ادەتتە مۇنداي ماسەلەلەر كوتەرىلگەندە, اۋەلى ويىمىزعا مەملەكەتتىك ورگاندار ورالادى. ولاردىڭ مىندەتى – جاسوسپىرىمدەردىڭ قۇقىعىن قورعاۋ, ءتۇرلى ماسەلەلەردى بولدىرماۋ. قۇقىق قورعاۋ مەكەمەلەرىمەن بىرگە اتالعان ماسەلەلەر توڭىرەگىندە ءتۇرلى دەڭگەيدەگى اكىمدىكتەردىڭ جانىنان قۇرىلعان كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى كوميسسيا دا جۇمىس ىستەيدى.
جۋىردا جامبىل وبلىسى اكىمىنىڭ ورىنباسارى ەرجان جىلقىباەۆتىڭ قاتىسۋىمەن وبلىس اكىمدىگى جانىنداعى اتالعان كوميسسيانىڭ وتىرىسىندا بىرقاتار ماسەلەلەر قارالعان بولاتىن. وبلىستا وسى جىلدىڭ ءتورت ايىندا جاسوسپىرىمدەر اراسىنداعى قىلمىس 49,2 پايىزعا تومەندەگەن. ەسەپتى كەزەڭدە 17 ۇرلىق, 4 توناۋ, 3 بۇزاقىلىق, 2 دەنەگە جاراقات سالۋ جانە
1 اۆتوكولىك ۇرلاۋ, سونداي-اق 4 ءتۇرلى سيپاتتاعى قىلمىستىق دەرەك تىركەلگەن. اتالعان قىلمىستاردىڭ دەنى تاراز قالاسى, شۋ جانە قورداي اۋداندارىندا ورىن العان. ءبىر وكىنىشتىسى, قىلمىسقا مەكتەپ وقۋشىلارى, كوللەدج ستۋدەنتتەرى قاتىسقان. جامبىل وبلىستىق كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ حاتشىسى باقىت جاقسىلىقوۆانىڭ ايتۋىنشا, جامبىل پوليتەحنيكالىق جوعارى كوللەدجىنىڭ ەكى ستۋدەنتى توبەلەسكەن. بىراق توبەلەستەن سوڭ الگى ەكى بالا ويىن كەزىندە قۇلاپ قالدىق دەگەن سىلتاۋ ايتقان. الايدا سول ەكى ستۋدەنتتىڭ ءبىرى وتكەن جىلى بولعان توناۋ فاكتىسى بويىنشا تاراز قالالىق پوليتسيا باسقارماسىندا ەسەپتە تۇر ەكەن. ال توبەلەسكەن بالالاردىڭ ەكىنشىسى 2019-2020 وقۋ جىلىنىڭ ءبىرىنشى سەمەسترىندە 126 ساباققا قاتىسپاعان. بىراق تاراز قالالىق اكىمدىگى جانىنداعى كامەلەتكە تولماعاندار ىستەرى جانە ولاردىڭ قۇقىقتارىن قورعاۋ كوميسسياسى بۇل تۋرالى ەشقانداي اقپارات بەرمەگەن. ءتىپتى جاسوسپىرىمدەردىڭ اراسىنداعى ءتارتىپ بۇزۋشىلىق ماسەلەسى قالالىق كوميسسيا وتىرىسىندا دا قارالماعان. ءسويتىپ ەكى بالانىڭ اراسىنداعى توبەلەستى اتالعان كوميسسيا جاسىرعان. سونىمەن قاتار بۇل ەكى بالانىڭ دا تولىق ەمەس وتباسىندا تاربيەلەنىپ جاتقاندىعى انىقتالعان. جالپى, كامەلەتكە تولماعانداردىڭ قۇقىعىن قورعايتىن كوميسسيا ورىن العان وسىنداي نارسەلەردى تەكسەرىپ, ءتيىستى ورىندارعا جولدايتىن قۇرىلىم بولۋى كەرەك. بۇل ەكى بالانىڭ اراسىنداعى جاي كەلىسپەۋشىلىك, توبەلەس بولعانىمەن, مۇنىڭ ءوزى دە قىلمىسقا اپاراتىن جول ەكەنىن ۇمىتپاعان ءجون. تاعى ءبىر ايتا كەتەرلىگى, ءاربىر ءجاسوسپىرىم ءوز ومىرىنە ءوزى جاۋاپتى ەكەنىن بىلگەنى, تۇيسىنگەنى ابزال.
