پەتروپاۆل قالاسىنىڭ كوشەلەرىندە ويدىم-ويدىم شۇڭقىرلار, تەسىلگەن, جارىلعان جەرلەر كوپ. جول جوندەۋشىلەر كەيدە جوندەۋدى باستاپ, جولدى ويىپ, ونى بىرنەشە كۇن بويى قالدىرىپ كەتەتىن كەزدەرى دە بولادى. بالەن ميلليونعا العان كولىكتەرى وسىنداي جولداردىڭ كەسىرىنەن ىستەن شىعىپ جاتقانىنا نازالانعان تۇرعىندار دا جەتەرلىك.
سقو پوليتسيا دەپارتامەنتى اكىمشىلىك پوليتسيا باسقارماسى جىلدىڭ باسىنان بەرى جولداردى دۇرىس كۇتپەيتىن 60 كاسىپورىننىڭ باسشىلارىنا جانە تەمىر جول ۇستىنەن وتەتىن جولدى كۇتىپ ۇستاۋعا ءتيىستى 13 لاۋازىمدىق تۇلعانى اكىمشىلىك جاۋاپقا تارتىپ, ايىپپۇل سالدى. «اسفالت وپىرىلىپ, ويدىم-ويدىم جەرلەردىڭ پايدا بولۋى – جۇمىسشى كەنتى سياقتى قالانىڭ بىرقاتار ىقشام اۋداندارىندا ءجيى كەزدەسەدى. وندايلارعا ءبىز اكىمشىلىك حاتتامالار تولتىرامىز. بيىل بارلىعى 73 حاتتاما تولتىرىلعان ەدى, سونىڭ 60-سى جولدى كۇتىپ ۇستاۋعا جاۋاپتى لاۋازىمدىق تۇلعالارعا قاتىستى تولتىرىلدى»,- دەپ اتاپ ءوتتى سقو پوليتسيا دەپارتامەنتى اكىمشىلىك پوليتسيا باسقارماسىنىڭ اسا ماڭىزدى ىستەر جونىندەگى اعا ينسپەكتورى, پوليتسيا مايورى ەۆگەني گوكين.
اكىمشىلىك پوليتسيا جولدىڭ جاعدايىن عانا ەمەس, جول ينفراقۇرىلىمىنىڭ بارلىق ەلەمەنتتەرىنىڭ قالىپتى جاعدايدا بولۋىن قاداعالايدى. جولداعى قاۋىپسىزدىك اسىرەسە, جاز ايلارىندا جول بەلگىلەرىنە, جولاقتاردىڭ ايقىن بولۋىنا, باعدارشام سيگنالدارىنىڭ انىق كورىنۋىنە بايلانىستى بولىپ كەلەدى. جازدىڭ باسىنان بەرى جول كۇتەتىن ۇيىمدار 300-دەن استام جول بەلگىسىن تازالاپ, جاڭادان بوياعان, سونداي-اق جول بەلگىلەرىن جاۋىپ تۇرعان اعاش بۇتاقتارىن كەسكەن. شاڭ-توزاڭ باسقان 35 باعدارشام ءتيىستى جاعدايعا كەلتىرىلىپ, جول بەلگىلەرى قايتا بويالىپ, ويدىم-ويدىم جەرلەر جوندەلگەن.
بۇل - اكىمشىلىك پوليتسەيلەرىنىڭ 4 مىڭ كم-گە جۋىق وبلىس جولدارىن زەردەلەپ, 680 كەمشىلىك انىقتاعاندىعىنىڭ ارقاسىندا جەدەل ىسكە اسىرىلعان شارالار.
سولتۇستىك قازاقستان وبلىسى
