بۇلاردىڭ ءبارىن سەرىكتەستىك ماماندارى 80 مىڭ شارشى مەتر اۋماقتا ورنالاسقان وندىرىستىك بازادا دايىندايدى. بىلتىر سەرىكتەستىكتىڭ ءوندىرىس كولەمى 8 ملرد تەڭگەنى قۇرادى. سەرىكتەستىكتىڭ باس ديرەكتورى نۇركەن ەسقاليەۆتىڭ ايتۋىنشا, كاسىپورىننىڭ وندىرىستىك بازاسىندا جىلىنا 24 مىڭ توننا مەتالل كونسترۋكتسيالارىن شىعارۋعا بولادى.
– ءبىز 2016 جىلى رەكونسترۋكتسيالاۋدىڭ ءبىرىنشى كەزەڭىن اياقتادىق. سونىڭ ارقاسىندا زاۋىتتىڭ ونىمدىلىگى 10 ەسەگە ارتتى. قازىر كاسىپورىندا 450 ادام جۇمىس ىستەيدى. ءبىزدىڭ تاپسىرىس بەرۋشىلەرىمىز – قاشاعان, تەڭىز, قاراشىعاناق كەن ورنى سەكىلدى حالىقارالىق جوبالاردا جۇمىس ىستەيتىن ءىرى وپەراتورلار. بۇل جوبالارداعى كومپانيالاردىڭ بارلىعى ءبىزدىڭ ونىمدەرىمىزدى تۇتىنادى. بيىل ءبىز ىستىقتاي مىرىشتاۋ تسەحىن ىسكە قوسۋدى جوسپارلاپ وتىرمىز. سونداي-اق مەتالل قۇرىلىمدارى مەن تەحنولوگيالىق جابدىقتاردىڭ كەشەندى جەتكىزۋشىسى رەتىندەگى پوزيتسيامىزدى كۇشەيتۋدى كوزدەيمىز, - دەيدى نۇركەن ەسقاليەۆ.
