ارينە, بۇل ءۇشىن ەڭ الدىمەن كاسىپكەرلىك سالاسى جاندانۋى ءتيىس. قىزىلوردا وبلىسىنىڭ قارماقشى اۋدانىندا تىركەلگەن 3 206 كاسىپكەرلىك نىسانىنىڭ 90,5 پايىزى جۇمىس ىستەپ تۇر. ءوڭىردىڭ نەگىزگى باعىتى اۋىل شارۋاشىلىعى سالاسى بولعاندىقتان قازىر مۇندا اگروونەركاسىپتىك كەشەندى دامىتۋعا باسىمدىق بەرىلىپ وتىر.
قازىر اۋداندا ەگىنمەن قاتار ءتورت ت ۇلىكتى تۇلەتىپ وتىرعاندار دا كوپ. وسىنىڭ ارقاسىندا سالا تابىسى مال شارۋاشىلىعى ونىمدەرىنىڭ ەسەبىنەن ارتۋى بايقالادى.
بيىل قارماقشىلىق ديقاندار 22920 گەكتارعا ەگىس ەگۋدى جوسپارلاسا, سونىڭ 13170 گەكتارى كۇرىش. بيداي 667, ارپا 150, ماقسارى 352, سويا كولەمى 170 گەكتار بولماق. مال ازىعىندىق داقىلدار 6900, جۇگەرى 200 گەكتارعا ەگىلەدى. قازىر بيداي, ارپا, ماقسارى, جوڭىشقا ەگۋ تولىق اياقتالدى. ودان بولەك ت.كومەكباەۆ اۋىلدىق وكرۋگىندە ناسوس كومەگىمەن سۋارىلاتىن 5 گەكتار, الداشباي احۋن اۋىلدىق وكرۋگىندە جابىندى استىنا ەگىلگەن 13 گەكتار باقشا, كوكونىس داقىلدارى كۇتىمگە الىندى.
بيىل اۋدانداعى تاعى ءبىر جاڭالىق – ەلدى مەكەن تۇرعىندارىنىڭ ازىق-ت ۇلىك قورىن قالىپتاستىرۋ ءۇشىن جالپى كولەمى 1307 گەكتار القاپقا كارتوپ, كوكونىس جانە باقشا داقىلدارىن ەگۋ مەجەلەنىپ وتىر. وسىعان بايلانىستى اۋدان اكىمدىگى باستاماسىمەن بارلىق ەلدىمەكەندە تۇرعىندار باقشا ەگەتىن القاپتاردى ينۆەستورلار دايىنداپ بەردى. قازىر اۋىلداردا جاپپاي باقشا ەگۋ باستالدى. كەيبىر ونىمدەردىڭ ساپالى تۇقىمدارى سىرت وڭىرلەردەن اكەلىندى.
ازىرشە اۋدانعا كوكونىس ونىمدەرى وڭتۇستىك وڭىرلەردەن تاسىمالدانۋدا. ەرتەڭ كۇزدە قارماقشىلىقتار داستارحانعا وزدەرى ەككەن ءونىم تۇرلەرىن قويا باستايدى.
ءار اۋىلدىڭ ىرگەسىندەگى باقشالىقتاردىڭ اياق سۋمەن قامتىلۋى اۋدان اكىمدىگىنىڭ نازارىندا بولادى. وسىعان بايلانىستى كەشە اۋدان اكىمى مۇسا قالداربەكوۆ سۋ توسپالارى مەن ارنالار جاعدايىمەن تانىستى.
جوسالى كەنتىنەن 65 شاقىرىم قاشىقتىقتا ورنالاسقان «گەنەرال», «توعىزقۇدىق - ءالتاي» جانە «قاشقانسۋ» كولدەرىندە بولىپ, ماماندارمەن سۋدى ەگىستىككە پايدالانۋدىڭ جولدارىن تالقىلادى. ساپار اياسىندا «قوجانتاي» سۋ توسپاسىنىڭ جاي-كۇيىمەن تانىستى.
- ەگىستىكپەن قاتار شابىندىقتاردىڭ دا سۋارىلۋىن نازاردان تىس قالدىرۋعا بولمايدى. ءبىزدىڭ اۋدان ءۇشىن سۋ ماسەلەسى باستى ماسەلە بولعاندىقتان توسپالاردىڭ جاعدايى مەن كانالداردىڭ ۋاقىتىلى تازارتىلۋىن قاداعالاۋ كەرەك, – دەدى اۋدان باسشىسى.
اۋدانداعى ەگىن القاپتارى قۋرايلى, ناۋرىزباي, بالاجارما, وڭجاعالاۋ كانالدارى ارقىلى سۋارىلادى. بيىل وبلىستىق بيۋدجەتتەن قارجى ءبولىنىپ, قۋرايلى ارناسىنىڭ 22 شاقىرىمى تازارتىلعان بولاتىن. بۇل شارۋاشىلىقتارداعى اياق سۋ ماسەلەسىن جەڭىلدەتۋگە مۇمكىندىك بەرەدى.
