جۋىردا عانا قالالىق پوليتسيا باسقارماسىنا ينتەرنەتتەگى الاياقتىق تۋرالى بىرنەشە شاعىم تۇسكەن. 37 جاستاعى پەتروپاۆلدىق قىمبات باعالى سەرۆيزىن ينتەرنەت حابارلاندىرۋ ارقىلى ساتپاق بولعان ەكەن, الۋشى تەز تابىلىپ, الدىن-الا تولەمدى اۋدارۋ ءۇشىن بانكتىك كارتا ءنومىرىن سۇرايدى. ينتەرنەت-بانكينگتەن كودتى جىبەرگەن كەزدە, ول كەنەتتەن الاياقتاردىڭ قۇربانىنا اينالعانىن تۇسىنەدى. ازاماتتىڭ كارت-شوتىنان بىردەن 700 مىڭ تەڭگە جوق بولىپ كەتكەن.
«مۇنداي جاعدايعا ەشقاشان تۇسپەيمىن دەپ ءوز-وزىمە سەنىمدى بولعان ەدىم. بىراق ولار جاقسى پسيحولوگتار ەكەن. ولار مەنى سەندىردى, سودان كەيىنگى ارەكەتىمنىڭ قالاي بولعانىن ءوزىم دە تۇسىنبەي قالدىم, ولارعا SMS-كودتى ايتىپ بەردىم. ال ولار مەنىڭ كارتوچكام ارقىلى دەپوزيتتىك شوتقا كىرىپ, بارلىق اقشامدى الىپ قويعاندا سانىمدى ءبىر-اق سوقتىم», دەيدى جابىرلەنۋشى.
وبلىس ورتالىعىنىڭ 57 جاستاعى تاعى ءبىر تۇرعىنى Facebook ارقىلى الاياقتاردىڭ قولىنا تۇسكەن. بىرنەشە اي بۇرىن ءوزىن دوستارىنىڭ تۋىسى رەتىندە تانىستىرعان ءبىر قىز وعان «دوس» رەتىندە قوسىلادى. سوزىنە قاراعاندا, ول لوندوندا تۇرادى جانە وعان جەدەل تۇردە قۇندى زاتتار سالىنعان سومكەنى پەتروپاۆلعا جىبەرۋ كەرەك ەكەنىن ايتادى. سونىڭ كەدەندىك شىعىندارىن تولەۋگە قارجىلىق كومەك بەرۋدى سۇراعان. كەيىن كورسەتكەن كومەگى ءۇشىن ۇلكەن سىياقى بەرۋگە ۋادە بەرەدى. ونىڭ سوزىنە سەنگەن پەتروپاۆلدىق بىرنەشە اپتا ىشىندە رەسەي بانكتەرىنىڭ بىرىندەگى قىزدىڭ بانك كارتوچكالارىنا 3 ميلليون 700 مىڭ تەڭگەدەن استام سوماعا بىرنەشە رەت اۋدارىم جاسايدى. بانك قاۋىپسىزدىك قىزمەتتەرىنىڭ ەسكەرتۋ قوڭىراۋلارىنا دا قاراماعان, ەڭ سوڭىندا تۋىستارى ونى پوليتسياعا وزدەرى الىپ كەلگەن.
قازىرگى ۋاقىتتا كريمينالدىق پوليتسيا قىزمەتكەرلەرى ينتەرنەت-الاياقتاردىڭ قاي جەردە ەكەنىن انىقتاۋ ءۇشىن جەدەل-ىزدەستىرۋ ءىس-شارالارىن جۇرگىزۋدە. سوعان قاراعاندا ايەلدىڭ پسيحولوگيالىق اسەر ەتە الاتىن قابىلەتى بولعانى كورىنىپ تۇر. پەتروپاۆل قالالىق كريمينالدىق پوليتسيا ءبولىمىنىڭ باستىعى, پوليتسيا مايورى دارحان زيافەدين تۇرعىنداردان ەشكىمگە ءپارولىن, PIN-كودتاردى جانە CV-كودتاردى ايتپاۋلارىن سۇرايدى.
«الدىن الا تولەم نەمەسە سالىم تۇرىندە كۇماندى مامىلەلەر جاساماۋ قاجەت, جاعدايدى انىقتاماي دوستارىڭىزعا نەمەسە تۋىستارىڭىزعا اقشا اۋدارۋعا اسىقپاڭىزدار, سەنىمدى بولۋ ءۇشىن اقپاراتتى تەكسەرىپ, ۆيدەو قوڭىراۋ شالىڭىزدار», دەيدى ول.
پەتروپاۆل