نەگىزىنەن جاسوسپىرىمدەردىڭ قۇقىعىن قورعاۋ ماسەلەسىندە وبلىس ورتالىعىنان بولەك, ءوڭىردىڭ بىرقاتار اۋداندارىندا دا كەمشىلىكتەر انىقتالعان. جامبىل وبلىستىق كامەلەتكە تولماعاندار ىستەرى جانە ولاردىڭ قۇقىقتارىن قورعاۋ جونىندەگى كوميسسيانىڭ حاتتاماسىمەن تالاس اۋدانىنىڭ اكىمى باقىت قازانباسوۆقا بيىلعى 10 ناۋرىز كۇنى اۋداندىق اتالعان كوميسسيانىڭ كەمشىلىكتەرى كورسەتىلىپ, ۇسىنىم جولدانعان ەكەن. بۇل ۇسىنىمدا تالاس اۋداندىق ءبىلىم ءبولىمىنىڭ دە جۇمىسى سىنعا الىنعان. اۋدانداعى بىرقاتار ءبىلىم وشاقتارىندا تاربيە جانە قۇقىقتىق تاربيە جۇمىستارى السىرەگەن. سونداي-اق تامدى اۋىلىنداعى قويگەلدى اتىنداعى ورتا مەكتەپتىڭ ەكى وقۋشىسى ءوز-وزىنە قول جۇمساۋعا ارەكەت ەتكەن. الايدا وبلىستىق كوميسسيانىڭ مالىمەتىنشە, اۋدان باسشىسى جاۋاپتى تۇلعالارعا ەشبىر شارا قولدانباعان. سول سياقتى, قورداي اۋدانىندا دا جاسوسپىرىمدەردىڭ قۇقىعىن قورعاۋعا بايلانىستى ماسەلەلەر بار بولىپ شىقتى. وسى جىلعى 20 ساۋىردە قورداي اۋداندىق اۋرۋحاناسىنا 17 جاستاعى قىز ءوزىنىڭ جۇكتى بولىپ قالعانىن ەسكەرتكەن (7 اپتالىق جۇكتىلىك). سونداي-اق ول ءوزىن قورداي اۋىلىنىڭ تۇرعىنى زورلاعانىن ايتىپ ارىزدانعان. سول كۇنى اتالعان دەرەك بويىنشا قىلمىستىق ءىس قوزعالىپ, كۇدىكتى دە ۇستالادى. بىراق جاپا شەككەن قىزدى تەكسەرگەن اۋداندىق اۋرۋحانا دارىگەرى پوليتسياعا حابار بەرمەي, اۋدان ورتالىعى قورداي اۋىلىنداعى №3 ورتا مەكتەپتىڭ ديرەكتورىنا حابارلاسادى. بۇل مەكتەپتىڭ ديرەكتورى دا بۇل وقيعانى ءتيىستى ورىندارعا جەتكىزبەي, الگى قىزدى كەشكى مەكتەپكە اۋىستىرىپ جىبەرىپتى. بۇگىنگى تاڭدا اتالعان فاكتىلەر بويىنشا قىلمىستىق تەرگەۋ امالدارى جۇرگىزىلۋدە.
جاسوسپىرىمدەردىڭ قۇقىعىن قورعاۋ – بۇگىنگى قوعامداعى كۇردەلى ماسەلەنىڭ ءبىرى. دەگەنمەن ءتيىستى ورىندارعا مىندەت ارتىپ قويماي, ءبىرىنشى كەزەكتە ءاربىر ادام ءوزىنىڭ قۇقىعىن قورعاي ءبىلۋى كەرەك دەر ەدىك. ەجەلدەن قانىمىزعا سىڭگەن ۇيات, يمان قاعيدالارىن وتباسىنان, ودان كەيىن مەكتەپ قابىرعاسىنان جەتە ءتۇيسىنىپ شىققان بالانىڭ ەرتەڭ ءوز-ءوزىن قورعاي الاتىن ازامات بولاتىنىنا سەنۋگە بولادى. جالپى, قوعامدا جاستىق البىرتتىقپەن قاتەلەسۋدىڭ, «ويناپ ءجۇرىپ وت باسۋدىڭ» ماسەلەسى كۇن ساناپ كۇردەلەنىپ بارا جاتقانداي. ال ورىن العان بارلىق جاعدايدى دەر كەزىندە تەكسەرىپ, ونى ءتيىستى ورىندارعا جەتكىزۋ دە جاسوسپىرىمدەردىڭ قۇقىعىن قورعاۋعا كومەكتەسەتىن قادام. ورىن العان جاعدايدى جاسىرىپ, جابۋدىڭ سوڭىنىڭ جاقسىلىققا اپارمايتىنى تاعى انىق.
جامبىل وبلىسى
