جۋىردا پەتروپاۆلدىڭ 20 جاسار ءبىر ازاماتى سونداي ءبىر وسپادار ارەكەت جاسادى. ول الەۋمەتتىك جەلىلەردە «Chevrolet TrailBlazer» ماشيناسىنىڭ الدىڭعى اينەگىن سىندىرىپ جاتقان سۋرەتىن جاريالاعان. بۇعان دەيىن دە وسىنداي وعاش قىلىقتار جاساپ جۇرگەن ونى قوعامدىق ءتارتىپتى بۇزعانى ءۇشىن پوليتسيا بۇل جولى 15 تاۋلىك قاماۋعا الدى. مۇنى ەستىگەن قالالىقتار ساۋاپ بولعان ەكەن دەسىپ, ريزا بولىپ قالدى.
قىستىگۇنى جەل بەرىلەتىن ماتراتستى ماشيناعا تىركەپ, ونى جولداسىنىڭ ماشيناسىنا تىركەپ قالا كوشەلەرىندە اپاتتى جاعداي تۋدىرىپ سۇيرەتىلگەندەر دە وسى ازاماتتار بولاتىن. بىراق بۇل قىلىعىمەن ول الەۋمەتتىك جەلىدە وزىنە اناۋ ايتقانداي نازار اۋدارتا الماعانىن مويىنداعان. ول جولى حالىقتان كەشىرىم سۇرادى دەپ تەنتەككە جازا قولدانىلماي جىبەرىلگەن بولاتىن. ەندىگىسى مىناۋ بولىپ وتىر.
قوعامدىق ءتارتىپتى, قورشاعان ورتانى كوزگە ىلمەيتىن وسىنداي ساناسىزدارعا قاتاڭ جازا قولدانىلماسا ولاردى تياتىن باسقا امال جوق. بىراق ءبىزدىڭ زاڭدارىمىز مۇندايلارعا قاتاڭ جازا قاراستىرماعان. پەتروپاۆل قالالىق پوليتسيا باسقارماسى باستىعىنىڭ ورىنباسارى الىبەك عابدۋللين ەسەرسوقتىڭ ارەكەتتەرىن ۇساق بۇزاقىلىق دەپ باعالاپ, 15 تاۋلىككە اكىمشىلىك جازا بەرۋگە ماتەريالدار جيناعاندارىن ايتتى. باسقالارعا زياندى ۇلگى بولاتىن بۇل وسپادارلىقتى سۋديا دا قولداپ, وعان ۇسىنىلعان جازانى بەردى. ارينە, قاتاڭ جازا بولماسا «تويىپ سەكىرەتىندەردى» تىيۋ قيىن.
پەتروپاۆل
