پرەزيدەنت تاپسىرماسى بويىنشا, ەلوردادا «جۇمىسپەن قامتۋ جول كارتاسى – 2020-21» ينفراقۇرىلىمدىق جوباسىن جۇزەگە اسىرۋ باستالدى.
«جوبا اياسىندا ءبىز 15 مىڭنان استام ادامدى جۇمىسپەن قامتۋدى جوسپارلاپ وتىرمىز. جۇمىسپەن قامتۋ ورتالىعى ارقىلى 7 600-دەن استام ادام جۇمىسقا تۇرادى. بۇگىندە جۇمىسپەن قامتۋ ورتالىعى كەلەسى الگوريتم بويىنشا جۇمىس ىستەيدى: ورتالىق قاجەتتى بىلىكتى مامانداردى ىرىكتەيدى جانە ولاردى جۇمىس بەرۋشىلەرمەن سۇقباتقا جىبەرەدى», – دەيدى «نۇر-سۇلتان قالالىق اكىمدىگىنىڭ حالىقتى جۇمىسپەن قامتۋ ورتالىعى» كمم باسشىسى باقىتبەك قابجانوۆ.
ورتالىق باسشىسى «جۇمىسپەن قامتۋ جول كارتاسى» اياسىندا ماشينا وپەراتورلارى مەن جۇك كولىكتەرى جۇرگىزۋشىلەرى ماماندىقتارى سۇرانىسقا يە ەكەنىن اتاپ ءوتتى. بۇگىندە جول كارتاسى اياسىندا جالاقى مولشەرى – 85 مىڭ تەڭگە جانە ودان دا جوعارى. «جۇمىسپەن قامتۋ جول كارتاسى» اياسىندا 1 500 ادام جۇمىسقا ورنالاستى.
«باعدارلاما ارقىلى جۇمىسقا ورنالاسۋ ءۇشىن حالىقتى جۇمىسپەن قامتۋ ورتالىعىنا جۇگىنۋ قاجەت, ورتالىقتا وسى ماسەلە بويىنشا جەدەل شتاب بار. ءبىز بەيبىتشىلىك كوشەسى 25 ۇيدە ورنالاسقان «وركەن» بيزنەس ورتالىعىندا قىزمەت كورسەتەمىز. «جۇمىسپەن قامتۋ جول كارتاسى» شەڭبەرىندە الەۋمەتتىك سالا, تۇرعىن ءۇي-كوممۋنالدىق شارۋاشىلىق, ينجەنەرلىك-كولىك ينفراقۇرىلىمى, سونداي-اق ەلدى-مەكەندەردى اباتتاندىرۋ بويىنشا ينفراقۇرىلىمدىق جوبالاردى ىسكە اسىرۋدى قاراستىرامىز», - دەپ تۇيىندەدى ب.قابجانوۆ.
قازىرگى ۋاقىتتا «جۇمىسپەن قامتۋ جول كارتاسى» اياسىندا 117 ينفراقۇرىلىمدىق جوبا جۇزەگە اسىرىلۋدا. ولاردىڭ ىشىندە الەۋمەتتىك سالاعا – «جاستار» سارايىن كۇردەلى جوندەۋ, بەيبىتشىلىك جانە كەلىسىم سارايىن اعىمداعى جوندەۋ, سونداي-اق مەكتەپتەر مەن بالاباقشالاردى جوندەۋ جاتادى. تاعى ءبىر ءىرى باعىت – اۋلا اۋماقتارىن, ساياباقتار مەن سكۆەرلەردى اباتتاندىرۋ. ينجەنەرلىك-كولىك ينفراقۇرىلىمىنا جولداردى جاڭعىرتۋ جانە سالۋ جاتادى. تكش سالاسىندا وڭالتۋ ورتالىعىنىڭ قۇرىلىسى, 600 ورىندىق مەكتەپ قۇرىلىسى بويىنشا جوبالاردى ىسكە اسىرۋ جوسپارلانۋدا.
