ايماقتار • 29 ءساۋىر، 2020

مەملەكەت جاردەمى – كوپ وتباسى ءۇشىن مۇمكىندىك

28 رەت كورسەتىلدى

قىزىلوردا وبلىسىندا توتەنشە جاعداي كەزىندە تابىسىنان ايىرىلعان ازاماتتار مەن الەۋمەتتىك جاعىنان از قامتىلعان وتباسىلارعا مەملەكەت قولداۋى دەر كەزىندە جەتۋى ءۇشىن جۇيەلى جۇمىس جاسالىپ جاتىر. وسى كۇنى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى ماماندارى كارانتين تالاپتارىن بارىنشا ساقتاي وتىرىپ، قاۋىرت جۇمىسقا كوشكەن.

باسقارما ماماندارىنىڭ ايتۋىنشا، وبلىستا 42500 تەڭگە الەۋمەتتىك تولەم الۋعا تىركەلگەن 186 مىڭ 749 ادامنىڭ 179018-ءى وسى كومەكتى الىپتى. ولاردىڭ جارتىسىنا جۋىعى وبلىس ورتالىعىنىڭ تۇرعىندارى.

– ءبىز نەگىزى وسى تولەمدى الۋ جولدارىن تۇسىندىرەمىز. اسىرەسە بىرىڭعاي جيىنتىق تولەمى مەن ءوتىنىمى اراسىن الشاقتاتىپ العان كەيبىر ازاماتتىڭ الەۋمەتتىك تولەمدى الا الماي قالۋى ءجيى كەزدەسىپ وتىر. ولارعا ءبىزدىڭ ءبولىم ماماندارى ءوتىنىم بەرۋدە كومەك كورسەتەدى. ويتكەنى مەملەكەت قولداۋىنان ءتيىستى ازاماتتاردىڭ ەشقايسىسى شەت قالماۋى كەرەك، – دەيدى حالىقتى جۇمىسپەن قامتۋ ءبولىمىنىڭ باسشىسى جانار داۋلەتباەۆا.

 وسى ۋاقىتقا دەيىن Nur Otan پارتياسىنىڭ ء«بىز بىرگەمىز» اكتسياسى اياسىندا وبلىستا 7 798 وتباسىنا جالپى قۇنى 83،6 ملن تەڭگە بولاتىن ازىق-ت ۇلىك سەبەتى تاراتىلدى.

 ەل ازاماتتارى اراسىنان بۇل اكتسياعا قولداۋ كورسەتىپ وتىرعاندار از ەمەس. ولاردىڭ ءبىرى قورعا قارجى اۋدارسا، ەندى ءبىرى پارتيا فيليالدارى ارقىلى مۇقتاج ازاماتتار ءتىزىمىن الىپ، ەرىكتىلەرمەن بىرگە كومەك كورسەتۋدە. ماسەلەن، ابزال ي ك تس 100، ال Ai-Sultan Company جشس 20 وتباسىعا جاردەم جاسادى. وسى ىندەتتىڭ الدىن الۋ ءۇشىن اشىلعان وبلىستىق قورعا «ابزال ي ك» تس توراعاسى، Jas Otan جق ورتالىق كەڭەسىنىڭ مۇشەسى ماعجان ەراليەۆ، وبلىستىق ماسليحاتتاعى Nur Otan پارتياسى دەپۋتاتتىق فراكتسياسىنىڭ مۇشەلەرى باقداۋلەت ماحاشوۆ، اسقار ماحامبەتوۆ، نۇريددين ءاميتوۆ، مۇرات سارسەنباەۆ سەكىلدى ازاماتتار قارجى اۋداردى. جەتەكشى پارتيا فيليالدارىنا مۇنداي وتباسىلار ءتىزىمىن قالالىق، اۋداندىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار بولىمدەرى ۇسىنىپ وتىر.

 «Birgemiz» قوعامدىق قورىنىڭ وڭىرلىك فيليالى «Birgemiz-Kyzylorda» ارقىلى قىزىلوردا قالاسىنداعى 6313 وتباسى 50 مىڭ تەڭگە كولەمىندەگى ءبىر رەتتىك قارجىلاي كومەككە يە بولدى. بۇل كومەكتىڭ ەكىنشى ترانشىندا 7 796 وتباسىن قامتۋ جوسپارلانىپ وتىر.

 «Birgemiz-Kyzylorda» قورىنىڭ قۇرىلتايشىلارى، قامقورشىلىق كەڭەس قۇرامى جاساقتالدى. ونىڭ قۇرامىنا پارتيانىڭ الەۋمەتتىك باستامالارىنا قولداۋ كورسەتىپ كەلە جاتقان، وبلىسقا بەلگىلى ازاماتتار مەن ازاماتتىق قوعامنىڭ بەدەلدى وكىلدەرى، كوپ بالالى انالار ەنىپ وتىر. قور جۇمىسى تۋرالى بارلىق اقپارات الەۋمەتتىك جەلىدەگى ارنايى پاراقشالاردا جاريالانادى.

– سونىمەن قاتار قازىر ىندەتتىڭ كەڭ تارالۋىنا بايلانىستى تىكەلەي بايلانىستى بولدىرماۋ ماقساتىندا ازىق-ت ۇلىك پەن تۇرمىستىق جيىنتىعى ءار الۋشىنىڭ ەسەپشوتىنا اقشالاي اۋدارىلادى. ول 5567 تەڭگە بولىپ وتىر، – دەيدى باسقارمانىڭ الەۋمەتتىك كومەك ءبولىمىنىڭ باسشىسى شاريزات الماشەۆا.

 وتكەن ايدا رەسپۋبليكالىق بيۋدجەتتەن وبلىس بويىنشا 16647 بالاعا 92 ملن تەڭگە تولەنگەن. ازىق-ت ۇلىك پەن تۇرمىستىق جيىنتىق الۋشىلاردىڭ كەڭەيگەن تىزىمىنەن كەيىن ءبىرىنشى جانە ءۇشىنشى توپتاعى مۇگەدەكتەرگە، مۇگەدەك بالالارعا، سونداي-اق مۇگەدەك بالالار كۇتىمىمەن وتىرعان انالارعا، اتاۋلى الەۋمەتتىك كومەك الاتىن وتباسىنىڭ 6-18 جاس ارالىعىنداعى بالالارىنا جانە جۇمىسپەن قامتۋ ورتالىقتارىندا تىركەۋدە تۇرعاندارعا بەرىلەتىن بۇل كومەك وسى ايدا 60300 ادامعا تيەسىلى. ولاردىڭ 37400-ىنە 208،4 ملن تەڭگە اۋدارىلدى. قالعان ازاماتتار اي سوڭىنا دەيىن الىپ ۇلگەرەدى.

وسىلايشا مەملەكەت پەن جۇرتقا جاردەم جاساۋعا اسىققان ازاماتتار كومەگى كوپتەگەن وتباسى ءۇشىن توتەنشە جاعدايدان قينالماي شىعۋدىڭ مۇمكىندىگىنە اينالىپ وتىر.

 

قىزىلوردا

 

سوڭعى جاڭالىقتار

تۇركىستان جاسىل قالاعا اينالۋدا

وڭتۇستىك قازاقستان • كەشە

ۇقساس جاڭالىقتار