيكا جۇمىلدىرىلىپ, 2-3 اۋىسىمدىق جۇمىس ۇيىمداستىرىلدى, جانار-جاعارمايمەن تولىق قامتاماسىز ەتىلدى.
«اگرارلىق نەسيە كورپوراتسياسى» اق ارقىلى شارۋاشىلىقتار 21,4 ملرد تەڭگە نەسيە قاراجاتىن الدى. اۋىل شارۋاشىلىعى ونىمدەرىن فورۆاردتىق ساتىپ الۋ بويىنشا 4 ملرد تەڭگە سوماعا ءوتىنىم بەرىلىپ, 2,8 ملرد تەڭگەگە بەكىتىلدى», — دەدى ا. مۇحامبەتوۆ.
قاراعاندى وبلىسىنىڭ اكىمى جەڭىس قاسىمبەك وڭىردە اۋىل شارۋاشىلىعى سالاسىنىڭ دامۋ جاعدايى تۋرالى ايتىپ بەردى. ونىڭ حابارلاۋىنشا, بيىلعى جىلى اۋىل شارۋاشىلىعىنا 23,3 ملرد تەڭگە ينۆەستيتسيا تارتۋ جوسپارلانۋدا, بىلتىرعى جىلمەن سالىستىرعاندا ءوسىم 120% قۇرايدى.
وبلىس بويىنشا اۋىل شارۋاشىلىعى تاۋارلارىن وندىرۋشىلەرگە 13,6 ملن گا القاپ بەكىتىلگەن. قازىرگى ۋاقىتتا 12,1 ملن گا القاپ پايدالانىلادى.
«جەردى ءتيىمسىز پايدالانۋ فاكتىلەرى انىقتالىپ, 1,1 ملن گا جايىلىم القاپتارىن پايدالانباۋ بويىنشا شارالار قابىلداندى. ونىڭ 225 مىڭ گا مەملەكەتتىڭ جەر قورىنا قايتارىلدى. 545 مىڭ گا جەر اۋىل شارۋاشىلىعى اينالىمىنا بەرىلدى. 240 مىڭ گا اۋماقتا اكىمشىلىك قۇقىق بۇزۋشىلىق كودەكسى بويىنشا شارالار قابىلداندى», — دەدى ج. قاسىمبەك.
وبلىستا 2019 جىلى 360 مىڭ گا جايىلىم سۋلاندىرىلعان, بيىل 375 مىڭ گا جەردى سۋلاندىرۋ جوسپارلانعان.
«توزعان جانە قۇنارسىز جايىلىم القاپتارىن قالپىنا كەلتىرۋ ءۇشىن پيلوتتىق جوبا جۇزەگە اسىرىلۋدا. بۇل – تۇرعىنداردىڭ مالىن جايۋعا ارنالعان جەرلەر. بيىلعى جىلى بيۋدجەتتەن ءتيىستى قاراجات ءبولىندى», — دەپ ناقتىلادى وبلىس باسشىسى.
اۋىل شارۋاشىلىعى قۇرىلىمىندا مال شارۋاشىلىعى ونىمدەرىنىڭ كولەمى 59% قۇراعان. 2019 جىلى بۇل سالادا 200 ملرد تەڭگەگە ءونىم وندىرىلگەن, بيىل ءوسىمدى 211 ملرد تەڭگەگە دەيىن جەتكىزۋ جوسپارلانىپ وتىر. مال شارۋاشىلىعىمەن وڭىردە 5096 شارۋاشىلىق اينالىسادى, ونىڭ ىشىندە 15 بورداقىلاۋ الاڭى جۇمىس ىستەيدى.
«مەملەكەتتىك قولداۋدىڭ ناتيجەسىندە شەتەلدەن جانە ەلىمىزدەن اسىل تۇقىمدى مال باسى ساتىپ الىنۋدا. بيىلعى جىلى 5 مىڭ باس سيىر مەن 17 مىڭ باس قوي ساتىپ الۋ جوسپارلانىپ وتىر. 2020-2023 جىلدار ارالىعىندا قۇنى 20 ملرد تەڭگەنى قۇرايتىن قوي ەتىن قايتا وڭدەۋمەن اينالىساتىن ءىرى قوي فەرماسىن قۇرۋ جونىندەگى ينۆەستيتسيالىق جوبا ىسكە اسىرىلۋدا», — دەدى ج. قاسىمبەك.
«قاراپايىم زاتتار ەكونوميكاسى» باعدارلاماسىنىڭ قارجىسى جانە «سارىارقا» اكك ارقىلى وبلىستىق بيۋدجەت ەسەبىنەن 5 ملرد تەڭگە ءبولىنىپ, 3 ءسۇت-تاۋارلىق فەرماسىن قۇرۋ ماسەلەسى قارالۋدا. ولاردىڭ جالپى ءوندىرىس كولەمى جىلىنا 19 مىڭ توننانى قۇرايتىن بولادى.
«جالپى, «قازاگرو» اق ينستيتۋتتارى ارقىلى 20 ملرد تەڭگەگە 79 جوبا ىسكە اسىرىلادى», — دەپ تۇيىندەدى ءوڭىر باسشىسى.
