ايماقتار • 25 مامىر، 2020

سولتۇستىك قازاقستان: اۋىز سۋ ماسەلەسى وڭ شەشىلەدى

23 رەت كورسەتىلدى

 

سولتۇستىك قازاقستاندا تۇرمىستىق سىبايلاس جەمقورلىقتى ازايتۋ، سىبايلاستىققا قارسى كوزقاراس تۋدىرۋ، ازاماتتاردىڭ مەملەكەتتىك بيلىك ينستيتۋتتارىنا دەگەن سەنىمدىلىگىن ارتتىرۋ ماقساتىمەن «قىزىلجار-ادالدىق الاڭى» ءوفيسىنىڭ جۇمىس ىستەيتىنىن بۇرىن ايتقان بولاتىنبىز. سول ۇيىمعا ەسىل اۋدانىنىڭ التى اۋىلىنان اۋىز سۋدىڭ تاپشىلىعى جونىندە شاعىم تۇسكەن بولاتىن. بۇلاردىڭ قاتارىندا بۇلاق، تاۋاعاش، سارمان سياقتى ىرگەلى قازاق اۋىلدارى دا بار. سونىڭ ىشىندە تاۋاعاش اۋىلىنا قۇبىر جەتكىزىلگەنىمەن ءالى كۇنگە سۋ بارماي تۇرعان. وسى قاتاردا اۋدان ورتالىعى ياۆلەنكا سەلوسىنىڭ دا بولعانى اۋىز سۋ ماسەلەسىنىڭ بۇل اۋدانداعى جايى بارىنشا وتكىر ەكەندىگىن كورسەتىپ تۇر.

اۋدان اكىمى التىنبەك ابدۋللاەۆ «قىزىلجار-ادالدىق الاڭىندا» بۇل ماسەلەلەر «جۇمىسپەن قامتۋدىڭ 2020-2021 جىلدارعا ارنالعان جول كارتاسى» مەن «اۋىل – ەل بەسىگى» باعدارلاماسىنىڭ شەڭبەرىندە شەشىلەتىن بولىپ، 34 جوبا بويىنشا 2،9 ملرد تەڭگە بيۋدجەت قاراجاتى بولىنگەنىن جەتكىزدى. سونىڭ ىشىندە باسقا دا باسىمدى ينفراقۇرىلىمدىق جوبالار بار. «سۋمەن قامتۋ جۇيەلەرىنە اعىمداعى جوندەۋ جۇمىستارىن جۇرگىزۋ بويىنشا 4 جوبا ىسكە اسىرىلىپ، وعان 69،9 ملن. تەڭگە ءبولىندى. بۇل اۋداننىڭ 3 مىڭنان ارتىق تۇرعىنىن سۋمەن قامتاماسىز ەتۋگە باعىتتالعان جوبا. سونىڭ ىشىندە اۋدان ورتالىعى ياۆلەنكا سەلوسىنىڭ سۋمەن قامتۋ جۇيەسىن جوندەۋگە 19،2 ملن تەڭگە ءبولىندى. بۇل جۇمىس مامىردىڭ 5-نەن باستالىپ تا كەتتى، اياقتالۋى تامىزدىڭ 30-ندا بولادى دەپ جوسپارلاپ وتىرمىز. سونىمەن قاتار يلينكا، ۆولوشينكا اۋىلدارىنىڭ سۋ جۇيەلەرىن جوندەۋگە تيىسىنشە 20،3 جانە 19،4 ملن تەڭگە ءبولىندى. ال تاۋاعاش اۋىلىنا سۋ جەتكىزۋگە 6 ملن. تەڭگە ءبولىندى»، دەدى التىنبەك ابدۋللاەۆ.

سونىمەن بىرگە ول «قىزىلجار ادالدىق الاڭىندا» اۋدان جانە سەلولىق اكىمدەردىڭ تۇرعىندارمەن 7 مىڭنان ارتىق ادام قاتىسقان 50-گە جۋىق ەسەپتى كەزدەسۋ وتكىزگەنىن جانە وسى ماسەلەلەر سول جيىنداردا ايتىلعانىن جەتكىزدى. ولاردا تۇرعىندار وزدەرىن قاتتى الاڭداتاتىن ماسەلەلەر بويىنشا 106 ۇسىنىستار مەن پىكىرلەر بىلدىرگەن ەكەن.

 

سولتۇستىك قازاقستان وبلىسى،

ەسىل اۋدانى

سوڭعى جاڭالىقتار

ۇقساس جاڭالىقتار