مۇرات ايتەنوۆ الدىمەن ارعىنبەكوۆ كوشەسىنىڭ بويىنان سالىپ جاتقان 1200 ورىندىق مەكتەپتەگى قۇرىلىس بارىسىن كوردى. بۇگىندە «اتامەكەن كورپوراتسياسى» قۇرىلىسىن جۇرگىزىپ جاتقان عيماراتتىڭ قابىرعاسى كوتەرىلىپ, شاتىرى جابىلعان. 3 گەكتار جەرگە ورنالاسقان مەكتەپتىڭ قۇرىلىسىنا 1 ملرد 900 ملن تەڭگە قاراستىرىلعان. مەردىگەر كومپانيا نىساندى قىركۇيەك ايىندا تاپسىرۋدى جوسپارلاپ وتىر.
قالا اكىمى ودان سوڭ اسار-2 شاعىن اۋدانىندا بوي كوتەرىپ جاتقان 1200 ورىندىق مەكتەپكە باردى. ىرگەتاسى قاڭتار ايىندا قالانا باستاعان ءبىلىم وشاعى جوسپار بويىنشا جەلتوقساندا ءبىتۋى ءتيىس. قۇرىلىستى جۇرگىزىپ جاتقان «مك تەحنوستروي سەرۆيس» كومپانياسىنىڭ وكىلدەرى پاندەمياعا بايلانىستى ەلدەگى توتەنشە جاعداي كەزىندە عيماراتتىڭ سىرتقى قاسبەتىنە قويىلاتىن كەراموگرانيتتى رەسەيدەن الدىرۋ قيىن بولىپ جاتقانىن العا تارتتى. قيىن تۇستا كومەكتەسۋگە ءازىر ەكەنىن ايتقان مۇرات دۇيسەنبەك ۇلى مۇنداي قۇرىلىس زاتتارىن وتاندىق ونىمدەردەن الۋعا ۇسىنىس بەردى.
سودان كەيىن قالا باسشىسى سامال-3 شاعىن اۋدانىنداعى №6 ەمحانا ماڭىنان بوي كوتەرىپ جاتقان مەكتەپ قۇرىلىسىنىڭ بارىسىمەن تانىستى. قۇرىلىسىنا بيۋدجەتتەن 2 ميللياردقا جۋىق قارجى بولىنگەن ءبىلىم وشاعى ساناۋلى كۇندە دايىن بولادى ەكەن. جاڭا عيماراتتى ارالاپ كورگەن مۇرات دۇيسەنبەك ۇلى مەكتەپتى جاقىن كۇندەرى قابىلداپ, قىركۇيەكتە وقۋشىلاردى قابىلداۋعا دايىنداۋدى تاپسىردى.
بيىل شىمكەنتتە 9 مەكتەپتى پايدالانۋعا بەرۋ كوزدەلىپ وتىر. ونىڭ ۇشەۋى 1200 ورىندىق جاڭا مەكتەپ بولسا, بەسەۋى 300 ورىندىق قوسىمشا قۇرىلىس. تاعى بىرەۋى 100 ورىندىق ساز مەكتەبى بولماق.
شىمكەنت
