باتىس قازاقستان وبلىسىندا كۇنى بۇگىنگە دەيىن كوروناۆيرۋس ينفەكتسياسىن جۇقتىرعان 120 وقيعا تىركەلدى. ولاردىڭ ءبارى دە ينفەكتسيالىق ستاتسيوناردا ەم-دوم الدى, 7 ادام جازىلىپ شىققان. بولاتبەك امانگەلدى ۇلىنىڭ ايتۋىنشا, ۆيرۋس جۇقتىرعانداردىڭ ءبىرى – كامەلەتكە تولماعان جاس بالا.
- ءدال قازىر ورالدا 113 ادام ستاتسيونارلىق ەم-دوم الىپ جاتىر, ونىڭ ىشىندە 79-ى – اۋرۋدىڭ جەڭىل تۇرىمەن, 33-ءى – ورتاشا تۇرىمەن اۋىرعان. 4 ادامعا پنەۆمونيا دياگنوزى قويىلدى, بىراق تىنىس الۋى اسقىنباعان. ءبىر ايەل عانا ينتەنسيۆتى تەراپيانىڭ جانساقتاۋ بولىمىندە جاتىر. بىراق ول ناۋقاستىڭ دا دەنە قىزۋى ءتۇستى, جاقىن كۇندەرى جالپى پالاتاعا اۋىستىرىلادى. جاساندى تىنىس الدىرۋ اپپاراتىنا قوسىلعان ناۋقاس جوق. دارىگەرلەردىڭ جانقيارلىق ەڭبەگى ارقاسىندا بۇل ينفەكتسيانىڭ بەتىن قايتارىپ, ادامداردى بار كۇش-جىگەردى سالىپ ەمدەپ جاتىرمىز. وكىنىشكە قاراي, ىندەتپەن كۇرەستە العى شەپتە ءجۇرىپ, ۆيرۋس جۇقتىرىپ العان ارىپتەستەرىمىز دە بار, - دەدى بولاتبەك قايۋپوۆ.
بۇدان بۇرىن حابارلانعانداي, باتىس قازاقستان وبلىسىنىڭ مەملەكەتتىك باس سانيتارلىق دارىگەرىنىڭ قاۋلىسىمەن وڭىردە كۇشەيتىلگەن كارانتين رەجىمى كۇشىنە ەنگەن. بۇل بويىنشا رەسەي فەدەراتسياسىمەن اراداعى شەكارادان وتكەن ازاماتتار وقشاۋلانىپ, ناۋقاسپەن قارىم-قاتىناستا بولعانداردىڭ ءبارى 14 كۇندىك كارانتيندە بولدى. ارينە, مۇنداي قاتاڭ شارالارعا نارازى بولعاندار دا كەزدەستى. كەيبىرەۋلەر كارانتيندە ادامدارعا جايلى جاعداي جاسالماعانىنا شاعىمدانعان بولاتىن.
- ايتا كەتەيىن, كارانتيندىك ستاتسيونار – مەديتسينالىق مەكەمە بولۋى مىندەتتى ەمەس. ول جەردە وقشاۋلانۋ رەجىمى, جاتىن ورنى جانە تاماقتانۋ ورنى بولسا جەتكىلىكتى. مۇنىڭ بارلىق شىعىنى مەديتسينالىق مەكەمەنىڭ ەسەبىنەن جۇرگىزىلۋدە. ول ستاتسيونارلار بارلىق مەديتسينالىق پەرسونالمەن قامتىلعان. قاجەتتى بارلىق ءدارى-دارمەك, قۇرال-جابدىق جەتكىلىكتى. پالاتادا جەكە گيگيەنالىق زاتتار, سابىن, قاعاز سۇلگى بار. پاتسيەنتتەردىڭ ءبارى ءبىر كيەتىن بەتپەردەمەن قامتىلعان. راس, ول جەردە كومفورت از, بىراق ءبىز ول جەردە جاتقان جەرلەستەرىمىزگە, باسقا وبلىس تۇرعىندارىنا ۋاقىتشا قيىندىققا سابىرلى بولۋىن سۇرايمىز. ويتكەنى بۇل شارالاردىڭ ءبارى سىزدەردىڭ وزدەرىڭىزدىڭ جانە جاقىن-جۋىقتارىڭىزدىڭ دەنساۋلىعى ءۇشىن جاسالىپ وتىر, - دەدى دەنساۋلىق ساقتاۋ باسقارماسىنىڭ باسشىسى.
بولاتبەك قايۋپوۆ توتەنشە جاعداي كەزەڭىندە دارىگەرلەردىڭ ەڭ باستى مىندەتى – كوروناۆيرۋسكە شالدىققان ناۋقاستاردى باستاپقى كەزەڭىندە ەمدەۋ ەكەنىن ايتتى. بۇل قاتەرلى ىندەتتى اسقىندىرماي, اۋىر سالدارىنىڭ الدىن الۋ ءۇشىن كەرەك.
باتىس قازاقستان وبلىسىنىڭ دارىگەرلەرى وسى كەزگە دەيىن ءار جاقتان كەلگەن 16 مىڭ ادامدى الدىنان وتكەرىپ, مونيتورينگ جاساپتى. 1,5 مىڭنان استام ادام كارانتيندىك جانە پروۆيزورلىق ستاتسيونارلىق وقشاۋلاۋ شاراسىنان وتكەن. پوليمەرلىك تىزبەكتى رەاكتسيا ارقىلى 5 مىڭنان اسا دياگنوستيكالىق زەرتتەۋ جۇرگىزىلگەن.
- جازىلىپ شىققان ادامداردىڭ جاعدايى جاقسى, كۇن سايىن حابارلاسىپ, جاعدايىن باقىلاپ وتىرمىز, - دەيدى بولاتبەك قايۋپوۆ.
باتىس قازاقستان
