شىعىس قازاقستان: وسكەمەندە تەگىن تەكسەرىلۋگە بولادى

وسكەمەندە بيوماتەريالدار قابىلدايتىن ءموبيلدى بەكەتتەر جۇمىس ىستەي باستادى. 25 ساۋىردەن جۇمىس ىستەي باستاعان بۇل بەكەتتەردە تەگىن جەدەل تەست نەمەسە پتسر ءادىسى ارقىلى سىناما تاپسىرۋعا بولادى. ول ءۇشىن اۋەلى cdl.kz سايتىندا ءوتىنىم قالدىرۋ قاجەت. مۇنداي بەكەتتەر بۇعان دەيىن نۇر-سۇلتان، كوكشەتاۋ جانە سەمەي قالالارىندا اشىلعان بولاتىن. جوبانىڭ دەمەۋشىسى «Aitas KZ» اق ءموبيلدى بەكەتتەردىڭ جۇمىسىنا 40 ميلليون تەڭگەگە جۋىق قاراجات ءبولىپتى. ال جوبانىڭ وپەراتورى – «وليمپ» كلينيكالىق-دياگنوستيكالىق زەرتحاناسى.

ەرەكشە اتاپ وتەرلىگى، ءموبيلدى بەكەتتەر عيماراتتاردان الشاق، اشىق جەرلەرگە ورناتىلعان. سىناما تاپسىراتىن ادامدار بايلانىسقا تۇسپەس ءۇشىن بەلگىلى ءبىر ۋاقىتتا شاقىرتىلىپ، كەزەكسىز كىرەدى. مۇنداعى دارىگەرلەر كەلۋشىلەرمەن ميكروفون ارقىلى سويلەسىپ، ارنايى قۇرالدىڭ كومەگىمەن بيوماتەريال الاتىن كورىنەدى. تۇرعىندارعا تەستتى تاپسىرۋ تەگىن. ەكسپرەسس تەست ءبىر رەت پايدالاناتىن  قۇرالدارمەن الىنادى ەكەن. سوندىقتان دا قاۋىپسىز دەۋگە بولادى. «الەمدەگى جانە ەلىمىزدەگى جاعدايلاردى ءجىتى قاداعالاپ وتىرعاندىقتان ىندەتكە قارسى كۇرەستىڭ ەڭ ءتيىمدى جولى ينفەكتسيا جۇقتىرعان ازاماتتار مەن ولارمەن بايلانىستى بولعانداردى دەر كەزىندە انىقتاپ، وقشاۋلاۋ ەكەندىگىن جاقسى بىلەمىز. «وليمپ» زەرتحاناسىمەن بىرلەسكەن جوبامىز بۇل پروتسەستى جەڭىلدەتەدى دەپ سەنەمىز. 1 بوكس  ءبىر ساعاتتا 12 ادامعا دەيىن قابىلدايدى. جۇمىس كەستەسى تاڭعى 8.00-دەن ساعات 17:00-گە دەيىن سوزىلادى. شتاتتا 4 مامان ەكى اۋىسىممەن جۇمىس ىستەيدى: مەيىربيكە، تىركەۋشى جانە سانيتار. جوبانى ىسكە قوسۋ ءۇشىن 50 000 جەدەل تەست، 38 دەزينفەكتسيا جاسايتىن قۇرالدار مەن وكپەنى جاساندى جەلدەتەتىن 6 اپپارات ساتىپ الدىق. ونىڭ 4-ءۋى وسكەمەن قالاسى مەن كاتونقاراعاي اۋدانىنىڭ اۋرۋحانالارىنا، قالعانى اقمولا وبلىسىنا بەرىلەدى» دەيدى «Aitas KZ» اق باس ديرەكتورى سەرىك تولىقباەۆ.

كومپانيا وكىلى سەرىك ءجۇنىسوۆتىڭ ايتۋىنشا، جوبانى جۇزەگە اسىرۋعا 213 ميلليون تەڭگە جۇمسالعان. ال 25-ىنەن بەرى 200-دەن استام ادام جەدەل تەستتەن ءوتىپتى.

شىعىس قازاقستان وبلىسى