سوعىس بالالارى… اكەدەن ەرتە قالعان ولار تاعدىردىڭ تەپەرىشىن كورىپ, ومىردە كوپ نارسەدەن قاعىلدى. سوعىس كەزىندە بالالىعىمىز ۇرلانعان ءبىزدىڭ دە قازىر الدىمىز سەكسەنگە كەلىپ قالدى.
اكەم عوسمانيا دۇرماعامبەتوۆ 1907 جىلى قاراعاندى وبلىسى قارقارالى اۋدانىندا دۇنيەگە كەلگەن. اجەمنىڭ ايتۋىنشا, اكەمىز اقىلدى, كوپتىڭ قامىن ويلاعان, مەيىرىمدى دە ەڭبەكقور جان بولعان. جاستايىنان ەڭبەككە ەرتە ارالاسىپ, سوعىستىڭ الدىندا بالقاشمىس زاۋىتىندا جۇمىس ىستەگەن ەكەن.
1941 جىلى اكەمدى قارقارالىنىڭ اسكەري كوميسسارياتىنان وتان قورعاۋعا شاقىرعاندا مەن 2 جاستا عانا بولىپپىن. 9 جاسار اعام داۋلەتحان مەن 5 جاستاعى اپام ماعيرا ۇشەۋمىز انام مالعيانىڭ قولىندا قالدىق. انام سوعىسقا كەتكەن ازاماتتاردىڭ ورنىنا كولحوزعا جۇمىسقا كىرىپ, بالالارىن اسىراۋ ءۇشىن كوپ جىل ايانباي ەڭبەك ەتتى.
رەسەي فەدەراتسياسى قورعانىس مينيسترلىگىنىڭ باس ءارحيۆىنىڭ رەسمي دەرەكتەرى بويىنشا اكەم عوسمانيا دۇرماعامبەتوۆ 57-ارميانىڭ 156-شى اتقىشتار ديۆيزياسىنىڭ قۇرامىندا سوعىسقان. 1942 جىلدىڭ قازان ايىنا دەيىن ۇيىنە حات جازىپ تۇرعان اكەمىز سول جىلدىڭ 20 قازانىندا بىرنەشە ايعا سوزىلعان داڭقتى ستالينگراد تۇبىندەگى شايقاستا ەرلىكپەن قازا تاپتى. بولشيە چاپۋرنيكي اۋىلىنىڭ باۋىرلاستار بەيىتىندە 57-ءشى ارميانىڭ جاۋىنگەرلەرىمەن بىرگە جەرلەنگەن. تاريحتاعى دەرەكتەرگە سۇيەنسەك, اكەم مايداننىڭ ەڭ قاۋىپتى اۋماقتارىنىڭ بىرىندە سوعىسقان ەكەن.
ستالينگرادتى بەتكە العان گەرمانيا مەن ونىڭ وداقتاستارى اسكەرى قارۋ-جاراقتىڭ بارلىق تۇرىمەن تولىق جاراقتالعان. ستالينگراد شايقاسى ەكىنشى دۇنيەجۇزىلىك سوعىستىڭ بارىسىندا ۇلكەن بەتبۇرىستىڭ باستالۋىنا جول اشقان شايقاس بولدى. نەمىس-فاشيست اسكەرلەرىنىڭ ستالينگراد تۇبىندەگى جەڭىلىسى نەمىس حالقىنا مورالدىق جاعىنان ۇلكەن سوققى بولدى. سول ستالينگرادتى قورعاۋ ءۇشىن مەنىڭ اكەم دە سوڭعى دەمى قالعانشا شايقاسىپ, تەڭدەسى جوق باتىرلىق كورسەتكەن. جاۋعا قاسقايىپ قارسى تۇرىپ, جەڭىستى جاقىنداتۋعا ۇلەسىن قوستى.
ارادا 70 جىل وتكەندە بالالارىم نازگۇل مەن باقىتتى ەرتىپ ۆولگوگراد وبلىسى بولشيە چاپۋرنيكي اۋىلىنا, اكەمنىڭ جەرلەنگەن جەرىنە بارىپ قايتتىم. قابىرىنە تۋعان جەردىڭ ءبىر ۋىس توپىراعىن سالدىق. وسىلايشا كوپتەن بەرى ويىمدا جۇرگەن ۇلكەن ءبىر شارۋانى ءبىتىرىپ, كوڭىلىم جايلانىپ قالدى. بارعان جەرىمىزدە جىلىۇشىراي قارسى العان جەرگىلىكتى حالىققا, بەيىتكە قاراپ, كۇتىم جاساپ جۇرگەن مەكتەپ وقۋشىلارىنا ريزاشىلىعىمىزدى بىلدىردىك. بولشيە چاپۋرنيكي اۋىلىنىڭ ۇلى جەڭىستىڭ 70 جىلدىعىنا وراي ۇيىمداستىرعان سوعىس ارداگەرلەرىنە ارنالعان پارادىنا قاتىستىق.
بالالارىم مەن نەمەرەلەرىمنىڭ ەسىندە سوعىس دالاسىنان قايتپاي قالعان اكەمنىڭ بەينەسى ەرجۇرەك جاۋىنگەر رەتىندە ماڭگى قالاتىنىنا سەنەمىن. بەيبىت زاماننىڭ ورناۋىنا ۇلكەن ۇلەسىن قوسقان مايدانگەرلەردى جاس ۇرپاق قاشاندا زور قۇرمەت تۇتىپ, ەستەن شىعارماۋى كەرەك. بۇل – بىزگە پارىز.
قۇرال دۇرماعانبەتوۆ
قاراعاندى
