اگەنت بانكپەن ارادا قايتادان قول قويىلعان كەلىسىمنىڭ مەرزىمى اياقتالعان سوڭ, سالىمشىلار تىكەلەي قورعا, دالىرەك ونىڭ الماتى مەن نۇر-سۇلتان قالالارىنداعى بولىشەلەرىنە جۇگىنە الادى. ەلمىزدىڭ باسقا وڭىرلەرىندە تۇراتىن سالىمشىلار وتىنىشتەرىن جانە نوتاريۋس كۋالاندىرعان قۇجاتتارىن پوشتا ارقىلى جىبەرۋ مۇمكىندىگىنە يە.
بۇل ولارعا قوسىمشا شىعىن كەلتىرەتىنى بەلگىلى. سوندىقتان قور سالىمشىلارعا كەپىلدىك بەرىلگەن وتەمدى الۋ ءۇشىن اگەنت بانكتىڭ بولىمشەلەرىنە جۇگىنۋدى ۇسىنادى. ال بۇل ءۇشىن الدىن الا 505 ءنومىرى (ۇيالى تەلەفون ارقىلى حابارلاسۋ تەگىن) 8 (727) 244 30 30 نەمەسە www.bcc.kz.م سايتى ارقىلى بانك بولىمشەسىنىڭ جۇمىس ءتارتىبىن انىقتاپ العان ءجون.
سالىمشىلار ءوتىنىشتى اگەنت بانككە تىكەلەي نەمەسە سەنىم بىلدىرىلگەن تۇلعا ارقىلى ۇسىنا الادى. جەكە ءوزى كەلگەن جاعدايدا سالىمشى وتەمدى تولەۋ جونىندە ءوتىنىشتى جانە جەكە باسىن كۋالاندىراتىن قۇجاتتى ۇسىنادى. ال سەنىم ارتىلعان تۇلعا باسقا قۇجاتتارمەن قوسا نوتاريۋس كۋالاندىرعان سەنىمحات ۇسىنادى.
اگەنت بانك قوردىڭ اتىنان جانە قاراجاتى ەسەبىنەن جەكە تۇلعالار مەن جەكە كاسىپكەرلەردىڭ «Delta Bank» اق-تا ورنالاستىرىلعان دەپوزيتتەرى, ولاردىڭ ىشىندە كاپيتالدانعان سىياقىلاردى ەسكەرە وتىرىپ, سالىمدارى, اعىمداعى شوتتارى جانە تولەم كارتوچكالارى بويىنشا وتەم تولەيدى.
كەپىلدىك مولشەرى ۇلتتىق ۆاليۋتاداعى دەپوزيتتەر بويىنشا – قوسا ەسەپتەگەندە 10 ميلليون تەڭگەگە دەيىن, شەتەل ۆاليۋتاسىنداعى دەپوزيتتەر بويىنشا – قوسا ەسەپتەگەندە 5 ميلليون تەڭگەگە دەيىن.
تولەمدەر ۇلتتىق ۆاليۋتادا كاسسادا قولما-قول اقشامەن نەمەسە سالىمشىنىڭ وتىنىشىندە كورسەتىلگەن بانك شوتىنا اۋدارۋ ارقىلى جۇزەگە اسىرىلادى.
ەسكە سالا كەتەلىك, «Delta Bank» اق سالىمشىلارىنا كەپىلدىك بەرىلگەن وتەمدى اگەنت بانك ارقىلى تولەۋ 2018 جىلدىڭ 17 مامىرىنان بەرى جۇزەگە اسىرىلىپ كەلەدى. وسى ۋاقىت ىشىندە جالپى سوماسى 99,7 ملن تەڭگەگە وتەم تولەندى. بۇل قور مىندەتتەمەلەرىنىڭ جالپى سوماسىنىڭ 49,5 پايىزىن قۇرايدى. بارلىعى 326 سالىمشى دەپوزيتتەرى بويىنشا وتەم الدى. بۇل «Delta Bank» اق سالىمشىلارىنىڭ جالپى سانىنىڭ 12 پايىزىنا تەڭ.
