اتالعان سوما توتەنشە جاعدايلاردىڭ جاھاندىق پاكەتى شەڭبەرىندە دە, دۇنيەجۇزىلىك بانكتىڭ قارجىلىق كومەگىمەن وسى مەملەكەتتەردە قازىرگى تاڭدا جۇزەگە اسىرىلىپ جاتقان جوبالار شەڭبەرىندە دە قايتا ءبولىنىپ وتىر.
«دۇنيەجۇزىلىك بانك COVID-19 پاندەمياسىنا قارسى قاراجاتتى تەز ارادا جۇمىلدىرا ءبىلدى. ورتالىق ازيا مەملەكەتتەرىنىڭ ۇكىمەتتەرىمەن بىرگە ءبىز دەنساۋلىق ساقتاۋ جۇيەسىن نىعايتىپ, COVID-19 اۋرۋىنىڭ ەكونوميكالىق ىقپالىن ازايتۋ ماقساتىندا قوسىمشا قاراجات ءبولۋ ءۇشىن 9,7 ملرد اقش دوللارىن قۇرايتىن ايماقتاعى ينۆەستيتسيالىق پورتفەلىمىزدى قايتا قاراپ جاتىرمىز», - دەدى دۇنيەجۇزىلىك بانكتىڭ ورتالىق ازياداعى ايماقتىق ديرەكتورى ليليا بۋرۋنچۋك دۇنيەجۇزىلىك بانكتىڭ ۇيىمداستىرۋىمەن وتكەن ونلاين-بريفينگتە.
دۇنيەجۇزىلىك بانك تاراپىنان كورسەتىلىپ جاتقان كومەك دەنساۋلىق ساقتاۋ مەن العاشقى مەديتسينالىق كومەك كورسەتۋدىڭ ۇلتتىق جۇيەلەرىنىڭ تيىمدىلىگىن ارتتىرۋ بويىنشا كەڭ اۋقىمدى شارالار لەگىن جۇزەگە اسىرۋعا, ەپيدەميولوگيالىق مونيتورينگ پەن ەسەپتىلىكتى جەتىلدىرۋگە, ينفەكتسيا جۇقتىرعان پاتسيەنتتەرمەن جۇمىس ىستەيتىن مەديتسينالىق كادرلاردى دايارلاۋعا مۇمكىندىك بەرەدى.
ۇسىنىلعان قاراجات سونىمەن قاتار ماڭىزدى مەديتسينالىق جابدىقتاردى, سونىڭ ىشىندە تەستىلەۋ جيىنتىقتارىن, لابوروتوريالىق رەاگەنتتەردى, رەانيماتسيا بولىمشەلەرىنە ارنالعان جەكە جابدىقتاردى, مەديتسينالىق قىزمەتكەرلەرگە ارنالعان جەكە قورعانىس قۇرالدارىن ساتىپ الۋعا جۇمسالادى.
سونىمەن بىرگە ورتالىق ازيانىڭ جەكەلەگەن ەلدەرىنىڭ باسىمدىعىنا قاراي قاراجات ۇكىمەتتەرگە حالىقتىڭ ءالسىز توپتارىن الەۋمەتتىك تۇرعىدا قورعاۋدى قامتاماسىز ەتەتىن باعدارلامالاردى كەڭەيتۋگە, قاشىقتىقتان ءبىلىم بەرۋ جۇيەسىن رەتكە كەلتىرۋگە جانە پاندەميا سالدارىن ازايتۋ اياسىندا باسقا ماسەلەلەردى شەشۋگە جول اشادى.
2020 جىلدىڭ 14 مامىرىنداعى جاعداي بويىنشا دۇنيەجۇزىلىك بانكتىڭ ورتالىق ازياداعى COVID-19 اسەرىن ازايتۋعا باعىتتالعان شارالار پاكەتى تومەندەگى جوبالاردى قامتيدى:
قازاقستانعا الەۋمەتتىك مەديتسينالىق ساقتاندىرۋ بويىنشا جوبالاردى قايتا قاراۋ (رەسترۋكتۋريزاتسيا) اياسىندا ءارتۇرلى ايماقتا COVID-19 جۇقتىرعان ناۋقاستاردى ەمدەۋ ءۇشىن قاجەتتى وكپەنى جاساندى جەلدەتەتىن 236 اپپارات ء(وجج) ساتىپ الۋعا 10 ملن ءدوللار بولىندى. بۇعان قوسا وكپەنى جاساندى جەلدەتەتىن 123 اپپارات پەن وزگە دە مەديتسينالىق جابدىقتى ساتىپ الۋعا 17 ملن دوللار اۋدارىلدى.
تاجىكستانعا اۋدارىلعان 11.3 ملن دوللار جەدەلدەتىلگەن پروتسەدۋرالار بويىنشا توتەنشە جاعدايلاردا ارەكەت ەتۋدىڭ جاھاندىق پاكەتى اياسىندا جەدەل جاردەم كومەگىن كورسەتۋ مۇمكىندىكتەرىن كەڭەيتۋگە باعىتتالادى. قاراجات جان ساقتاۋ بولىمدەرىنە ارنالعان مەديتسينالىق جابدىقتاردى, مەديتسينا قىزمەتكەرلەرىنە ارنالعان جەكە قورعانىس قۇرالدارىن, تەستىلەۋ جيىنتىقتارى مەن لابوروتوريالىق رەاگەنتتەردى ساتىپ الۋعا, سونداي-اق كوروناۆيرۋستىڭ الدىن الۋ ءۇشىن جان ساقتاۋ ءبولىمى مەن اقپاراتتىق-ءتۇسىندىرۋ جۇمىستارىن جۇرگىزەتىن قىزمەتكەرلەردى وقىتۋعا جۇمسالادى. الەۋمەتتىك جاعىنان وسال توپتاعى ازاماتتار ۋاقىتشا الەۋمەتتىك قولداۋ شارالارى ارقىلى قورعالادى.
