ناقتىلاپ ايتساق, قازىرگى كەزدە كوروناۆيرۋسكە بايلانىستى سپورتتىق جارىستاردىڭ بارلىعى دا توقتاتىلعانى بەلگىلى. سونىڭ سالدارىنان كوپتەگەن سپورتشىلار قازىرگى كەزدە ماتەريالدىق تۇرعىدان قيىن كەزەڭدەردى باسىنان كەشىرۋدە. تەننيسشىلەردى قولداۋ ماقساتىندا سەربيانىڭ سايىپقىرانى نوۆاك دجوكوۆيچ جاڭا باستاما كوتەرىپ, الەمدىك رەيتينگتە ۇزدىك بەستىكتە تۇرعان تەننيسشىلەر 30 000 دوللاردان, وزىق وندىقتىڭ قاتارىنا ەنگەندەر 20 000 دوللاردان, 11-20 ساتىلارعا جايعاسقاندار 15 000 دوللاردان قايىرىمدىلىق قورىنا اۋدارۋعا ءتيىس ەدى. ونىڭ بۇل يدەياسىن اتاق-داڭقتارى الىسقا جايىلعان يسپانيالىق رافاەل نادال مەن شۆەيتساريالىق رودجەر فەدەرەر تولىقتاي قولدادى.
دەسەك تە بۇل باستاماعا قارسىلىق ءبىلدىرىپ جاتقان ساڭلاقتار دا بار. سولاردىڭ ءبىرى – للەيتون حيۋيتت. اۋستراليانىڭ اتاقتى تەننيسشىسى ونداي قادامعا بارۋدىڭ ەش قاجەتى جوق دەپ ەسەپتەيدى. جاسىل قۇرلىق وكىلىنىڭ ايتۋىنشا, «توپ-100» ويىنشىنىڭ قاتارىنا ەنىپ وتىرعانداردىڭ وزدەرىنىڭ دە قازىرگى كەزدە جاعدايلارى ءماز ەمەس. ول ۇزدىكتەر تىزىمىندە العاشقى بەستىكتە تۇرعان مىقتىلار جوعارىدا كورسەتىلگەن سوممادان كوبىرەك قارجى بەرسە دە, قالتالارى جۇقارىپ قالمايدى دەپ ەسەپتەيدى.
39 جاستاعى للەيتون حيۋيتت وسىدان ءتورت جىل بۇرىن ۇلكەن سپورتتان قول ۇزگەن. كەزىندە ول اقش-تىڭ اشىق بىرىنشىلىگى مەن ۋيمبلدوندا توپ جارىپ, اتر تۋرنيرلەرىندە 30 مارتە دارا شىققان. 2001 جىلى اۋستراليانىڭ تەننيسشىسى الەمنىڭ ءبىرىنشى راكەتكاسى اتاندى.
