الايدا, بۇل اۋداندا تۇراتىن تۇرعىنداردىڭ ءبارىن بىردەي باقۋاتتى دەۋگە بولمايدى. ماسەلەن, اۋدان ورتالىعى قۇلسارى قالاسىندا تۇرمىسى تومەن وتباسىلار كەزدەسەدى. سونىڭ ءبىرى – كوپ بالالى باقتىگۇلدىڭ وتباسى. توعىز جىل بۇرىن كۇيەۋى ومىردەن وتكەن. ءتورت بالاسىنىڭ ەكەۋى مۇگەدەك. ال باسپاناسى ابدەن توزعان. تەرەزەدەگى اينەكتىڭ ورنىن پلەنكا الماستىرىپتى.
– بىرنەشە جىل بۇرىن دوسىم ءارى كورشىم ابىلاي تولەپوۆپەن بىرگە ۆولونتەرلىك ءىستى قولعا العان ەدىك. مۇقتاج جاندارعا قولعابىس بەرۋدى كوزدەپ, باستاپقىدا ءوز قاراجاتىمىزدى جۇمسادىق, -دەيدى قۇلسارىلىق دياس يباتاەۆ. –كەيىن ءبىزدىڭ قاتارىمىزعا وزگە دوستارىمىز دا قوسىلدى. ءوزىمىز تۇراتىن №8 اۋىلداعى قاراپايىم تۇرعىندارعا ازىق-ت ۇلىك الىپ بەرىپ جۇردىك. جاقىندا باقتىگۇلدىڭ وتباسىنداعى احۋالمەن تانىسقان سوڭ, جاڭا باسپانا سالىپ بەرۋدى ءجون كوردىك.
ويتكەنى, كوپ بالالى وتباسى تۇراتىن باسپانا ەلۋ جىل بۇرىن سامان كىرپىشتەن سالىنىپتى. ۆولونتەرلار قۇلاۋدىڭ از-اق الدىندا تۇرعان ۇيدەگى كوپ بالالى وتباسىنىڭ تۇرمىسى تۋرالى شاعىن روليك ءتۇسىرىپ, الەۋمەتتىك جەلىدە جاريالادى. قارجى جيناۋ ءۇشىن ارنايى قور قۇردى. بۇل جومارت جۇرەكتى جانداردى بەيجاي قالدىرمادى. قورعا تۇسكەن قارجىنىڭ ەسەبىن الەۋمەتتىك جەلىدە اشىلعان پاراقشادا جاريالاپ وتىرادى.
– ءبىز اۋەلى بۇل وتباسىعا ءۇي جالداپ بەردىك. سودان سوڭ ەسكى ءۇيدى بۇزىپ, ورنىن تازالادىق. باقتىگۇلدىڭ وتباسىمەن اقىلداسىپ, جاڭادان بوي كوتەرەتىن باسپانانىڭ جوباسىن جاسادىق. جوباعا سايكەس, جاڭا ۇيدە ءتورت بولمە بولادى. بۇعان ءاسۇي بولمەسىن قوسىڭىز. جالپى اۋماعى 120 شارشى مەتردى قۇرايدى. سەبەبى, بۇل وتباسىنىڭ كوپ بالالى ەكەنى ەسكەرىلدى, -دەيدى دياس يباتاەۆ.
قازىر ۆولونتەرلار باستاعان ءۇيدىڭ قابىرعاسى بيىكتەپ كەلەدى. ءبىر ەرەكشەلىگى, مۇقتاج جاندارعا كومەك كورسەتۋدى قولعا العان جاستاردىڭ ءبارى – تاۋەلسىزدىكتىڭ قۇرداستارى. ولار جاقىندا ءتورت بالاسىمەن باسپانا تاۋقىمەتىن تارتقان جەسىر انانى جاڭا ۇيگە قونىستاندىرماق. الداعى ۋاقىتتا دا وسىنداي قايىرىمدىلىق ءىستى جالعاستىرۋدى كوزدەپ وتىر.
