كەشەن جۇمىسىمەن تانىسۋعا كەلگەن قالا اكىمى نۇرلىبەك نالىباەۆقا جىلىجاي ديرەكتورى عاني الماتوۆ 2 جىل كولەمىندە جۇزەگە اسقان جوبا جايلى جان-جاقتى ايتىپ بەردى. قازىر 2 گەكتاردان اساتىن جىلىجاي اۋماعىن 2023 جىلعا دەيىن 7 گەكتارعا جەتكىزۋ جوسپارلانۋدا. يسپان تەحنولوگياسىمەن جابدىقتالعان جىلىجاي ەلەكتر جارىعى مەن سۋدان تاپشىلىق كورىپ وتىرعان جوق. تەك تابيعي گاز بەن كۇرە جولدان كەشەنگە جەتكىزەتىن جولدىڭ جوقتىعى ءسال قيىندىق تۋعىزىپ وتىر. قازىر ءار كەلىسىن 250 تەڭگەدەن باعالاپ, ساۋدا ورتالىقتارىنا كۇنىنە بەس تونناعا جۋىق قيار وتكىزىپ وتىرمىز. ماقساتىمىز – سىرتتان كەلەتىن كوكونىستى ازايتىپ, جەرگىلىكتى ءونىمدى كوبەيتۋ. الداعى ۋاقىتتا قىزاناق, بولگار بۇرىشى, باكلاجان ءوسىرۋدى باستايمىز. كۇنىنە 10 تونناعا دەيىن قيار جينايتىن دا مۇمكىندىگىمىز بار. ەگەر تابيعي گاز جەتسە, ءونىم باعاسى دا ارزانداي تۇسەدى, – دەيدى جىلىجاي ديرەكتورى.
قالا باسشىسى كاسىپكەردىڭ باستاماسىنا ساتتىلىك تىلەپ, ماسەلەنىڭ نازارعا الىناتىنىن ايتتى.
قازىر بۇدان بولەك قالاعا قاراستى قاراۋىلتوبە اۋىلدىق وكرۋگىندە 1 گەكتارلىق كەشەن جۇمىس ىستەپ تۇر. ءدال وسىنداي 8 شاعىن جىلىجايدىڭ دا ءونىمى كۇندەلىكتى ساۋدا سورەلەرىنە تۇسۋدە.
جالپى بيىل «قاراپايىم زاتتار ەكونوميكاسى» باعدارلاماسى بويىنشا تاعى 2 گەكتار اۋماققا جىلىجاي كەشەنى سالىنباق. وڭتۇستىك كورەيا تەحنولوگياسى بويىنشا جۇزەگە اساتىن جوبا قۇنى 800 ملن تەڭگە.
