ەندى سول جۇمىسشىلار كارانتين تالابىن جەڭىلدەتۋدى تالاپ ەتىپ وتىر. الايدا, ولاردىڭ بۇل تالابىنا رۇقسات بەرىلگەن جوق.
–«COC Realty» كومپانياسىنىڭ 100-گە جۇمىسشىسى 2 مامىر كۇنى كەشكە ءوز تالاپتارىن ءبىلدىرۋ ءۇشىن جينالعان. بۇرىن بۇل كومپانيانىڭ ءبىر جۇمىسشىسىنان كوروناۆيرۋس ينفەكتسياسىن جۇقتىرۋ فاكتىسى انىقتالعان ەدى. سوعان وراي بارلىق جۇمىسشى كارانتيندىك ستاتسيونارعا اۋىستىرىلدى. جۇمىسشىلار تۇرمىستىق جاعداي تالابىن جەڭىلدەتۋدى تالاپ ەتتى. سونىڭ ىشىندە ورتاق تەمەكى تارتاتىن ورىنعا بارۋعا, ورتاق ورىندا تاماق ىشۋگە, بىرگە ۋاقىت وتكىزۋگە رۇقسات سۇرايدى. بۇل وقشاۋلانۋ رەجىمىنىڭ تالابىن بۇزۋ بولىپ سانالاتىندىقتان, رۇقسات بەرۋدەن باس تارتىلدى, -دەپ حابارلادى توتەنشە جاعداي رەجيمىن قامتاماسىز ەتۋ جونىندەگى وڭىرلىك جەدەل شتابتان.
جۇمىسشىلار سونداي-اق كارانتيننىڭ ەنگىزىلۋىنە بايلانىستى ەڭبەكاقىعا ۇستەمەاقى قوسىلعانىن قالاپ وتىر. ويتكەنى, ولاردىڭ كوپشىلىگى ەكىنشى ۆاحتالىق اۋىسىمدا جۇمىسىن جالعاستىرۋدا.
–3 مامىردا جۇمىسشىلارمەن اكىمدىكتىڭ قىزمەتكەرلەرى مەن جۇمىس بەرۋشى كەزدەستى. ەڭبەكاقى تولەۋ جونىندەگى ماسەلە شەشىمىن تاپتى, -دەدى وڭىرلىك جەدەل شتابتان.
وڭىرلىك جەدەل شتابتىڭ مالىمەتىنە سۇيەنسەك, تەڭىز كەنىشىنەن جۇمىسشىلاردى تۇرعىلىقتى مەكەنجايىنا دەيىن شىعارۋ جالعاسىپ جاتىر. وسى كەزگە دەيىن 13 مىڭنان استام جۇمىسشى ءوز وڭىرلەرىنە جەتكىزىلدى.
