قوعام • 27 ءساۋىر، 2020

ءبىرجان نۇرىمبەتوۆ جۇمىس بەرۋشىلەردى «قاۋىپسىز ەڭبەك» ءىس-شارالارىن وتكىزۋگە شاقىردى

15 رەت كورسەتىلدى

دۇنيەجۇزىلىك ەڭبەكتى قورعاۋ كۇنى قارساڭىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ جۇمىس بەرۋشىلەرگە، كاسىپوداقتار مەن ەڭبەك ۇجىمدارىنا «قاۋىپسىز ەڭبەك» ۇرانىمەن ءىس-شارالار وتكىزۋگە، سونداي-اق «Vision Zero» نولدىك جاراقاتتانۋ تۇجىرىمداماسىنا قوسىلۋعا شاقىردى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.

- جىل سايىن 28 ساۋىردە دۇنيەجۇزىلىك ەڭبەكتى قورعاۋ كۇنى اتاپ وتىلەدى. 2020 جىلى ونىڭ تاقىرىبى «پاندەميانى توقتاتۋ: جۇمىستاعى قاۋىپسىزدىك پەن دەنساۋلىق ادام ءومىرىن ساقتاپ قالادى» دەپ جاريالاندى. 28 ساۋىردە الەمدىك جۇرتشىلىقپەن ىنتىماقتاسا وتىرىپ ءبىز وندىرىستە زارداپ شەككەن قىزمەتكەرلەرگە قۇرمەت كورسەتەمىز، ەڭبەك قاۋىپسىزدىگى جانە ەڭبەكتى قورعاۋ جونىندەگى شارالاردى ساقتاۋعا شاقىرامىز، ەڭبەك مادەنيەتىن ناسيحاتتايمىز، -دەدى مينيستر.

ونىڭ ايتۋىنشا، الەمدە جىل سايىن 2 ملن-نان استام ادام قازا تاباتىن 270 ملن جازاتايىم وقيعا جانە 160 ملن كاسىبي اۋرۋلار تىركەلەدى.

- وكىنىشكە قاراي، مۇنداي جاعدايلار ءبىزدىڭ ەلدە دە ورىن الىپ جاتادى. رەسپۋبليكامىزدىڭ كاسىپورىندارىندا جىل سايىن 1300-دەن استام قىزمەتكەر جاراقات الادى. 2020 جىلعى ءبىرىنشى توقساننىڭ قورىتىندىسى بويىنشا زارداپ شەككەندەردىڭ سانى 341 ادامدى قۇرادى. زياندى جانە قاۋىپتى ەڭبەك جاعدايلارىندا 2019 جىلى 370 مىڭنان استام قىزمەتكەر جۇمىس ىستەدى: شۋ مەن ءدىرىلدىڭ جوعارى دەڭگەيى جاعدايىندا ءاربىر ەكىنشى (45،9%)، جۇمىس ايماعىنىڭ جوعارى گازدانۋى مەن شاڭدانۋى جاعدايىندا ءاربىر ءۇشىنشى (32،6%) جۇمىسكەر ەڭبەك ەتتى. 94 مىڭ ادام نەمەسە ساۋالناماعا قاتىسقان كاسىپورىندار قىزمەتكەرلەرىنىڭ سانىنان 5،6%-ى اۋىر دەنە ەڭبەگىمەن اينالىسقان، - دەدى ب.نۇرىمبەتوۆ.

ءمينيستردىڭ سوزىنە سۇيەنسەك، وتكەن جىلى 676 مىڭ قىزمەتكەر زياندى ەڭبەك جاعدايلارىنداعى جۇمىس ءۇشىن 128 ملرد تەڭگە كولەمىندە ءتۇرلى وتەماقى الدى.

- قازاقستاندا 2020-2021 جىلدارعا ارنالعان جۇمىسپەن قامتۋدىڭ جول كارتاسىن ىسكە اسىرۋ باستالدى، ونىڭ اياسىندا 255 مىڭ ادامدى جۇمىسپەن قامتۋ جوسپارلانعان. ءبىز جۇمىس بەرۋشىلەردى جۇمىسشىلارعا قاۋىپسىز ەڭبەك جاعدايلارىن جاساۋعا شاقىرامىز. جاراقاتتانۋدى جانە ەڭبەك جاعدايلارى زياندى جۇمىس ورىندارىنىڭ سانىن ازايتۋ ماقساتىندا ۇكىمەت قاۋلىسىمەن 2019 جىلى وندىرىستىك جاراقاتتانۋدى جانە ەڭبەك جاعدايلارى زياندى جۇمىس ورىندارىن ازايتۋ جونىندەگى 2019 - 2023 جىلدارعا ارنالعان جول كارتاسى بەكىتىلدى.

ۇيىمداردا ەڭبەكتى قورعاۋدى باسقارۋ جۇيەسىن ەنگىزۋ تەتىگىن كوزدەيتىن ەڭبەك ماسەلەلەرى جونىندەگى زاڭ جوباسى پارلامەنت سەناتىنىڭ قاراۋىندا.

زاڭ جوباسى قابىلدانعاننان كەيىن ەڭبەكتى قورعاۋدى باسقارۋ جۇيەسى جۇمىسشىلاردىڭ قاۋىپسىزدىگى مەن دەنساۋلىعىنىڭ ساقتالۋىنا جۇمىستاعى قاۋىپتى فاكتورلاردىڭ اسەرىن انىقتاۋ ءۇشىن ولاردان تۋىندايتىن تاۋەكەلدەردى تالداۋعا نەگىزدەلەتىن بولادى.

جۇمىس بەرۋشىلەردى، كاسىپوداقتاردى، ەڭبەك ۇجىمدارىن «قاۋىپسىز ەڭبەك» ۇرانىمەن ءىس-شارالار وتكىزۋگە، سونداي-اق «Vision Zero» نولدىك جاراقاتتانۋ تۇجىرىمداماسىنا قوسىلۋعا شاقىرامىز. وتكىزىلگەن ءىس-شارالاردىڭ نەگىزگى ماقساتى وندىرىستىك جاراقاتتانۋدىڭ الدىن الۋ، قاۋىپسىز ەڭبەكتى ناسيحاتتاۋ جانە قىزمەتكەرلەردىڭ ەڭبەك پروتسەسىنىڭ قاۋىپسىزدىگىنە سانالى كوزقاراسىن ارتتىرۋ بولىپ تابىلادى. ول ءۇشىن بىزگە بارلىق مۇمكىندىكتەردى پايدالانۋ قاجەت، – دەلىنگەن ءبىرجان نۇرىمبەتوۆتىڭ مالىمدەمەسىندە.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار