كەشەگى قان مايدانعا قاتىسقانداردان قالعان ساناۋلى عانا ارداگەردىڭ ء بىرى 96 جاستاعى ءابدىراحمان بايتىكوۆ. كۋرسك مايدانىنىڭ قاھارمانىنا زياتكەرلىك مەكتەپتىڭ «الاش» شاڭىراعى سىي-قۇرمەت كورسەتىپ, اقساقالدىڭ اق باتاسىن الدى.
وتتى جىلداردا بەلارۋس, پولشا, گەرمانيا مايداندارىندا بولعان تاعى ءبىر جەڭىس باتىرى – ءبورىباي قۇلمان ۇلى بيىل عاسىرلىق تويىن اتاپ وتەدى. «سۇڭقار» شاڭىراعى وكىلدەرىمەن وتكەن كەزدەسۋدە ءبورىباي اتا مايدان دالاسىنداعى ەستەلىكتەرىن ايتىپ, وزىنە كورسەتىلگەن قۇرمەت ءۇشىن ريزاشىلىعىن ءبىلدىردى.
– ەلىمىزدە تىنىشتىق بولسىن, حالقىمىز اۋىزبىرشىلىكتە ءومىر ءسۇرىپ, جاستارىمىز ەلىمىزدىڭ اتىن اسقاقتاتا بەرسىن. ارنايى باس سۇعىپ, جاعدايىمدى سۇراپ كەلگەندەرىنە ۇلكەن راقمەتىمدى ايتامىن. ورەندەرىمىز ءبىلىمدى بولىپ, ەلىنە, جەرىنە قىزمەت ەتەتىن ناعىز مامان يەلەرى بولىپ ءوسسىن, – دەيدى اقساقال.
ماسكەۋ ماڭىندا اۋە شابۋىلىنا قارسى قورعانىس اسكەرىنىڭ ساپىندا سوعىسقان كالەپ بەكتۇرعانوۆقا دا مەكتەپتىڭ شىنايى قۇرمەتى مەن العىسىن 12-سىنىپ وقۋشىسى تامارا روزمەتوۆا جەتكىزدى.
– ەشكىم دە, ەشتەڭە دە ۇمىتىلمايدى. ارداگەرلەردىڭ ەرەن ەرلىكتەرى, قاجىرلى ەڭبەكتەرى مەن تاباندىلىقتارى ءۇشىن باس يەمىز. ءبىزدىڭ ءبىلىم الۋىمىزعا جانە بولاشاققا ماقسات قۇرىپ, ارمانداردىڭ ورىندالۋىنا جول اشىپ, بەيبىت كۇندەردى سىيلاعان اتالارعا العىسىمدى بىلدىرەمىن, جادىمىزدا ماڭگىلىك ساقتالادى, – دەدى تامارا روزمەتوۆا.
جەڭىس باتىرلارىمەن جۇزدەسكەن زياتكەرلەر ەر ەسىمى ماڭگىلىك ەل ەسىندە ساقتالىپ, ەرلىكتەرى ۇرپاقتان ۇرپاققا جەتىپ وتىراتىنىن كورسەتتى.
