زاڭنامانى جەتىلدىرۋ, اتاپ ايتقاندا, كەشە مەملەكەت باسشىسى قول قويعان «قازاقستان رەسپۋبليكاسىنداعى بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭنىڭ قابىلدانۋى ەلدىڭ قوعامدىق-ساياسي ومىرىندە ماڭىزدى ءرول اتقارادى. ياعني ميتينگتەردىڭ جاڭا مادەنيەتىن قالىپتاستىرۋعا ىقپال ەتىپ, قوعامدىق تارتىپكە زيان كەلتىرمەي قازاقستاندىقتاردىڭ ازاماتتىق بەلسەندىلىگىن تانىتۋى ءۇشىن جاعداي جاسايدى.
جاڭا زاڭ تۇجىرىمدامالىق اپپاراتتى ناقتىلاپ, نەگىزگى ۇعىمداردى رەتتەيتىنىن اتاپ وتكەن ءجون. بۇل زاڭنىڭ دۇرىس تۇسىندىرىلۋىنە مۇمكىندىك بەرەدى. ءبىر ايتا كەتەرلىگى, 1995 جىلعى «قازاقستان رەسپۋبليكاسىندا بەيبىت جينالىستار, ميتينگىلەر, شەرۋلەر, پيكەتتەر مەن دەمونستراتسيالار ۇيىمداستىرۋ جانە وتكىزۋ تۋرالى» زاڭدا تۇجىرىمدامالىق اپپارات بولعان جوق.
ەگەر بۇرىنعى زاڭ بەيبىت جينالىستاردى ۇيىمداستىرۋدى جانە وتكىزۋدى الدىن الا رۇقسات الۋ نەگىزىندە مۇمكىن دەپ تانىسا, مەملەكەت باسشىسى قول قويعان جاڭا زاڭ بەيبىت جينالىستاردى ۇيىمداستىرۋدىڭ جانە وتكىزۋدىڭ حابارلامالىق جانە ءوتىنىش بەرۋ جۇيەسىن قاراستىرادى. سوڭعى جاڭارتۋلارعا سايكەس, پيكەتتەر, جينالىستار, ميتينگتەردى ۇيىمداستىرۋ جانە وتكىزۋدە حابارلامالار جۇيەسى, ال دەمونستراتسيالار, شەرۋلەر ۇيىمداستىرىلعان جاعدايدا ءوتىنىش بەرۋ جۇيەسى ەنگىزىلدى.
پرەزيدەنت قول قويعان زاڭدا بەيبىت جينالىستاردى ۇيىمداستىرۋشى مەن قاتىسۋشىنىڭ قۇقىقتارى مەن مىندەتتەرى تولىققاندى قاراستىرىلعان. ۇيىمداستىرۋشى نەمەسە ۇيىمداستىرۋشىنىڭ وكىلى بولماعان جاعدايدا بەيبىت جينالىستار وتكىزۋگە جول بەرىلمەيدى.
جالپى العاندا, زاڭنىڭ قابىلدانۋى ۇلتتىق قوعامدىق سەنىم كەڭەسىندە كوتەرىلىپ جانە ەل پرەزيدەنتىنىڭ قولداۋىمەن جۇزەگە اسىرىلعان ساياسي رەفورمالار پاكەتىندەگى ماڭىزدى تاراۋلاردىڭ ءبىرى بولدى.
جاننا كاريموۆا,
پرەزيدەنت جانىنداعى قسزي-ءدىڭ الەۋمەتتىك-ەكونوميكالىق زەرتتەۋلەر ءبولىمىنىڭ باسشىسى
