توتەنشە جاعداي كەزىندە كاسىپكەرلەر ءۇشىن اسا ۇلكەن ماسەلەلەردىڭ ءبىرى عيماراتتى جالداۋ اقىسى بولدى. كارانتين جاعدايىندا جۇمىسىن توقتاتۋعا ءماجبۇر بولعانداردىڭ كوبى ونى تولەي المايتىن ەدى. كاسىپتى دامىتۋ ءۇشىن دەپ العان نەسيەلەرى, 2 ايعا جۋىق ۋاقىت جۇمىسسىز وتىرۋ ايتارلىقتاي قارجىلىق قيىندىقتارعا الىپ كەلدى.
بۇل ماسەلە كاسىپكەرلەر پالاتاسىنىڭ نازارىنان تىس قالعان جوق.
- جەرگىلىكتى اتقارۋشى ورگانمەن بىرگە عيماراتتارىن جالعا بەرىپ وتىرعان كاسىپكەرلەرمەن كەلىسسوزدەر جۇرگىزدىك. ونىڭ بارىسىندا وبلىس بويىنشا كولەمى 2000 شارشى مەتردەن اساتىن عيماراتى بار وتىزدان استام كاسىپكەر جالعا الۋشى 1823 بيزنەس وكىلىنە جەڭىلدىك جاسايتىنىن جەتكىزدى. كەلىسسوزدەردىڭ باسى-قاسىندا بولعان جەرگىلىكتى اتقارۋشى ورگاندارعا دا, عيمارات يەلەرىنە دە ايتار العىسىمىز شەكسىز,- دەيدى پالاتا ديرەكتورى.
اتاپ ايتقاندا, 2 ساۋدا ءۇيى 127 كاسىپكەرگە 50 پايىز, 1 ساۋدا ءۇيى 57 كاسىپ يەسىنە 30 پايىز, 12 ساۋدا نىسانى 1372 بيزنەس وكىلىنە 20 پايىز جالداۋ اقىسىنان جەڭىلدىك جاساعان.
ال جاڭاقورعان اۋدانىنداعى «نۇر» بازارى, «نۇر-اسىل», «اركەن» ساۋدا ۇيلەرى, قازالى اۋدانىندا «مۋساەۆ», «ورىن-اي», «ارۋ-يليا» بازارلارى مەن «بەرەكە», «بايتەرەك» ساۋدا ۇيلەرى, قىزىلوردا قالاسىنداعى «ساۋلەت» بازارى يەلەرى توتەنشە جاعداي ۋاقىتىندا كاسىپكەرلەردى 100 پايىز جەڭىلدىكتەن بوساتتى. بۇل دا بيزنەستىڭ الەۋمەتتىك جاۋاپكەرشىلىگىن كورسەتەدى.
كاسىپكەرلەر پالاتاسىنىڭ ماماندارى ءوز كەزەگىندە كاسىپكەرلەرگە سالىقتىق جەڭىلدىكتەر, نەسيەنى تولەۋ مەرزىمىن شەگەرتۋ, ۋاقىتشا جالاقىسى ساقتالمايتىن ەڭبەك دەمالىسىنا جىبەرىلگەندەرگە الەۋمەتتىك تولەم الۋ ماسەلەلەرىندە كەڭەستەر بەرىپ, سۇيەمەلدەۋ جۇمىستارىن جۇرگىزدى.
