پوليتسيا دەپارتامەنتىنىڭ باسشىسى الماتىدا كوپقاباتتى تۇرعىن ءۇي اۋلالارىنداعى ءتارتىپتى قالاداعى پاترۋل قىزمەتكەرلەرىنىڭ تەڭ جارتىسى قاداعالايتىندىعىن اتادى.
«الماتى پوليتسياسى جۇرگىزىلگەن تالداۋ ناتيجەلەرى بويىنشا پاترۋلدىك پوليتسيا پولكى قۇرامىنىڭ 50% قالانىڭ كوشەلەرى مەن اۋلالارىنا باعىتتاۋ تۋرالى شەشىم قابىلدادى. «102 پاترۋلدىك ايماق انىقتالدى. قالادا جالپى 2020 پاترۋلدىك باعىت جاسالعان, ولاردىڭ 478-ىنە شولعىنداۋ اۆتوكولىكپەن, 1487-ىنە جاياۋ جۇرگىزىلەدى. 550 باعىت بويىنشا ەكى اۋىسىمدا 2 مىڭنان استام پوليتسيا قىزمەتكەرى كۇن سايىن قوعامدىق ءتارتىپتى كۇزەتەدى. جاياۋ پاترۋلدەۋ ەنگىزىلگەن ساتتەن باستاپ اتالعان ايماقتاردا قىلمىستاردى تىركەۋ 16,5% ازايدى», – دەدى قانات تايمەردەنوۆ.
سونىمەن قاتار ق.تايمەردەنوۆ ءتارتىپتى ساقتاۋعا 1 قوعامدىق قۇرىلىم مەن ءارتۇرلى ۇيىمداردىڭ 7 كومانداسى قاتىساتىنىن اتاپ ءوتتى. ولاردىڭ كومەگىمەن 39 قىلمىس اشىلىپ, 4 214 اكىمشىلىك قۇقىق بۇزۋشىلىق انىقتالعان.
الماتى قالاسى اكىمىنىڭ ءبىرىنشى ورىنباسارى ەرلان قوجاعاپانوۆ بلوك-بەكەتتەردە تۋىنداعان ۇزىن-سونار كەپتەلىستەرگە قاتىستى ساۋالدارعا: «قازىر قالادا 700 پوليتسيا قىزمەتكەرى 22 بلوكپوستا 2-3 اۋىسىممەن جۇمىس ىستەپ جاتىر. ءبىر بلوكپوسقا 10 ادامنان كەلەدى. الايدا, ءبىز بلوكپوستتىڭ پەريمەترىن دە ەسكەرۋىمىز كەرەك. ول تەرريتوريا دا باقىلاۋدى قاجەت ەتەدى. قازىر كارانتين شارالارىنىڭ باسەڭسۋىنە بايلانىستى قالاعا كىرەتىن-شىعاتىن كولىكتەردىڭ سانى ارتىپ كەلەدى», – دەپ جاۋاپ بەردى.
قوجاعاپانوۆتىڭ ايتۋىنشا, قازىر ءار بلوك-بەكەتتە پوليتسيا قىزمەتكەرلەرىنىڭ قولىنا بەرىلەتىن پلانشەتتەر سانى كوبەيگەن.
