الەۋمەتتىك نىساندار قۇرىلىسى قاتارىندا بيىل 100 مەكتەپكە جوندەۋ جۇمىستارى جۇرگىزىلەدى. قىزىلجاردىڭ «بەرەكە» شاعىن اۋدانىندا وسى زامانعى تالاپتارعا تولىق ساي كەلەتىن ەمحانا سالىنباقشى. مادەنيەت سالاسىنىڭ 32 نىسانى كۇردەلى جانە اعىمدىق جوندەۋلەردەن وتكىزىلەدى.
وسىعان بايلانىستى قۇمار ىرگەباي ۇلى ەرەكشە پىكىر ءبىلدىردى. «بۇرىن ءبىز اڭعاراداي مادەنيەت ۇيلەرىن تۇرعىزىپ, ولاردى تەك كونتسەرت كورۋگە, جينالىس وتكىزۋگە عانا قولدانىپ كەلدىك. باسقا ۋاقىتتاردا تەك ورىندىقتاردان تۇراتىن ولار جارىق, جىلۋ, كۇزەت شىعىندارىن بوسقا شىعارىپ, قاڭىراپ تۇراتىن. مىنە, وسىنداي قۇرىلىستاردى قازىر سپورتتىق شارالار وتكىزۋگە دە بەيىمدەۋ كەرەك. ولاردىڭ ىشىنە ترەناجەرلەر ورناتىپ, فيتنەس كلۋبتار ۇيىمداستىرۋعا بولادى. سوندا مادەنيەت ۇيلەرى ءتيىمدى پايدالىناتىن بولادى», دەدى ول.
سونىمەن بىرگە بيىل 777 شاقىرىمدىق جولدار جوندەلەتىندىگى بەلگىلى بولدى. 76 ەلدىمەكەنگە تازا اۋىز سۋ جەتكىزۋ ماسەلەسى شەشىلەدى ەكەن. وسى جۇمىستاردىڭ ءبارى جاڭادان 6400 جۇمىس ورىندارىن اشادى.
سونىمەن بىرگە نىساندار قۇرىلىسىنىڭ جوباسىن ىسكە اسىرۋ كونكۋرسىنا تۇسەتىن ۇمىتكەرلەرگە تالاپتىڭ كۇشەيەتىنىن جەتكىزدى. ءاربىر كومپانيا وزدەرى الىستان تارتاتىن جۇمىسكەرلەرىنە 85 مىڭ تەڭگە قونىستانۋ قاراجاتىن تولەۋگە مىندەتتەلەتىن بولعان. سونىمەن بىرگە اكىم سۋبمەردىگەرلىك دەگەن بولمايتىنىن اتاپ ايتتى. «كونكۋرستى جەڭىپ العاننان كەيىن ءاربىر كومپانيا 3 كۇننىڭ ىشىندە جۇرگىزىلەتىن جۇمىستىڭ سىزباسىن جاساۋى كەرەك. ال ونىڭ ورىندالۋىن حالىق اراسىنان شاقىرىلعان بەلسەندى ازاماتتار, جۋرناليستەر مەن بلوگەرلەردەن, قوعامدىق ۇيىمدار وكىلدەرىنەن قۇرالاتىن كوميسسيا قاداعالاپ وتىرادى. سىزبادان اۋىتقىعان جاعدايدا ءبىز كەلىسىمشارتتى بىردەن ۇزەمىز», دەدى ق.اقساقالوۆ.
سونىمەن بىرگە اكىم قۇرىلىسقا 90 پايىزدىق وتاندىق ماتەريالدار قولدانۋى كەرەكتىگىن ايتتى. سونىڭ ىشىندە وبلىس اۋماعىنداعى قۇرىلىس ماتەريالدارىن وندىرەتىن كاسىپورىنداردىڭ ونىمدەرى قولدانىلماق. «الايدا, وسى تالاپتى پايدالانىپ, كاسىپورىندار ءوز ونىمدەرىنىڭ باعاسىن ءوسىرىپ جىبەرمەۋى قاداعالانسىن», دەدى اكىم.
ءسويتىپ, تەرىستىكتە بيىل قۇرىلىس قارقىندى جۇرگىزىلمەك. كارانتين رەجىمىن ساقتاۋدا وبلىس الدىڭعى قاتارداعى ايماقتار قاتارىنان تابىلىپ, جامان ىندەتتىڭ ورىستەۋىنە جول بەرمەگەن ەدى. ەندى قۇرىلىستاردى دا سول قارقىنمەن اتقارسا قۇبا-قۇپ.
سولتۇستىك قازاقستان وبلىسى
