ول كارانتيندىك رەجىمنىڭ وبلىستا ءتيىمدى بولعانىن اتاپ, تۇرعىندار اراسىندا ىندەتتىڭ تاراماعانىن, ال ينفەكتسياعا ۇشىراعاندار وبلىسقا تەك سىرتتان كەلگەندەر اراسىنان شىققانىن اتاپ ءوتتى. وڭىردە بارلىعى 36 ادامنىڭ بويىنان ىندەت شىققان. بۇگىنگى تاڭدا ينفەكتسيالىق ورتالىقتا 6 ادام ەمدەلۋدە. ارينە, پروۆيزورلىق ورتالىق پەن كارانتيندىك ستاتسيوناردا ءالى 80-گە جۋىق ادام بار. 30 ادام تولىق ەمدەلىپ شىققان. قازىر وبلىس ىندەتكە ۇشىراعاندار سانى جونىنەن رەسپۋبليكادا ەڭ سوڭعى ورىندا.
ر.الىشەۆ كارانتيندىك رەجىم اياقتالعانىمەن شەكتەۋ شارالارىنىڭ تەك كەزەڭ-كەزەڭمەن وزگەرتىلەتىنىنە توقتالدى. سونىڭ ىشىندە سۇلۋلىق سالوندارىنىڭ, بارلىق دۇكەندەر مەن بازارلاردىڭ تاڭعى ساعات 10-نان كەشكى ساعات 17-گە دەيىن اشىلاتىنىن ايتتى. «ال كوڭىل كوتەرەتىن ساۋىق ورىندارى, رەستوراندار مەن ءدامحانالار, قوناقۇيلەر ازىرگە اشىلمايدى. ولاردى اشۋ سانيتارلىق-ەپيدەميولوگيالىق جاعدايدىڭ جاقسارا ءتۇسۋىن توسىپ, ازىرگە كەيىنگە قالدىرىلدى», دەدى ر.الىشەۆ.
سونىمەن بىرگە رۋسلان قاناتحان ۇلى بالالاردى جەتىلدىرۋ ورتالىقتارى جانە ت.ب. بالالاردىڭ ۇيىمدارىنىڭ شەكتەۋلى ۋاقىتقا اشىلاتىنىن ايتتى. ال مادەنيەت نىساندارى تەك 30 ادامدىق جيىن كولەمىندە عانا جۇمىس ىستەيدى. دەمالىس ورىندارى مەن سكۆەرلەرگە ءۇش ادامدىق توپتىڭ نەمەسە ءبىر وتباسى مۇشەلەرىنىڭ جينالۋىنا رۇقسات ەتىلگەن. سپورتتىق كوماندالاردىڭ دا 30 ادامدىق توپپەن جاتتىعۋلار وتكىزۋىنە بولادى. بىراق بالالاردىڭ جاتتىعۋلارىنا ءالى دە شەكتەۋ قويىلعان. ءدىني ورىندارعا دا, وتباسىلىق توي-تومالاققا جانە ت.ب. باسقا جيىندارعا توپپەن جينالۋدىڭ شەكتەۋى سول قالپىندا قالدىرىلعان. مونشالار مەن ساۋنالار دا ازىرگە جۇمىس ىستەمەيدى.
13 مامىردان باستاپ اتا-انالارى جۇمىس ىستەيتىن بۇلدىرشىندەر ءۇشىن بالاباقشالاردا ءارتۇرلى جاستاعىلاردى قامتىعان كەزەكشىلىك توپتار اشىلادى. ال باسقا توپتار 18 مامىردان باستاپ جۇمىس ىستەيدى. ەڭ باستىسى سولتۇستىكقازاقستاندىقتار كەشكى ساعات توعىزعا دەيىن اۋلالار مەن كوشەلەردە ءۇش ادامدىق توپپەن نەمەسە وتباسىمەن بەتپەردە كيىپ, ەركىن تىنىستاپ, جۇرە الاتىن بولعان. سونىمەن بىرگە قوعامدىق كولىكتەر دە كەشكى ساعات توعىز جارىمعا دەيىن جۇرە باستايدى. ال شەكارادان ءوتۋدىڭ شەكتەۋلەرى وزگەرتىلمەيدى. وعان شىعاراتىن بلوك-بەكەتتەر دە ساقتالادى. الايدا وبلىس اۋداندارى اراسىنداعىلار الىنىپ تاستالادى.
سولتۇستىك قازاقستان وبلىسى