قىرعىز رەسپۋبليكاسىنا بولىنگەن 21 ملن دوللار قاراجات ەپيدەميانىڭ الدىڭعى شەبىندەگى مەديتسينالىق قىزمەتكەرلەرگە مەديتسينالىق جانە لابوروتوريالىق قۇرىلعىلاردى, جەدەل جاردەم كولىكتەرىن, جەكە قورعانىس قۇرالدارىن, سونداي-اق توتەنشە جاعدايلاردا جەدەل ارەكەت ەتەتىن توپتاردى ءموبيلدى قۇرىلعىلاردى ساتىپ الۋعا باعىتتالادى.
وزبەكستانعا بولىنگەن 95 ملن دوللار ۇلتتىق دەنساۋلىق ساقتاۋ جۇيەسىن جاقسارتۋعا, سونداي-اق پاندەميادان تۋىنداعان ەكونوميكالىق داعدارىستان زارداپ شەككەن حالىقتىڭ از قامتىلعان بولىگىن قولداۋعا جۇمسالادى. سونداي-اق دۇنيەجۇزىلىك بانك سالىق تۇسىمدەرىنىڭ ەداۋىر قىسقارىپ, ۇكىمەتتىڭ پاندەميانىڭ الەۋمەتتىك-ەكونوميكالىق سالدارىن جۇمسارتۋ باعدارلاماسى اياسىندا شىعىستاردىڭ كۇتپەگەن جەردەن ۇلعايۋى جاعدايىن ەسكەرە وتىرىپ, بيۋدجەتتى قوسىمشا قارجىلاندىرۋ ءۇشىن تاعى دا 200 ملن دوللار ءبولدى. سونىمەن قاتار, وزبەكستانداعى شۇعىل مەديتسينالىق كومەك جۇيەسىن جەتىلدىرۋ جوباسى اياسىندا 17 ملن دوللار اۋدارىلدى. وسى قاراجات وكپەنى جەلدەتۋ اپپاراتتارىن, رەنتگەن اپپاراتتارىن, ينفۋزيالىق سورعىلاردى, تەستىلەۋ جيىنتىقتارىن, ۆيرۋس جۇقتىرعان ناۋقاستاردىڭ دەنساۋلىعىن باقىلاۋعا ارنالعان جابدىقتاردى جانە تاعى باسقا كەرەك-جاراقتى ساتىپ الۋعا مۇمكىندىك بەرەدى.
بۇكىل الەم, سونىمەن بىرگە ورتالىق ازيا دا COVID-19 پاندەمياسىنىڭ ىقپالىمەن تۋىنداعان ەكونوميكالىق داعدارىستى باستان وتكەرۋدە. جۇمىسسىزدىقتىڭ ءوسۋى, جالاقىنىڭ تومەندەۋى, باعانىڭ ءوسىمى جانە ءبىلىم مەن دەنساۋلىق ساقتاۋ قىزمەتتەرىنىڭ قول جەتىمدىلىگىنىڭ تومەندەۋى بايقالادى.
ورتالىق ازيا ەلدەرىنە پاندەميانىڭ جاعىمسىز ەكونوميكالىق سالدارىن ازايتۋعا كومەكتەسۋ ءۇشىن دۇنيەجۇزىلىك بانك ايماقتىڭ ۇكىمەتتەرىمەن بىرلەسىپ, جاعدايدى باعالاي وتىرىپ, رەسۋرستاردى قايتا ءبولۋ جانە قايتا ۇيىمداستىرۋ ماقساتىندا جوبالاردىڭ ءبارىن زەرتتەيدى. دۇنيەجۇزىلىك بانك ۇلتتىق ەكونوميكالاردى قالپىنا كەلتىرۋ ءۇشىن قوسىمشا قاراجاتتى جۇمىلدىرۋدى جوسپارلاپ وتىر. ونىڭ كومەگى حالىقتىڭ تابىسىن قولداۋعا, مال شارۋاشىلىعى مەن اۋىل شارۋاشىلىعىن دامىتۋعا, الەۋمەتتىك قورعاۋ قىزمەتتەرىن كورسەتۋگە, تسيفرلىق ەكونوميكانى دامىتۋعا, اقپاراتتىق دەرەكتەردى باسقارۋعا باعىتتالادى.
بۇكىل الەمدەگى مەملەكەتتەر COVID-19 تارالۋىن باقىلاۋدى جاقسارتىپ, پاندەميانىڭ ەكونوميكالىق اسەرىن ازايتۋ جۇمىسىن جۇرگىزىپ جاتقاندىقتان, دۇنيەجۇزىلىك بانك توبى دامۋشى ەلدەرگە پاندەمياعا قارسى ءىس-قيمىلداردى جەتىلدىرۋگە كومەكتەسۋ ءۇشىن كەڭ اۋقىمدى ءارى جەدەل شارالاردى قابىلداپ وتىر. الداعى 15 ايدا دۇنيەجۇزىلىك بانك توبى بۇكىل الەمنىڭ مەملەكەتتەرىنىڭ ەكونوميكالارىن قالپىنا كەلتىرۋگە كومەكتەسۋ ءۇشىن 160 ميلليارد دوللار قاراجات جۇمىلدىرادى.
