وسىنداي فاكتىنىڭ ءبىرى «مامليۋتكا» بلوك-بەكەتىندە توتەنشە جاعداي رەجىمىنىڭ توقتاتىلۋىنا ءبىر كۇن قالعاندا انىقتالدى. ول «Audi-100» اۆتوكولىگىنىڭ 38 جاسار جۇرگىزۋشىسى ەدى. مەديتسينالىق كۋالەندىرۋ ونىڭ ماساڭ كۇيدە بولعانىن كورسەتتى. بۇدان بولەك, جۇرگىزۋشىدە بلوك-بەكەتتەن وتۋگە رۇقسات بولماعان, جۇرگىزۋشى كۋالىگىن دە الماعان. سونداي-اق, ونىڭ بۇرىن دا كولىكتى ماساڭ كۇيدە باسقارۋ قۇقىعىنسىز جۇرگىزگەنى ءۇشىن جاۋاپقا تارتىلعانى بەلگىلى بولدى. ءتارتىپ ساقشىلارى اكىمشىلىك قۇقىق بۇزۋشىلىق تۋرالى كودەكستىڭ «جۇرگىزۋشىنىڭ كولىك قۇرالىن الكوگولدىك, ەسىرتكىلىك جانە (نەمەسە) ۋىتقۇمارلىق ماساڭ كۇيدە باسقارۋى, سول سياقتى كولىك قۇرالىن الكوگولدىك, ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ باسقارۋى» تۋرالى بابى بويىنشا حاتتاما تولتىردى. 14 مامىر كۇنى سوت شەشىمىمەن وعان 30 تاۋلىككە اكىمشىلىك قاماققا الۋ جازاسى تاعايىندالدى. جازاسىن وتەگەننەن كەيىن بۇزۋشى سوت الدىنا قايتا بارادى. ويتكەنى, پوليتسەيلەر وعان قارسى اكىمشىلىك قۇقىق بۇزۋشىلىق تۋرالى كودەكستىڭ «توتەنشە جاعداي رەجىمىن بۇزۋ» بويىنشا ماتەريال جينادى.
«ماساڭ كۇيدە رولگە وتىرعان جۇرگىزۋشى وزىنە جانە اينالاسىنداعى ادامداردىڭ دەنساۋلىعى مەن ومىرىنە قاۋىپ توندىرەدى»,- دەيدى سقو پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى پوليتسيا پودپولكوۆنيگى ايدىن بايماتوۆ. –« جىل باسىنان وبلىس جولدارىندا اششى سۋ ءىشىپ الىپ رولگە وتىرعان جۇرگىزۋشىلەردىڭ كەسىرىنەن 6 جول-كولىك وقيعاسى ورىن الدى, 7 ادام جاراقات الىپ, 3-ءۋى قايتىس بولدى. كولىكتى ماساڭ كۇيدە جۇرگىزگەنى ءۇشىن 261 سولتۇستىكقازاقستاندىق جاۋاپقا تارتىلدى».
سولتۇستىك قازاقستان وبلىسى
