قوعام • 15 مامىر، 2020

ۆوكزالعا تەك بيلەتى بار جولاۋشىلار عانا كىرەدى

52 رەت كورسەتىلدى

بۇگىننەن باستاپ قازاقستاننىڭ ىشكى باعىتتارىنا تەمىر جول بيلەتتەرىن ساتۋ باستالادى. 1 ماۋسىمنان باستاپ ىشكى تەمىر جول قاتىناسى كەزەڭ-كەزەڭمەن قالپىنا كەلتىرىلەدى.

وسىعان بايلانىستى پرەزيدەنت جانىنداعى ورتالىق كوممۋنيكاتسيا­لار قىزمەتىندە كولىكتەگى باس مەم­لەكەتتىك سانيتارلىق دارىگەر سادۋا­قاس بايعابىلوۆ تۇسىنىكتەمە بەردى.

كولىكتەگى باس مەملەكەتتىك سانيتارلىق دارىگەر پويىزداردا نەگىزگى سانيتارلىق-كارانتيندىك شارالاردى بەلگىلەيتىن قاۋلىعا قول قويدى. قاۋلى تاسىمالداۋشىلار جۇمىسىنا عانا قاتىستى ەمەس. س.بايعابىلوۆتىڭ ايتۋىنشا، وندا ۆوكزال اكىمشىلىگى، تاسىمالداۋ سالاسىنداعى كاسىپورىندار مەن كولىككە قىزمەت كورسەتۋ ۇيىمدارى قامتاماسىز ەتۋى ءتيىس باستى شارالار دا ايقىندالعان. «ۆوكزال عيماراتىنا تەك بيلەتى بار جولاۋشىلار عانا كىرگىزىلەدى. جولاۋشىلار ماسكا تاعۋعا، ال جولسەرىكتەر بەتپەردەمەن قوسا قولعاپ كيۋگە مىندەتتى. عيماراتقا كىرۋدەن بۇرىن تەرمومەتريا جۇرگىزىلەدى. شىعارىپ سالۋشىلار ۆوكزال عيماراتىنا كىرە المايدى، تۋىسقاندارىمەن سىرتتا قوشتاسۋى ءتيىس. ۆوكزال كىرەبەرىسىندە بارلىق ادامعا تەرمومەتريا جۇرگىزىلەدى»، دەدى ول.

تەمىر جول ۆوكزالدارى جۇمىسىن جانداندىرۋ مەن ۆاگونداردىڭ قوزعالىسىن قامتاماسىز ەتۋ الدىندا كونديتسيونەرلەۋ جۇيەسى تولىق تەكسەرىلىپ، فيلترلەر اۋىستىرىلادى. «پويىزداردا دەزينفەكتسيالىق رەجىمدى كۇشەيتۋ ماڭىزدى تالاپتاردىڭ ءبىرى. سونداي-اق پويىز بريگادالارى، قىزمەتكەرلەر ماسكامەن ءجۇرۋى كەرەك. ۆاگوندار اراسىندا جولاۋشىلاردىڭ قوزعالىسىنا شەكتەۋ قويىلادى. جولاۋشىلاردى وتىرعىزۋ بيلەت پەن ورنالاستىرۋ ورىندارىنىڭ بولۋىنا قاراي جۇزەگە اسادى. ادامداردى ورىندارىنا وتىرعىزۋ بويىنشا قوسىمشا تالاپتار ەسكەرىلمەگەن. كۋپە جانە پلاتسكارت ۆاگوندارىندا تەك بيلەتتەر بويىنشا وتىرعىزىلادى»، دەدى كولىكتەگى باس مەملەكەتتىك سانيتار.

پويىز جۇرگەننەن كەيىن جول­سەرىكتەر جولاۋشىلارعا انكەتا تاراتادى. ۆوكزال مەن پويىزداردا جۇمىس ىستەيتىن قىزمەتكەرلەر ءار اۋىسىم الدىندا مەديتسينالىق تەكسەرىستەن وتەدى. سادۋاقاس بايعابىلوۆ ەگەر جاعداي تۇراقتالسا، بۇل شارالار كەزەڭ-كەزەڭمەن جەڭىلدەتىلەتىنىن اتاپ ءوتتى. ايتپاقشى ساپار بارىسىندا جولاۋشىلارعا وزدەرىمەن بىرگە تاماق الۋعا رۇقسات بەرىلەدى.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار