«وزدەرىڭىز دە بايقاپ وتىرسىزدار, بۇزاۋلاردىڭ ءولىمى كوپ تىركەلگەن. ءتىپتى بۇزاۋلاردان سىلەكەي دە اقپايتىن كورىنەدى. كەشە ەنەسىن ەمىپ تۇرعان بۇزاۋ بۇگىن ءولىپ قالادى ەكەن. الايدا قازىر جاعداي ءبىرشاما تۇراقتالدى. 22 ساۋىردە ءبىر عانا مال ءولىمى تىركەلدى» دەيدى وبلىستىق ۆەتەريناريا باسقارماسىنىڭ باسشىسى راميل ساعاندىقوۆ.
كوميسسيا وكىلدەرىنىڭ ايتۋىنشا, 22 ساۋىردەن باستاپ اۋىلعا ۋاقىتشا شەكتەۋ ەنگىزىلىپتى. بەلگىسىز ىندەتتەن ولگەن ءىرى قارانىڭ بارلىعى ارنايى ورىنعا كومىلدى. قازىرگى ۋاقىتتا اۋىلدا مال دارىگەرلەرىنىڭ بريگاداسى جۇمىس ىستەپ, اۋىرعان مالداردى ەمدەپ جاتىر ەكەن. «ادامدار ءارى-بەرى جۇرمەس ءۇشىن اۋىلعا پوست قويىلدى. كەشەدەن باستاپ مالى ولگەن ۇيلەردىڭ اۋلالارى مەن قورا-قوپسىلارىنا دەزينفەكتسيا جاسالىپ جاتىر. كوكتالدىڭ ماڭىنداعى اۋىلداردىڭ مالىن ۆاكتسيناتسيالاۋ جۇمىستارى باستالدى», دەيدى ء«ۇرجار-ۆەت» مەملەكەتتىك كوممۋنالدىق كاسىپورنىنىڭ ديرەكتورى اسەت ابايبەكوۆ.
اۋىل تۇرعىندارى بەلگىسىز ىندەت اۋسىل بولۋى مۇمكىن دەپ بولجايدى. ال مال دارىگەرلەرى بۇل ىندەت اۋسىل, پاستەرەللەز نەمەسە نودۋليارلىق دەرماتيت, ياعني وسى ۇشەۋىنىڭ ءبىرى بولۋى مۇمكىن دەپ وتىر.
«ناقتى دياگنوز زەرتحانا ناتيجەسى شىققان سوڭ بەلگىلى بولادى. اۋزىنان سىلەكەي اققاننىڭ ءبارىن اۋسىل دەۋگە بولمايدى. ءبىزدىڭ ءبىر بايقاعانىمىز, اۋىرىپ تۇرعان مالدىڭ تاماعى ءىسىنىپ كەتكەن. كەڭىردەكتەرىنىڭ ءىشى قىپ-قىزىل. قىزىپ تۇر. دەمالا المايدى. ولگەن ءىرى قارانىڭ وكپەلەرى قىپ-قىزىل بولىپ كۇيىپ كەتكەن. بۇل پاستەرەللەزدىڭ سيمپتومدارىنا كەلەتىن سەكىلدى», دەيدى ۆەتەريناريا باسقارماسىنىڭ باسشىسى.
ال بەلگىسىز ىندەت قايدان تاراعان؟ كوكتال اۋىلىنىڭ تۇرعىنى نازيگۇل شالعىنباەۆا كەشەگى گازەتتە شىققان ماقالامىزدا «ىندەت جانىمىزداعى «ايان» شارۋا قوجالىعىنىڭ مالىنان تارادى» دەگەن بولاتىن. ء«ۇرجار-ۆەت» مەملەكەتتىك كوممۋنالدىق كاسىپورنىنىڭ ديرەكتورى مۇنى راستاعانىمەن, وبلىستىق ۆەتەريناريا باسقارماسىنىڭ باسشىسى: «ىندەت وشاعى ازىرگە ناقتى بەلگىسىز. ويتكەنى اۋىلداعى مالدار قالاي بولسا سولاي جۇرەتىندىكتەن, ءبىر-بىرىمەن قوسىلىپ كەتكەن. شارۋا قوجالىقتارى مەن اۋىل تۇرعىندارىنىڭ مالدارى بولەك جايىلمايدى, ارالاسىپ جۇرە بەرەتىن كورىنەدى. ءبىز وسىنى اۋىل تۇرعىندارىنا ەسكەرتتىك, اركىمنىڭ ءوز مالىنا يە بولۋى كەرەكتىگىن ايتتىق», دەدى.
بەلگىسىز ىندەتتىڭ جايىلۋىنا جانە ولگەن مالدارى ەگەر اۋسىل بولماي, پاستەرەللەز بولعان جاعدايدا وتەماقى تولەنبەي قالا ما دەپ الاڭداعان اۋىل تۇرعىندارى: «ەلدى مەكەندى كارانتينگە جاۋىپ, مەملەكەت ولگەن مالدارعا وتەماقى تولەسىن», دەپ ءوز تالاپتارىن قويعان-دى. كەشە كوكتال تۇرعىندارىنىڭ بىرىمەن ءۇي تەلەفونى ارقىلى سويلەسكەنىمىزدە اۋىل حالقىنىڭ جانىنا باتقان وسى ماسەلەنى وبلىس اكىمى دانيال احمەتوۆتىڭ ءوزى باقىلاۋعا الىپ, مالدارى اۋسىل بولماعان جاعدايدا دا تۇرعىندارعا ءتيىستى كومەك كورسەتىلەتىنىن جەتكىزىپتى.
«وبلىس اكىمى اۋىل تۇرعىندارىنا ءوزى تەلەفون شالىپ, سويلەسىپ, «الاڭداماڭىزدار» دەپ سابىرعا شاقىردى. اۋدان اكىمى دە جاعدايدى باقىلاپ, تىنىم تاپپاي, وسى ءىستىڭ باسى-قاسىندا ءجۇر. الدىگۇنى مالداردى كومگەن كەزدە دە ءجۇردى. اۋىلىمىزعا اۋدان, وبلىس ورتالىقتارىنان كىسىلەر كەلىپ, بولعان جايدى كوزدەرىمەن كورگەن سوڭ كوڭىلىمىز جايلانعانداي بولدى. جاعداي رەتتەلەدى دەپ سەنەمىز», دەيدى اۋىل تۇرعىنى نۇرگۇل جازىباەۆا.
بەت قاتتالىپ جاتقاندا: وبلىس اكىمى دانيال احمەتوۆ ءوزىنىڭ Facebook-تەگى پاراقشاسىندا كوكتال اۋىلىنداعى مالى شىعىنعا ۇشىراعان تۇرعىندارعا ءىرى قارانىڭ باسىنا 260 مىڭ تەڭگەدەن, 1 جاسار تورپاققا 150 مىڭ تەڭگەدەن, بيىلعى بۇزاۋلارعا 50 مىڭ تەڭگەدەن وتەماقى بەرىلەتىنىن جازدى.
شىعىس قازاقستان وبلىسى,
ءۇرجار اۋدانى
