بارشا جۇرتشىلىق بولىپ اسىعا كۇتكەن مەملەكەت باسشىسىنىڭ بۇگىنگى مالىمدەمەسىن وقي وتىرىپ, وسىنداي كۇردەلى كەزەڭدى ويداعىداي ەڭسەرۋدەگى جان-جاقتى زەردەلەنگەن, باتىل قادامداردىڭ «كوز كورىپ, قول ۇستاعان» ءاربىر ناقتى ناتيجەسى ءۇشىن كەۋدەڭدى زور ماقتانىش سەزىمى كەرنەيدى.
قاسىم-جومارت كەمەل ۇلىنىڭ سارالانعان سالماقتى ءسوزىن ۇلتتىق مۋزەي ۇجىمى ءارى قۋانىشپەن, ءارى ىستىق ىقىلاستى قولداۋمەن قابىلدادى.
بىردەن ايتۋ كەرەك, مەملەكەتكە دەگەن ەل سەنىمىنە ەش سەلكەۋ ءتۇسىپ كورگەن ەمەس, قايتا قالىڭ قاۋىم بولىپ كارانتينگە بايلانىستى قويىلعان ءاربىر تالاپتى جوعارى جاۋاپكەرشىلىكپەن ورىنداپ كەلەدى.
ەجەلدەن كەلە جاتقان: «اپات ايتىپ كەلمەيدى», دەگەن ءسوز بار.كۇللى الەمدى دۇربەلەڭگە سالعان ىندەت, وكىنىشكە قاراي, مۇنى تاعى ءبىر دالەلدەپ بەردى.
دەگەنمەن «قامدانعان قاپى قالمايدى» دەگەنگە سۇيەنسەك, ءتاجدى تاجال الەگى تاۋەلسىز قازاقستانىمىزدىڭ بەرىك ىرگەسىن شايقالتا المادى.
قانشاما اۋىر سوقسا دا – ەگەمەندىكتىڭ العاشقى جىلدارىنان بەرگى نىق قالىپتاسقان ەل باسقارۋ داعدىسى, الەمدى تاڭعالدىرعان جان-جاقتى جەتىستىكتەرىمىز, بۇل ەكەۋىنە – حالقىمىزدىڭ تەمىردەي تارتىپكە باعىنعان اسىل قاسيەتى قوسىلىپ: كەسىرلى كەسەلدىڭ زاردابى كەڭ كولەمدە تامىر جايا المادى.
توتەنشە جاعداي كەزىندە پرەزيدەنت باستاماسىمەن ىسكە قوسىلعان قولداۋدىڭ ەكى پاكەتى ناتيجەسىندە كوپتەگەن ازاماتتار ناقتى جاردەمگە قول جەتكىزدى.
پرەزيدەنت ايتقان: «قوعامنىڭ ءاربىر مۇشەسى مەملەكەتتىك قامقورلىقتان تىس قالمايدى», دەگەن ۋادەگە كۇنى بۇگىن قارجىلاي كومەككە يە بولعان 4 ميلليون 250 مىڭ ادامنىڭ ارقايسىسى كۋاگەر بولا الادى.
مۇنىڭ سىرتىندا كەڭ بايتاق ەلىمىز بويىنشا قانشاما اۋقىمدى قايىرىمدىلىق شارا اتقارىلىپ جاتىر.
قادەري-حالىمىزشە ءبىز دە ايانىپ قالمايمىز.
شۇعىلالى شۋاققا ماڭدايىڭدى توسىپ, كەڭ كوشەدە ەمىن-ەركىن ادىمدايتىن كۇنگە كوپ قالعان جوق.
ءبىزدىڭ ءبارىمىزدىڭ بىرىككەن كۇرەسىمىز سول كۇندى جاقىنداتا تۇسەدى.
ارىستانبەك مۇحامەدي ۇلى,
قازاقستان رەسپۋبليكاسى ۇلتتىق مۋزەيىنىڭ ديرەكتورى
