قازىر پەتروپاۆل قالاسىندا تۇراتىن نيكيتا سەمەنوۆ وسىنى دالەلدەپ, كەشە, جەڭىستىڭ 75 جىلدىعىن اتاپ وتكەننەن ءبىر كۇن كەيىن 100 جاسقا تولدى. ول ۇزاق جىلدار بويى ىشكى ىستەر ورگاندارىندا قىزمەت ەتكەن ادام ەكەن. سوندىقتان ونى قۇتتىقتاۋعا سولتۇستىك قازاقستان وبلىستىق پوليتسيا دەپارتامەنتىنىڭ باستىعى مارات تولەباەۆ باستاعان ءبىر توپ وفيتسەرلەر كەلدى.
بۇلار وزدەرى عانا كەلىپ قويماي پوليتسيا دەپارتامەنتىنىڭ ۇرمەلى وركەسترى مەن انشىلەرىن الا كەلىپ, مايدانگەردىڭ اۋلاسىندا, جارقىراعان اشىق كۇننىڭ استىندا, گۇلدەگەن الما اعاشتارىنىڭ باۋىرىندا شاعىن كونتسەرت تە قويىپ بەردى. مارات تولەباەۆ سانيتارلىق نورمالاردى ساقتاي وتىرىپ, مەرەيتوي يەسىن قۇتتىقتاپ, وعان گۇل شوعى مەن سىيلىقتار تاپسىردى. مۇنداي ايرىقشا قۇتتىقتاۋدى بۇرىن-سوڭدى كورمەگەن سول كوپقاباتتى ءۇيدىڭ تۇرعىندارى وزدەرىنىڭ بالكوندارىنان قاراپ, مايدانگەردى قۇتتىقتاعان پوليتسيا دەپارتامەنتىنە ريزاشىلىقتارىن ءبىلدىردى.
مايدان جولىنا توقتالا كەتەتىن بولساق, نيكيتا سەمەنوۆ 1940 جىلى سۆەردلوۆسك قالاسىنان اسكەرگە شاقىرىلعان ەكەن. ول الدىمەن ماسكەۋدى قورعاۋعا قاتىسىپ, جورىق جولىن باتىس ۋكراينادا, بەلارۋسيادا جالعاستىرعان. مەرگەندەر قاتارىنا الىنعان. جەڭىستى 1945 جىلدىڭ 9 مامىرىندا ەستونيادا قارسى الادى. «ەرلىگى ءۇشىن», «موسكۆانى قورعاعانى ءۇشىن» جانە تاعى باسقا كوپتەگەن مەدالدارمەن ناگرادتالعان.
قىرقىنشى جىلداردىڭ سوڭىندا الدىمەن تۋعان جەرىنە كەلىپ, ودان كەيىن قازاقستانعا قونىس اۋدارعان. بۇرىنعى تسەلينوگراد وبلىسىنىڭ استراحان اۋداندىق ميليتسيا بولىمىندە پاسپورت ءبولىمىنىڭ باستىعى بولادى. ىشكى ىستەر ورگاندارىندا 20 جىلدان استام ۋاقىت قىزمەت اتقارعان سوڭ كاپيتان شەنىمەن قۇرمەتتى دەمالىسقا شىققان.
پوليتسەيلەرمەن بىرگە مايدانگەردى «سولتۇستىك قازاقستان وبلىسىنىڭ ىسكەر ايەلدەرى» قۇ وكىلدەرى دە قۇتتىقتادى. اسىرەسە, كونتسەرتتىڭ اياعى اسەرلى بولدى, اڭىزعا اينالعان «پروششانيە سلاۆيانكي» مارشىنا پوليتسەيلەر ساپ تۇزەپ, ىزەت كورسەتىپ, ارداگەردى ۇيىنە دەيىن شىعارىپ سالدى.
قىزىلجار
