وسىنشا كۇن ۇيىنە كەلمەگەن بالاسى ءۇشىن الاڭداعان اناسى قىزىلقوعا اۋداندىق پوليتسيا بولىمىنەن كومەك سۇرادى. بەيبىت كۇندە ۇشتى-كۇيلى جوعالعان ءجاسوسپىرىمدى ىزدەۋگە اۋداندىق پوليتسيا ءبولىمىنىڭ, وكرۋگتەردەگى پوليتسيا بولىمشەلەرىنىڭ جەكە قۇرامى جۇمىلدى. كامەلەتكە تولماعان بالانى جان-جاقتى ىزدەستىرۋ ءۇشىن توپ-توپقا بولىنگەن ساقشىلار اۋدان اۋماعىنداعى اۋىل-سەلولاردى تۇگەل ءتىنتىپ, دالالىق جولداردى دا نازاردان تىس قالدىرمادى.
–پوليتسيا ءبولىمىنىڭ ۋچاسكەلىك پوليتسيا ينسپەكتورى, پوليتسيا كاپيتانى ا.سارسەنعاليەۆ, كامەلەتكە تولماعاندار ءىسى جونىندەگى ينسپەكتور, پوليتسيا مايورى ب.بايجان, پاترۋلدىك پوليتسيا اعا ينسپەكتورى, پوليتسيا كاپيتانى ج.امانجولوۆ, انىقتاۋشى, پوليتسيا لەيتەنانتى و.ەلامان, جەدەل ۋاكىل, پوليتسيا كاپيتانى ش.ناۋرىزعاليەۆ بالانى ميالىدان 4-5 كم جەردەگى دالالىقتاعى جول بويىنان تاۋىپ, اناسىنا تاپسىردى, دەپ حابارلادى پوليتسيا دەپارتامەنتىنىڭ ءباسپاسوز قىزمەتى.
جوعالعان ءجاسوسپىرىمنىڭ اناسى –1976 جىلعى ازاماتشانىڭ ايتۋىنشا, ۇلىنىڭ ۇيدە جوعىنا العاشقىدا سونشالىقتى ءمان بەرمەپتى. ۇلىن اتاسىنىڭ ۇيىنە كەتكەن بولار دەپ ويلاعانىن جاسىرمايدى. ويتكەنى, ءجاسوسپىرىم بۇرىن دا وتباسىنداعىلارعا ايتپاستان, اۋدان ورتالىعىنان 100 شاقىرىم جەردە ورنالاسقان قاراباۋ ەلدى مەكەنىندەگى اتاسىنىڭ ۇيىنە ءجيى كەتىپ ءجۇرىپتى.
–بۇل جولى دا سولاي بولار دەپ ويلادىم. بىراق, قاراباۋداعىلارعا تەلەفون شالعاندا, ونىڭ كەلمەگەنىن ءبىلدىم. بارۋى مۇمكىن-اۋ دەگەن بولجاممەن, بارلىق تۋعان-تۋىستاردان سۇراستىرىپ, ءتورت كۇن بويى ىزدەستىردىم. امالىم تاۋسىلعاسىن, پوليتسيانىڭ كومەگىنە جۇگىندىم, دەيدى ءتورت كۇننەن كەيىن تابىلعان ءجاسوسپىرىمنىڭ اناسى.
يۋۆەنالدى پوليتسيا توبىنىڭ ينسپەكتورلارى مەن ارنايى پسيحولوگ-ماماندار بالامەن سويلەسىپ, دارىگەرلەر ونىڭ دەنساۋلىعىن, دەنە جاراقاتتارىنىڭ بار-جوعىن تەكسەردى. ال, پوليتسەيلەر ءجاسوسپىرىمنىڭ اتا-اناسىمەن ءتۇسىندىرۋ جۇمىسىن جۇرگىزدى.
ال, جوعالىپ-تابىلعان بالانىڭ ايتۋىنشا, ۇيىنەن شىعاردا جىلى كيىمىن, ارقاعا اساتىن سومكەسىنە ازىق-ت ۇلىك سالىپ الىپتى. كۇندىز دالادا «قىدىرىپ», تۇندە تانىس دوستارىنىڭ ۇيىنە قونىپتى.
سوندا بۇل بالا كۇندىز دالادا نە ىزدەپ ءجۇردى ەكەن؟
