ساپار كەزىندە ە.توعجانوۆپەن بىرگە دەلەگاتسيا قۇرامىندا مادەنيەت جانە سپورت ءمينيسترى اقتوتى رايىمقۇلوۆا, ءبىلىم جانە عىلىم ۆيتسە-ءمينيسترى ميراس داۋلەنوۆ, قاراعاندى وبلىسىنىڭ اكىمى جەڭىس قاسىمبەك جانە «نازارباەۆ زياتكەرلىك مەكتەپتەرى» اق باسقارما ءتورايىمى كۇلاش شامشيدينوۆا بولدى.
قازىرگى ۋاقىتتا قاراعاندى وبلىسىندا «جۇمىسپەن قامتۋدىڭ جول كارتاسى» بويىنشا جالپى سوماسى 3,9 ملرد تەڭگەگە 36 الەۋمەتتىك جانە مادەني-تاريحي جوباسى جۇزەگە اسىرىلۋدا. 2020 جىلعى 1 مامىرداعى جاعداي بويىنشا وڭىردەگى الەۋمەتتىك جۇمىس ورىندارىنا 472 ادام جىبەرىلدى. ونىڭ ىشىندە 113 ادام جاستار پراكتيكاسىنا, 2 694 ادام قوعامدىق قىزمەتكە تارتىلعان. جۇمىسسىزدىق دەڭگەيى 4,4 پايىزدى قۇرايدى (2020 جىلدىڭ 1 توقسانى بويىنشا), ءوزىن ءوزى جۇمىسپەن قامتىعانداردىڭ سانى – 56,1 مىڭ ادام.
ساپار كەزىندە پرەمەر-ءمينيستردىڭ ورىنباسارى التىن وردانىڭ نەگىزىن سالعان جوشى حان تاريحي-مادەني ورتالىعىنىڭ قۇرىلىس بارىسىمەن تانىستى. «جۇمىسپەن قامتۋدىڭ جول كارتاسى» باعدارلاماسى اياسىندا جوشى حان كەسەنەسىن رەستاۆراتسيالاۋعا جانە تاريحيا-مادەني ورتالىقتىڭ ينفراقۇرىلىمىن قۇرۋعا رەسپۋبليكالىق بيۋدجەتتەن 800 ملن تەڭگە بولىنگەن بولاتىن. جوبادا جۇمىس ىستەپ جاتقان بارلىق جۇمىسشىلار «ەڭبەك» باعدارلاماسى بويىنشا تارتىلعان. تاريحي-مادەني كەشەندى وسى جىلدىڭ تامىز ايىندا پايدالانۋعا بەرۋ جوسپارلانىپ وتىرعانىن ايتا كەتەيىك.
«جۇمىسپەن قامتۋدىڭ جول كارتاسى» باعدارلاماسى بويىنشا الەۋمەتتىك جوبالاردىڭ جۇزەگە اسىرىلۋىمەن تانىسقان ە.توعجانوۆ جەزقازعان تۇرعىندارىنىڭ تۇرعىن ءۇي جانە الەۋمەتتىك-تۇرمىستىق ماسەلەلەرىنىڭ قالاي شەشىلىپ جاتقانىنا ەرەكشە نازار اۋداردى. 2020 جىلعا دەيىن جۇرگىزىلگەن تەحنيكالىق زەرتتەۋگە سايكەس 26 كوپپاتەرلى تۇرعىن ءۇي اپاتتىق جاعدايدا دەپ تانىلعان, ونىڭ 9-ى كۇردەلى جوندەۋدى قاجەت ەتەدى, 17-ءسى بۇزىلۋى ءتيىس. ە.توعجانوۆ اكىمدىك 17 اپاتتىق ءۇيدىڭ تۇرعىندارىن ءۇش جىلدا باسقا جەرگە كوشىرۋ باعدارلاماسىن جاساعانىن ايتتى.
وڭىردە وتكىر تۇرعان ماسەلەنىڭ ءبىرى – حالىقتى سۋمەن قامتاماسىز ەتۋ. ە.توعجانوۆ جەزقازعان مەن ساتباەۆ قالالارىن سۋمەن قامتۋ ماسەلەسىن شەشۋى ءتيىس ەسقۇلا سۋ قۇبىرىنىڭ قۇرىلىسىنا كوڭىل ءبولدى.
– سۋعا بايلانىستى وتكەن جىلى ۇلكەن ماسەلە بولعانىن بىلەمىز. جەرگىلىكتى حالىق 11 كۇن سۋسىز وتىردى. ونداي ماسەلە بولاشاقتا قايتالانباۋى كەرەك. وبلىس اكىمىمەن بۇل تۋرالى اڭگىمەلەستىك, شەشۋ جولى انىقتالدى. وبلىس باسشىلىعى سۋمەن جابدىقتاۋ ماسەلەسىن تۇبەگەيلى شەشۋگە ۋادە بەرىپ وتىر, – دەدى پرەمەر-ءمينيستردىڭ ورىنباسارى.
بۇگىنگى تاڭدا ساتباەۆ قالاسى اۋىز سۋمەن جاڭا سۋ جابدىقتاۋ جۇيەسى ارقىلى قامتاماسىز ەتىلىپ وتىر. 2019 جىلى «قازاقمىس كورپوراتسياسى» جشس-ءنىڭ باس جوبالاۋ ينستيتۋتى جەزقازعاندا ەسقۇلا سۋ تاراتقىشىن قايتا قالپىنا كەلتىرۋ جوباسىن جاسادى. ۆيتسە-پرەمەر تۇرعىنداردىڭ الەۋمەتتىك ماسەلەسىن شەشۋ ۇكىمەتتىڭ باقىلاۋىندا ەكەنىن باسا ايتتى. ءوز كەزەگىندە قاراعاندى وبلىسىنىڭ اكىمى جەڭىس قاسىمبەك كەڭگىر سۋ قويماسىنان قوسىمشا سۋمەن جابدىقتاۋ جۇيەسى ەكى ايدىڭ ىشىندە ىسكە قوسىلاتىن حابارلادى.
ۇكىمەتتىك دەلەگاتسيا جەزقازعاندا سالىنىپ جاتقان 900 ورىندىق نازارباەۆ زياتكەرلىك مەكتەبىن ارالاپ كوردى. نىسانداعى بارلىق جۇمىس كەستەگە سايكەس جۇرگىزىلۋدە. قازىرگى ۋاقىتتا قۇرىلىس اياقتالۋعا جاقىن. حالىقارالىق نورمالارعا سايكەس ءبىلىم بەرۋ نىسانىنىڭ اۋلاسىن اباتتاندىرۋ, عيماراتتى جيھازبەن تولىق جابدىقتاۋ بويىنشا تاپسىرمالار بەرىلدى.
